9.2 အဓမ္မေနဝဂ္ဂါဒိကမ္မကထာ
တေန ခေါ ပန သမယေန စမ္ပာယံ ဘိက္ခူ ဧဝရူပါနိ ကမ္မာနိ ကရောန္တိ— အဓမ္မေန ဝဂ္ဂကမ္မံ ကရောန္တိ, အဓမ္မေန သမဂ္ဂကမ္မံ ကရောန္တိ; ဓမ္မေန ဝဂ္ဂကမ္မံ ကရောန္တိ, ဓမ္မပတိရူပကေန ဝဂ္ဂကမ္မံ ကရောန္တိ; ဓမ္မပတိရူပကေန သမဂ္ဂကမ္မံ ကရောန္တိ; ဧကောပိ ဧကံ ဥက္ခိပတိ, ဧကောပိ ဒွေ ဥက္ခိပတိ, ဧကောပိ သမ္ဗဟုလေ ဥက္ခိပတိ, ဧကောပိ သံဃံ ဥက္ခိပတိ; ဒွေပိ ဧကံ ဥက္ခိပန္တိ, ဒွေပိ ဒွေ ဥက္ခိပန္တိ, ဒွေပိ သမ္ဗဟုလေ ဥက္ခိပန္တိ, ဒွေပိ သံဃံ ဥက္ခိပန္တိ; သမ္ဗဟုလာပိ ဧကံ ဥက္ခိပန္တိ; သမ္ဗဟုလာပိ ဒွေ ဥက္ခိပန္တိ, သမ္ဗဟုလာပိ သမ္ဗဟုလေ ဥက္ခိပန္တိ, သမ္ဗဟုလာပိ သံဃံ ဥက္ခိပန္တိ; သံဃောပိ သံဃံ ဥက္ခိပတိ.
ယေ တေ ဘိက္ခူ အပ္ပိစ္ဆာ …ပေ… တေ ဥဇ္ဈာယန္တိ ခိယျန္တိ ဝိပါစေန္တိ— “ကထဉှိ နာမ စမ္ပာယံ ဘိက္ခူ ဧဝရူပါနိ ကမ္မာနိ ကရိဿန္တိ— အဓမ္မေန ဝဂ္ဂကမ္မံ ကရိဿန္တိ, အဓမ္မေန သမဂ္ဂကမ္မံ ကရိဿန္တိ, ဓမ္မေန ဝဂ္ဂကမ္မံ ကရိဿန္တိ, ဓမ္မပတိရူပကေန ဝဂ္ဂကမ္မံ ကရိဿန္တိ, ဓမ္မပတိရူပကေန သမဂ္ဂကမ္မံ ကရိဿန္တိ, ဧကောပိ ဧကံ ဥက္ခိပိဿတိ, ဧကောပိ ဒွေ ဥက္ခိပိဿတိ, ဧကောပိ သမ္ဗဟုလေ ဥက္ခိပိဿတိ, ဧကောပိ သံဃံ ဥက္ခိပိဿတိ, ဒွေပိ ဧကံ ဥက္ခိပိဿန္တိ, ဒွေပိ ဒွေ ဥက္ခိပိဿန္တိ, ဒွေပိ သမ္ဗဟုလေ ဥက္ခိပိဿန္တိ, ဒွေပိ သံဃံ ဥက္ခိပိဿန္တိ, သမ္ဗဟုလာပိ ဧကံ ဥက္ခိပိဿန္တိ, သမ္ဗဟုလာပိ ဒွေ ဥက္ခိပိဿန္တိ, သမ္ဗဟုလာပိ သမ္ဗဟုလေ ဥက္ခိပိဿန္တိ, သမ္ဗဟုလာပိ သံဃံ ဥက္ခိပိဿန္တိ, သံဃောပိ သံဃံ ဥက္ခိပိဿတီ”တိ.
အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ …ပေ… “သစ္စံ ကိရ, ဘိက္ခဝေ, စမ္ပာယံ ဘိက္ခူ ဧဝရူပါနိ ကမ္မာနိ ကရောန္တိ— အဓမ္မေန ဝဂ္ဂကမ္မံ ကရောန္တိ …ပေ… သံဃောပိ သံဃံ ဥက္ခိပတီ”တိ? “သစ္စံ, ဘဂဝါ”တိ. ဝိဂရဟိ ဗုဒ္ဓေါ ဘဂဝါ— “အနနုစ္ဆဝိကံ, ဘိက္ခဝေ, တေသံ မောဃပုရိသာနံ အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ. ကထဉှိ နာမ တေ, ဘိက္ခဝေ, မောဃပုရိသာ ဧဝရူပါနိ ကမ္မာနိ ကရိဿန္တိ— အဓမ္မေန ဝဂ္ဂကမ္မံ ကရိဿန္တိ …ပေ… သံဃောပိ သံဃံ ဥက္ခိပိဿတိ. နေတံ, ဘိက္ခဝေ, အပ္ပသန္နာနံ ဝါ ပသာဒါယ …ပေ… ဝိဂရဟိတွာ …ပေ… ဓမ္မိံ ကထံ ကတွာ ဘိက္ခူ အာမန္တေသိ—
“အဓမ္မေန စေ, ဘိက္ခဝေ, ဝဂ္ဂကမ္မံ အကမ္မံ န စ ကရဏီယံ, အဓမ္မေန သမဂ္ဂကမ္မံ အကမ္မံ န စ ကရဏီယံ, ဓမ္မေန ဝဂ္ဂကမ္မံ အကမ္မံ န စ ကရဏီယံ; ဓမ္မပတိရူပကေန ဝဂ္ဂကမ္မံ အကမ္မံ န စ ကရဏီယံ, ဓမ္မပတိရူပကေန သမဂ္ဂကမ္မံ အကမ္မံ န စ ကရဏီယံ; ဧကောပိ ဧကံ ဥက္ခိပတိ အကမ္မံ န စ ကရဏီယံ, ဧကောပိ ဒွေ ဥက္ခိပတိ အကမ္မံ န စ ကရဏီယံ, ဧကောပိ သမ္ဗဟုလေ ဥက္ခိပတိ အကမ္မံ န စ ကရဏီယံ, ဧကောပိ သံဃံ ဥက္ခိပတိ အကမ္မံ န စ ကရဏီယံ; ဒွေပိ ဧကံ ဥက္ခိပန္တိ အကမ္မံ န စ ကရဏီယံ, ဒွေပိ ဒွေ ဥက္ခိပန္တိ အကမ္မံ န စ ကရဏီယံ, ဒွေပိ သမ္ဗဟုလေ ဥက္ခိပန္တိ အကမ္မံ န စ ကရဏီယံ, ဒွေပိ သံဃံ ဥက္ခိပန္တိ အကမ္မံ န စ ကရဏီယံ; သမ္ဗဟုလာပိ ဧကံ ဥက္ခိပန္တိ အကမ္မံ န စ ကရဏီယံ, သမ္ဗဟုလာပိ ဒွေ ဥက္ခိပန္တိ အကမ္မံ န စ ကရဏီယံ, သမ္ဗဟုလာပိ သမ္ဗဟုလေ ဥက္ခိပန္တိ အကမ္မံ န စ ကရဏီယံ, သမ္ဗဟုလာပိ သံဃံ ဥက္ခိပန္တိ အကမ္မံ န စ ကရဏီယံ; သံဃောပိ သံဃံ ဥက္ခိပတိ အကမ္မံ န စ ကရဏီယံ.
စတ္တာရိမာနိ, ဘိက္ခဝေ, ကမ္မာနိ— အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မေန သမဂ္ဂကမ္မံ. တတြ, ဘိက္ခဝေ, ယဒိဒံ အဓမ္မေန ဝဂ္ဂကမ္မံ, ဣဒံ, ဘိက္ခဝေ, ကမ္မံ အဓမ္မတ္တာ ဝဂ္ဂတ္တာ ကုပ္ပံ အဋ္ဌာနာရဟံ; န, ဘိက္ခဝေ, ဧဝရူပံ ကမ္မံ ကာတဗ္ဗံ, န စ မယာ ဧဝရူပံ ကမ္မံ အနုညာတံ. တတြ, ဘိက္ခဝေ, ယဒိဒံ အဓမ္မေန သမဂ္ဂကမ္မံ, ဣဒံ, ဘိက္ခဝေ, ကမ္မံ အဓမ္မတ္တာ ကုပ္ပံ အဋ္ဌာနာရဟံ; န, ဘိက္ခဝေ, ဧဝရူပံ ကမ္မံ ကာတဗ္ဗံ, န စ မယာ ဧဝရူပံ ကမ္မံ အနုညာတံ. တတြ, ဘိက္ခဝေ, ယဒိဒံ ဓမ္မေန ဝဂ္ဂကမ္မံ, ဣဒံ, ဘိက္ခဝေ, ကမ္မံ ဝဂ္ဂတ္တာ ကုပ္ပံ အဋ္ဌာနာရဟံ; န, ဘိက္ခဝေ, ဧဝရူပံ ကမ္မံ ကာတဗ္ဗံ, န စ မယာ ဧဝရူပံ ကမ္မံ အနုညာတံ. တတြ, ဘိက္ခဝေ, ယဒိဒံ ဓမ္မေန သမဂ္ဂကမ္မံ, ဣဒံ, ဘိက္ခဝေ, ကမ္မံ ဓမ္မတ္တာ သမဂ္ဂတ္တာ အကုပ္ပံ ဌာနာရဟံ; ဧဝရူပံ, ဘိက္ခဝေ, ကမ္မံ ကာတဗ္ဗံ, ဧဝရူပဉ္စ မယာ ကမ္မံ အနုညာတံ. တသ္မာတိဟ, ဘိက္ခဝေ, ဧဝရူပံ ကမ္မံ ကရိဿာမ ယဒိဒံ ဓမ္မေန သမဂ္ဂန္တိ— ဧဝဉှိ ဝေါ, ဘိက္ခဝေ, သိက္ခိတဗ္ဗန်”တိ.