9.1 ကဿပဂေါတ္တဘိက္ခုဝတ္ထု
တေန သမယေန ဗုဒ္ဓေါ ဘဂဝါ စမ္ပာယံ ဝိဟရတိ ဂဂ္ဂရာယ ပေါက္ခရဏိယာ တီရေ. တေန ခေါ ပန သမယေန ကာသီသု ဇနပဒေ ဝါသဘဂါမော နာမ ဟောတိ. တတ္ထ ကဿပဂေါတ္တော နာမ ဘိက္ခု အာဝါသိကော ဟောတိ တန္တိဗဒ္ဓေါ ဥဿုက္ကံ အာပန္နော— “ကိန္တိ အနာဂတာ စ ပေသလာ ဘိက္ခူ အာဂစ္ဆေယျုံ, အာဂတာ စ ပေသလာ ဘိက္ခူ ဖာသု ဝိဟရေယျုံ, အယဉ္စ အာဝါသော ဝုဒ္ဓိံ ဝိရုဠှိံ ဝေပုလ္လံ အာပဇ္ဇေယျာ”တိ. တေန ခေါ ပန သမယေန သမ္ဗဟုလာ ဘိက္ခူ ကာသီသု စာရိကံ စရမာနာ ယေန ဝါသဘဂါမော တဒဝသရုံ. အဒ္ဒသာ ခေါ ကဿပဂေါတ္တော ဘိက္ခု တေ ဘိက္ခူ ဒူရတောဝ အာဂစ္ဆန္တေ, ဒိသွာန အာသနံ ပညပေသိ, ပါဒေါဒကံ ပါဒပီဌံ ပါဒကထလိကံ ဥပနိက္ခိပိ, ပစ္စုဂ္ဂန္တွာ ပတ္တစီဝရံ ပဋိဂ္ဂဟေသိ, ပါနီယေန အာပုစ္ဆိ, နဟာနေ ဥဿုက္ကံ အကာသိ, ဥဿုက္ကမ္ပိ အကာသိ ယာဂုယာ ခါဒနီယေ ဘတ္တသ္မိံ. အထ ခေါ တေသံ အာဂန္တုကာနံ ဘိက္ခူနံ ဧတဒဟောသိ— “ဘဒ္ဒကော ခေါ အယံ, အာဝုသော, အာဝါသိကော ဘိက္ခု နဟာနေ ဥဿုက္ကံ ကရောတိ, ဥဿုက္ကမ္ပိ ကရောတိ ယာဂုယာ ခါဒနီယေ ဘတ္တသ္မိံ. ဟန္ဒ မယံ, အာဝုသော, ဣဓေဝ ဝါသဘဂါမေ နိဝါသံ ကပ္ပေမာ”တိ. အထ ခေါ တေ အာဂန္တုကာ ဘိက္ခူ တတ္ထေဝ ဝါသဘဂါမေ နိဝါသံ ကပ္ပေသုံ.
အထ ခေါ ကဿပဂေါတ္တဿ ဘိက္ခုနော ဧတဒဟောသိ— “ယော ခေါ ဣမေသံ အာဂန္တုကာနံ ဘိက္ခူနံ အာဂန္တုကကိလမထော သော ပဋိပ္ပဿဒ္ဓေါ. ယေပိမေ ဂေါစရေ အပ္ပကတညုနော တေဒါနိမေ ဂေါစရေ ပကတညုနော. ဒုက္ကရံ ခေါ ပန ပရကုလေသု ယာဝဇီဝံ ဥဿုက္ကံ ကာတုံ, ဝိညတ္တိ စ မနုဿာနံ အမနာပါ. ယန္နူနာဟံ န ဥဿုက္ကံ ကရေယျံ ယာဂုယာ ခါဒနီယေ ဘတ္တသ္မိန်”တိ. သော န ဥဿုက္ကံ အကာသိ ယာဂုယာ ခါဒနီယေ ဘတ္တသ္မိံ.
အထ ခေါ တေသံ အာဂန္တုကာနံ ဘိက္ခူနံ ဧတဒဟောသိ— “ပုဗ္ဗေ ခွါယံ, အာဝုသော, အာဝါသိကော ဘိက္ခု နဟာနေ ဥဿုက္ကံ အကာသိ, ဥဿုက္ကမ္ပိ အကာသိ ယာဂုယာ ခါဒနီယေ ဘတ္တသ္မိံ. သောဒါနာယံ န ဥဿုက္ကံ ကရောတိ ယာဂုယာ ခါဒနီယေ ဘတ္တသ္မိံ. ဒုဋ္ဌောဒါနာယံ, အာဝုသော, အာဝါသိကော ဘိက္ခု. ဟန္ဒ မယံ, အာဝုသော, အာဝါသိကံ ဘိက္ခုံ ဥက္ခိပါမာ”တိ.
အထ ခေါ တေ အာဂန္တုကာ ဘိက္ခူ သန္နိပတိတွာ ကဿပဂေါတ္တံ ဘိက္ခုံ ဧတဒဝေါစုံ— “ပုဗ္ဗေ ခေါ တွံ, အာဝုသော, နဟာနေ ဥဿုက္ကံ ကရောသိ, ဥဿုက္ကမ္ပိ ကရောသိ ယာဂုယာ ခါဒနီယေ ဘတ္တသ္မိံ. သောဒါနိ တွံ န ဥဿုက္ကံ ကရောသိ ယာဂုယာ ခါဒနီယေ ဘတ္တသ္မိံ. အာပတ္တိံ တွံ, အာဝုသော, အာပန္နော. ပဿသေတံ အာပတ္တိန်”တိ? “နတ္ထိ မေ, အာဝုသော, အာပတ္တိ, ယမဟံ ပဿေယျန်”တိ. အထ ခေါ တေ အာဂန္တုကာ ဘိက္ခူ ကဿပဂေါတ္တံ ဘိက္ခုံ အာပတ္တိယာ အဒဿနေ ဥက္ခိပိံသု.
အထ ခေါ ကဿပဂေါတ္တဿ ဘိက္ခုနော ဧတဒဟောသိ— “အဟံ ခေါ ဧတံ န ဇာနာမိ ‘အာပတ္တိ ဝါ ဧသာ အနာပတ္တိ ဝါ, အာပန္နော စမှိ အနာပန္နော ဝါ, ဥက္ခိတ္တော စမှိ အနုက္ခိတ္တော ဝါ, ဓမ္မိကေန ဝါ အဓမ္မိကေန ဝါ, ကုပ္ပေန ဝါ အကုပ္ပေန ဝါ, ဌာနာရဟေန ဝါ အဋ္ဌာနာရဟေန ဝါ’. ယန္နူနာဟံ စမ္ပံ ဂန္တွာ ဘဂဝန္တံ ဧတမတ္ထံ ပုစ္ဆေယျန်”တိ. အထ ခေါ ကဿပဂေါတ္တော ဘိက္ခု သေနာသနံ သံသာမေတွာ ပတ္တစီဝရမာဒါယ ယေန စမ္ပာ တေန ပက္ကာမိ. အနုပုဗ္ဗေန ယေန စမ္ပာ ယေန ဘဂဝါ တေနုပသင်္ကမိ, ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. အာစိဏ္ဏံ ခေါ ပနေတံ ဗုဒ္ဓါနံ ဘဂဝန္တာနံ အာဂန္တုကေဟိ ဘိက္ခူဟိ သဒ္ဓိံ ပဋိသမ္မောဒိတုံ. အထ ခေါ ဘဂဝါ ကဿပဂေါတ္တံ ဘိက္ခုံ ဧတဒဝေါစ— “ကစ္စိ, ဘိက္ခု, ခမနီယံ, ကစ္စိ ယာပနီယံ, ကစ္စိ အပ္ပကိလမထေန အဒ္ဓါနံ အာဂတော, ကုတော စ တွံ, ဘိက္ခု, အာဂစ္ဆသီ”တိ? “ခမနီယံ, ဘဂဝါ, ယာပနီယံ, ဘဂဝါ; အပ္ပကိလမထေန စာဟံ, ဘန္တေ, အဒ္ဓါနံ အာဂတော. အတ္ထိ, ဘန္တေ, ကာသီသု ဇနပဒေ ဝါသဘဂါမော နာမ. တတ္ထာဟံ, ဘဂဝါ, အာဝါသိကော တန္တိဗဒ္ဓေါ ဥဿုက္ကံ အာပန္နော— ‘ကိန္တိ အနာဂတာ စ ပေသလာ ဘိက္ခူ အာဂစ္ဆေယျုံ, အာဂတာ စ ပေသလာ ဘိက္ခူ ဖာသု ဝိဟရေယျုံ, အယဉ္စ အာဝါသော ဝုဒ္ဓိံ ဝိရုဠှိံ ဝေပုလ္လံ အာပဇ္ဇေယျာ’တိ. အထ ခေါ, ဘန္တေ, သမ္ဗဟုလာ ဘိက္ခူ ကာသီသု စာရိကံ စရမာနာ ယေန ဝါသဘဂါမော တဒဝသရုံ. အဒ္ဒသံ ခေါ အဟံ, ဘန္တေ, တေ ဘိက္ခူ ဒူရတောဝ အာဂစ္ဆန္တေ, ဒိသွာန အာသနံ ပညပေသိံ, ပါဒေါဒကံ ပါဒပီဌံ ပါဒကထလိကံ ဥပနိက္ခိပိံ, ပစ္စုဂ္ဂန္တွာ ပတ္တစီဝရံ ပဋိဂ္ဂဟေသိံ, ပါနီယေန အပုစ္ဆိံ, နဟာနေ ဥဿုက္ကံ အကာသိံ, ဥဿုက္ကမ္ပိ အကာသိံ ယာဂုယာ ခါဒနီယေ ဘတ္တသ္မိံ. အထ ခေါ တေသံ, ဘန္တေ, အာဂန္တုကာနံ ဘိက္ခူနံ ဧတဒဟောသိ— ‘ဘဒ္ဒကော ခေါ အယံ အာဝုသော အာဝါသိကော ဘိက္ခု နဟာနေ ဥဿုက္ကံ ကရောတိ, ဥဿုက္ကမ္ပိ ကရောတိ ယာဂုယာ ခါဒနီယေ ဘတ္တသ္မိံ. ဟန္ဒ မယံ, အာဝုသော, ဣဓေဝ ဝါသဘဂါမေ နိဝါသံ ကပ္ပေမာ’တိ. အထ ခေါ တေ, ဘန္တေ, အာဂန္တုကာ ဘိက္ခူ တတ္ထေဝ ဝါသဘဂါမေ နိဝါသံ ကပ္ပေသုံ. တဿ မယှံ, ဘန္တေ, ဧတဒဟောသိ— ‘ယော ခေါ ဣမေသံ အာဂန္တုကာနံ ဘိက္ခူနံ အာဂန္တုကကိလမထော သော ပဋိပ္ပဿဒ္ဓေါ. ယေပိမေ ဂေါစရေ အပ္ပကတညုနော တေဒါနိမေ ဂေါစရေ ပကတညုနော. ဒုက္ကရံ ခေါ ပန ပရကုလေသု ယာဝဇီဝံ ဥဿုက္ကံ ကာတုံ, ဝိညတ္တိ စ မနုဿာနံ အမနာပါ. ယန္နူနာဟံ န ဥဿုက္ကံ ကရေယျံ ယာဂုယာ ခါဒနီယေ ဘတ္တသ္မိန်’တိ. သော ခေါ အဟံ, ဘန္တေ, န ဥဿုက္ကံ အကာသိံ ယာဂုယာ ခါဒနီယေ ဘတ္တသ္မိံ. အထ ခေါ တေသံ, ဘန္တေ, အာဂန္တုကာနံ ဘိက္ခူနံ ဧတဒဟောသိ— ‘ပုဗ္ဗေ ခွါယံ, အာဝုသော, အာဝါသိကော ဘိက္ခု နဟာနေ ဥဿုက္ကံ ကရောတိ, ဥဿုက္ကမ္ပိ ကရောတိ ယာဂုယာ ခါဒနီယေ ဘတ္တသ္မိံ. သောဒါနာယံ န ဥဿုက္ကံ ကရောတိ ယာဂုယာ ခါဒနီယေ ဘတ္တသ္မိံ. ဒုဋ္ဌောဒါနာယံ, အာဝုသော, အာဝါသိကော ဘိက္ခု. ဟန္ဒ မယံ, အာဝုသော, အာဝါသိကံ ဘိက္ခုံ ဥက္ခိပါမာ’တိ. အထ ခေါ တေ, ဘန္တေ, အာဂန္တုကာ ဘိက္ခူ သန္နိပတိတွာ မံ ဧတဒဝေါစုံ— ‘ပုဗ္ဗေ ခေါ တွံ, အာဝုသော, နဟာနေ ဥဿုက္ကံ ကရောသိ, ဥဿုက္ကမ္ပိ ကရောသိ ယာဂုယာ ခါဒနီယေ ဘတ္တသ္မိံ. သောဒါနိ တွံ န ဥဿုက္ကံ ကရောသိ ယာဂုယာ ခါဒနီယေ ဘတ္တသ္မိံ. အာပတ္တိံ တွံ, အာဝုသော, အာပန္နော. ပဿသေတံ အာပတ္တိန်’တိ? ‘နတ္ထိ မေ, အာဝုသော, အာပတ္တိ ယမဟံ ပဿေယျန်’တိ. အထ ခေါ တေ, ဘန္တေ, အာဂန္တုကာ ဘိက္ခူ မံ အာပတ္တိယာ အဒဿနေ ဥက္ခိပိံသု. တဿ မယှံ, ဘန္တေ, ဧတဒဟောသိ— ‘အဟံ ခေါ ဧတံ န ဇာနာမိ “အာပတ္တိ ဝါ ဧသာ အနာပတ္တိ ဝါ, အာပန္နော စမှိ အနာပန္နော ဝါ, ဥက္ခိတ္တော စမှိ အနုက္ခိတ္တော ဝါ, ဓမ္မိကေန ဝါ အဓမ္မိကေန ဝါ, ကုပ္ပေန ဝါ အကုပ္ပေန ဝါ, ဌာနာရဟေန ဝါ အဋ္ဌာနာရဟေန ဝါ”. ယန္နူနာဟံ စမ္ပံ ဂန္တွာ ဘဂဝန္တံ ဧတမတ္ထံ ပုစ္ဆေယျန်’တိ. တတော အဟံ, ဘဂဝါ, အာဂစ္ဆာမီ”တိ. “အနာပတ္တိ ဧသာ, ဘိက္ခု, နေသာ အာပတ္တိ. အနာပန္နောသိ, နသိ အာပန္နော. အနုက္ခိတ္တောသိ, နသိ ဥက္ခိတ္တော. အဓမ္မိကေနာသိ ကမ္မေန ဥက္ခိတ္တော ကုပ္ပေန အဋ္ဌာနာရဟေန. ဂစ္ဆ တွံ, ဘိက္ခု, တတ္ထေဝ ဝါသဘဂါမေ နိဝါသံ ကပ္ပေဟီ”တိ. “ဧဝံ, ဘန္တေ”တိ ခေါ ကဿပဂေါတ္တော ဘိက္ခု ဘဂဝတော ပဋိဿုဏိတွာ ဥဋ္ဌာယာသနာ ဘဂဝန္တံ အဘိဝါဒေတွာ ပဒက္ခိဏံ ကတွာ ယေန ဝါသဘဂါမော တေန ပက္ကာမိ.
အထ ခေါ တေသံ အာဂန္တုကာနံ ဘိက္ခူနံ အဟုဒေဝ ကုက္ကုစ္စံ, အဟု ဝိပ္ပဋိသာရော— “အလာဘာ ဝတ နော, န ဝတ နော လာဘာ; ဒုလ္လဒ္ဓံ ဝတ နော, န ဝတ နော သုလဒ္ဓံ, ယေ မယံ သုဒ္ဓံ ဘိက္ခုံ အနာပတ္တိကံ အဝတ္ထုသ္မိံ အကာရဏေ ဥက္ခိပိမှာ. ဟန္ဒ မယံ, အာဝုသော, စမ္ပံ ဂန္တွာ ဘဂဝတော သန္တိကေ အစ္စယံ အစ္စယတော ဒေသေမာ”တိ. အထ ခေါ တေ အာဂန္တုကာ ဘိက္ခူ သေနာသနံ သံသာမေတွာ ပတ္တစီဝရမာဒါယ ယေန စမ္ပာ တေန ပက္ကမိံသု. အနုပုဗ္ဗေန ယေန စမ္ပာ ယေန ဘဂဝါ တေနုပသင်္ကမိံသု, ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိံသု. အာစိဏ္ဏံ ခေါ ပနေတံ ဗုဒ္ဓါနံ ဘဂဝန္တာနံ အာဂန္တုကေဟိ ဘိက္ခူဟိ သဒ္ဓိံ ပဋိသမ္မောဒိတုံ. အထ ခေါ ဘဂဝါ တေ ဘိက္ခူ ဧတဒဝေါစ— “ကစ္စိ, ဘိက္ခဝေ, ခမနီယံ, ကစ္စိ ယာပနီယံ, ကစ္စိတ္ထ အပ္ပကိလမထေန အဒ္ဓါနံ အာဂတာ, ကုတော စ တုမှေ, ဘိက္ခဝေ, အာဂစ္ဆထာ”တိ? “ခမနီယံ, ဘဂဝါ, ယာပနီယံ, ဘဂဝါ; အပ္ပကိလမထေန စ မယံ, ဘန္တေ, အဒ္ဓါနံ အာဂတာ. အတ္ထိ, ဘန္တေ, ကာသီသု ဇနပဒေ ဝါသဘဂါမော နာမ. တတော မယံ, ဘဂဝါ, အာဂစ္ဆာမာ”တိ. “တုမှေ, ဘိက္ခဝေ, အာဝါသိကံ ဘိက္ခုံ ဥက္ခိပိတ္ထာ”တိ? “ဧဝံ, ဘန္တေ”တိ. “ကိသ္မိံ, ဘိက္ခဝေ, ဝတ္ထုသ္မိံ ကာရဏေ”တိ? “အဝတ္ထုသ္မိံ, ဘဂဝါ, အကာရဏေ”တိ. ဝိဂရဟိ ဗုဒ္ဓေါ ဘဂဝါ— “အနနုစ္ဆဝိကံ, မောဃပုရိသာ, အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ. ကထဉှိ နာမ တုမှေ, မောဃပုရိသာ, သုဒ္ဓံ ဘိက္ခုံ အနာပတ္တိကံ အဝတ္ထုသ္မိံ အကာရဏေ ဥက္ခိပိဿထ. နေတံ, မောဃပုရိသာ, အပ္ပသန္နာနံ ဝါ ပသာဒါယ …ပေ… ဝိဂရဟိတွာ ဓမ္မိံ ကထံ ကတွာ ဘိက္ခူ အာမန္တေသိ— “န, ဘိက္ခဝေ, သုဒ္ဓေါ ဘိက္ခု အနာပတ္တိကော အဝတ္ထုသ္မိံ အကာရဏေ ဥက္ခိပိတဗ္ဗော. ယော ဥက္ခိပေယျ, အာပတ္တိ ဒုက္ကဋဿာ”တိ.
အထ ခေါ တေ ဘိက္ခူ ဥဋ္ဌာယာသနာ ဧကံသံ ဥတ္တရာသင်္ဂံ ကရိတွာ ဘဂဝတော ပါဒေသု သိရသာ နိပတိတွာ ဘဂဝန္တံ ဧတဒဝေါစုံ— “အစ္စယော နော, ဘန္တေ, အစ္စဂမာ ယထာဗာလေ ယထာမူဠှေ ယထာအကုသလေ, ယေ မယံ သုဒ္ဓံ ဘိက္ခုံ အနာပတ္တိကံ အဝတ္ထုသ္မိံ အကာရဏေ ဥက္ခိပိမှာ. တေသံ နော, ဘန္တေ, ဘဂဝါ အစ္စယံ အစ္စယတော ပဋိဂ္ဂဏှာတု အာယတိံ သံဝရာယာ”တိ. “တဂ္ဃ တုမှေ, ဘိက္ခဝေ, အစ္စယော အစ္စဂမာ ယထာဗာလေ ယထာမူဠှေ ယထာအကုသလေ, ယေ တုမှေ သုဒ္ဓံ ဘိက္ခုံ အနာပတ္တိကံ အဝတ္ထုသ္မိံ အကာရဏေ ဥက္ခိပိတ္ထ. ယတော စ ခေါ တုမှေ, ဘိက္ခဝေ, အစ္စယံ အစ္စယတော ဒိသွာ ယထာဓမ္မံ ပဋိကရောထ, တံ ဝေါ မယံ ပဋိဂ္ဂဏှာမ. ဝုဒ္ဓိဟေသာ, ဘိက္ခဝေ, အရိယဿ ဝိနယေ ယော အစ္စယံ အစ္စယတော ဒိသွာ ယထာဓမ္မံ ပဋိကရောတိ, အာယတိံ သံဝရံ အာပဇ္ဇတီ”တိ.