9.3 ဉတ္တိဝိပန္နကမ္မာဒိကထာ
- ဉတ္တိဝိပန္နကမ္မာဒိကထာ
တေန ခေါ ပန သမယေန ဆဗ္ဗဂ္ဂိယာ ဘိက္ခူ ဧဝရူပါနိ ကမ္မာနိ ကရောန္တိ— အဓမ္မေန ဝဂ္ဂကမ္မံ ကရောန္တိ, အဓမ္မေန သမဂ္ဂကမ္မံ ကရောန္တိ; ဓမ္မေန ဝဂ္ဂကမ္မံ ကရောန္တိ, ဓမ္မပတိရူပကေန ဝဂ္ဂကမ္မံ ကရောန္တိ, ဓမ္မပတိရူပကေန သမဂ္ဂကမ္မံ ကရောန္တိ; ဉတ္တိဝိပန္နမ္ပိ ကမ္မံ ကရောန္တိ အနုဿာဝနသမ္ပန္နံ, အနုဿာဝနဝိပန္နမ္ပိ ကမ္မံ ကရောန္တိ ဉတ္တိသမ္ပန္နံ, ဉတ္တိဝိပန္နမ္ပိ အနုဿာဝနဝိပန္နမ္ပိ ကမ္မံ ကရောန္တိ; အညတြာပိ ဓမ္မာ ကမ္မံ ကရောန္တိ, အညတြာပိ ဝိနယာ ကမ္မံ ကရောန္တိ, အညတြာပိ သတ္ထုသာသနာ ကမ္မံ ကရောန္တိ; ပဋိကုဋ္ဌကတမ္ပိ ကမ္မံ ကရောန္တိ အဓမ္မိကံ ကုပ္ပံ အဋ္ဌာနာရဟံ.
ယေ တေ ဘိက္ခူ အပ္ပိစ္ဆာ …ပေ… တေ ဥဇ္ဈာယန္တိ ခိယျန္တိ ဝိပါစေန္တိ— “ကထဉှိ နာမ ဆဗ္ဗဂ္ဂိယာ ဘိက္ခူ ဧဝရူပါနိ ကမ္မာနိ ကရိဿန္တိ— အဓမ္မေန ဝဂ္ဂကမ္မံ ကရိဿန္တိ, အဓမ္မေန သမဂ္ဂကမ္မံ ကရိဿန္တိ; ဓမ္မေန ဝဂ္ဂကမ္မံ ကရိဿန္တိ, ဓမ္မပတိရူပကေန ဝဂ္ဂကမ္မံ ကရိဿန္တိ, ဓမ္မပတိရူပကေန သမဂ္ဂကမ္မံ ကရိဿန္တိ; ဉတ္တိဝိပန္နမ္ပိ ကမ္မံ ကရိဿန္တိ အနုဿာဝနသမ္ပန္နံ, အနုဿာဝနဝိပန္နမ္ပိ ကမ္မံ ကရိဿန္တိ ဉတ္တိသမ္ပန္နံ, ဉတ္တိဝိပန္နမ္ပိ အနုဿာဝနဝိပန္နမ္ပိ ကမ္မံ ကရိဿန္တိ; အညတြာပိ ဓမ္မာ ကမ္မံ ကရိဿန္တိ, အညတြာပိ ဝိနယာ ကမ္မံ ကရိဿန္တိ, အညတြာပိ သတ္ထုသာသနာ ကမ္မံ ကရိဿန္တိ; ပဋိကုဋ္ဌကတမ္ပိ ကမ္မံ ကရိဿန္တိ အဓမ္မိကံ ကုပ္ပံ အဋ္ဌာနာရဟန်”တိ.
အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ …ပေ… “သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခူ ဧဝရူပါနိ ကမ္မာနိ ကရောန္တိ— အဓမ္မေန ဝဂ္ဂကမ္မံ ကရောန္တိ …ပေ… ပဋိကုဋ္ဌကတမ္ပိ ကမ္မံ ကရောန္တိ အဓမ္မိကံ ကုပ္ပံ အဋ္ဌာနာရဟန်”တိ? “သစ္စံ, ဘဂဝါ”တိ. ဝိဂရဟိ ဗုဒ္ဓေါ ဘဂဝါ …ပေ… ဝိဂရဟိတွာ ဓမ္မိံ ကထံ ကတွာ ဘိက္ခူ အာမန္တေသိ—
“အဓမ္မေန စေ, ဘိက္ခဝေ, ဝဂ္ဂကမ္မံ အကမ္မံ န စ ကရဏီယံ; အဓမ္မေန သမဂ္ဂကမ္မံ အကမ္မံ န စ ကရဏီယံ; ဓမ္မေန ဝဂ္ဂကမ္မံ အကမ္မံ န စ ကရဏီယံ; ဓမ္မပတိရူပကေန ဝဂ္ဂကမ္မံ အကမ္မံ န စ ကရဏီယံ; ဓမ္မပတိရူပကေန သမဂ္ဂကမ္မံ အကမ္မံ န စ ကရဏီယံ. ဉတ္တိဝိပန္နဉ္စေ, ဘိက္ခဝေ, ကမ္မံ အနုဿာဝနသမ္ပန္နံ အကမ္မံ န စ ကရဏီယံ; အနုဿာဝနဝိပန္နဉ္စေ, ဘိက္ခဝေ, ကမ္မံ ဉတ္တိသမ္ပန္နံ အကမ္မံ န စ ကရဏီယံ; ဉတ္တိဝိပန္နဉ္စေ, ဘိက္ခဝေ, ကမ္မံ အနုဿာဝနဝိပန္နံ အကမ္မံ န စ ကရဏီယံ; အညတြာပိ ဓမ္မာ ကမ္မံ အကမ္မံ န စ ကရဏီယံ; အညတြာပိ ဝိနယာ ကမ္မံ အကမ္မံ န စ ကရဏီယံ; အညတြာပိ သတ္ထုသာသနာ ကမ္မံ အကမ္မံ န စ ကရဏီယံ; ပဋိကုဋ္ဌကတဉ္စေ, ဘိက္ခဝေ, ကမ္မံ အဓမ္မိကံ ကုပ္ပံ အဋ္ဌာနာရဟံ အကမ္မံ န စ ကရဏီယံ.
ဆယိမာနိ, ဘိက္ခဝေ, ကမ္မာနိ— အဓမ္မကမ္မံ, ဝဂ္ဂကမ္မံ, သမဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, ဓမ္မေန သမဂ္ဂကမ္မံ.
ကတမဉ္စ, ဘိက္ခဝေ, အဓမ္မကမ္မံ? ဉတ္တိဒုတိယေ စေ, ဘိက္ခဝေ, ကမ္မေ ဧကာယ ဉတ္တိယာ ကမ္မံ ကရောတိ, န စ ကမ္မဝါစံ အနုဿာဝေတိ— အဓမ္မကမ္မံ. ဉတ္တိဒုတိယေ စေ, ဘိက္ခဝေ, ကမ္မေ ဒွီဟိ ဉတ္တီဟိ ကမ္မံ ကရောတိ, န စ ကမ္မဝါစံ အနုဿာဝေတိ— အဓမ္မကမ္မံ. ဉတ္တိဒုတိယေ စေ, ဘိက္ခဝေ, ကမ္မေ ဧကာယ ကမ္မဝါစာယ ကမ္မံ ကရောတိ, န စ ဉတ္တိံ ဌပေတိ— အဓမ္မကမ္မံ. ဉတ္တိဒုတိယေ စေ, ဘိက္ခဝေ, ကမ္မေ ဒွီဟိ ကမ္မဝါစာဟိ ကမ္မံ ကရောတိ, န စ ဉတ္တိံ ဌပေတိ— အဓမ္မကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ ဧကာယ ဉတ္တိယာ ကမ္မံ ကရောတိ, န စ ကမ္မဝါစံ အနုဿာဝေတိ— အဓမ္မကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ ဒွီဟိ ဉတ္တီဟိ ကမ္မံ ကရောတိ, န စ ကမ္မဝါစံ အနုဿာဝေတိ— အဓမ္မကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ တီဟိ ဉတ္တီဟိ ကမ္မံ ကရောတိ, န စ ကမ္မဝါစံ အနုဿာဝေတိ— အဓမ္မကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ စတူဟိ ဉတ္တီဟိ ကမ္မံ ကရောတိ, န စ ကမ္မဝါစံ အနုဿာဝေတိ— အဓမ္မကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ ဧကာယ ကမ္မဝါစာယ ကမ္မံ ကရောတိ, န စ ဉတ္တိံ ဌပေတိ— အဓမ္မကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ ဒွီဟိ ကမ္မဝါစာဟိ ကမ္မံ ကရောတိ, န စ ဉတ္တိံ ဌပေတိ— အဓမ္မကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ တီဟိ ကမ္မဝါစာဟိ ကမ္မံ ကရောတိ, န စ ဉတ္တိံ ဌပေတိ— အဓမ္မကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ စတူဟိ ကမ္မဝါစာဟိ ကမ္မံ ကရောတိ, န စ ဉတ္တိံ ဌပေတိ— အဓမ္မကမ္မံ. ဣဒံ ဝုစ္စတိ, ဘိက္ခဝေ, အဓမ္မကမ္မံ. (1)
ကတမဉ္စ, ဘိက္ခဝေ, ဝဂ္ဂကမ္မံ? ဉတ္တိဒုတိယေ စေ, ဘိက္ခဝေ, ကမ္မေ ယာဝတိကာ ဘိက္ခူ ကမ္မပ္ပတ္တာ တေ အနာဂတာ ဟောန္တိ, ဆန္ဒာရဟာနံ ဆန္ဒော အနာဟဋော ဟောတိ, သမ္မုခီဘူတာ ပဋိက္ကောသန္တိ— ဝဂ္ဂကမ္မံ. ဉတ္တိဒုတိယေ စေ, ဘိက္ခဝေ, ကမ္မေ ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အနာဟဋော ဟောတိ, သမ္မုခီဘူတာ ပဋိက္ကောသန္တိ— ဝဂ္ဂကမ္မံ. ဉတ္တိဒုတိယေ စေ, ဘိက္ခဝေ, ကမ္မေ ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ ပဋိက္ကောသန္တိ— ဝဂ္ဂကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ ယာဝတိကာ ဘိက္ခူ ကမ္မပ္ပတ္တာ တေ အနာဂတာ ဟောန္တိ, ဆန္ဒာရဟာနံ ဆန္ဒော အနာဟဋော ဟောတိ, သမ္မုခီဘူတာ ပဋိက္ကောသန္တိ— ဝဂ္ဂကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အနာဟဋော ဟောတိ, သမ္မုခီဘူတာ ပဋိက္ကောသန္တိ— ဝဂ္ဂကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ ပဋိက္ကောသန္တိ— ဝဂ္ဂကမ္မံ. ဣဒံ ဝုစ္စတိ, ဘိက္ခဝေ, ဝဂ္ဂကမ္မံ. (2)
ကတမဉ္စ, ဘိက္ခဝေ, သမဂ္ဂကမ္မံ? ဉတ္တိဒုတိယေ စေ, ဘိက္ခဝေ, ကမ္မေ ယာဝတိကာ ဘိက္ခူ ကမ္မပ္ပတ္တာ, တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ န ပဋိက္ကောသန္တိ— သမဂ္ဂကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ ယာဝတိကာ ဘိက္ခူ ကမ္မပ္ပတ္တာ, တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ န ပဋိက္ကောသန္တိ— သမဂ္ဂကမ္မံ. ဣဒံ ဝုစ္စတိ, ဘိက္ခဝေ, သမဂ္ဂကမ္မံ. (3)
ကတမဉ္စ, ဘိက္ခဝေ, ဓမ္မပတိရူပကေန ဝဂ္ဂကမ္မံ? ဉတ္တိဒုတိယေ စေ, ဘိက္ခဝေ, ကမ္မေ ပဌမံ ကမ္မဝါစံ အနုဿာဝေတိ, ပစ္ဆာ ဉတ္တိံ ဌပေတိ, ယာဝတိကာ ဘိက္ခူ ကမ္မပ္ပတ္တာ တေ အနာဂတာ ဟောန္တိ, ဆန္ဒာရဟာနံ ဆန္ဒော အနာဟဋော ဟောတိ, သမ္မုခီဘူတာ ပဋိက္ကောသန္တိ— ဓမ္မပတိရူပကေန ဝဂ္ဂကမ္မံ. ဉတ္တိဒုတိယေ စေ, ဘိက္ခဝေ, ကမ္မေ ပဌမံ ကမ္မဝါစံ အနုဿာဝေတိ, ပစ္ဆာ ဉတ္တိံ ဌပေတိ, ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အနာဟဋော ဟောတိ, သမ္မုခီဘူတာ ပဋိက္ကောသန္တိ— ဓမ္မပတိရူပကေန ဝဂ္ဂကမ္မံ. ဉတ္တိဒုတိယေ စေ, ဘိက္ခဝေ, ကမ္မေ ပဌမံ ကမ္မဝါစံ အနုဿာဝေတိ, ပစ္ဆာ ဉတ္တိံ ဌပေတိ, ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ ပဋိက္ကောသန္တိ— ဓမ္မပတိရူပကေန ဝဂ္ဂကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ ပဌမံ ကမ္မဝါစံ အနုဿာဝေတိ, ပစ္ဆာ ဉတ္တိံ ဌပေတိ, ယာဝတိကာ ဘိက္ခူ ကမ္မပ္ပတ္တာ တေ အနာဂတာ ဟောန္တိ, ဆန္ဒာရဟာနံ ဆန္ဒော အနာဟဋော ဟောတိ, သမ္မုခီဘူတာ ပဋိက္ကောသန္တိ— ဓမ္မပတိရူပကေန ဝဂ္ဂကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ ပဌမံ ကမ္မဝါစံ အနုဿာဝေတိ, ပစ္ဆာ ဉတ္တိံ ဌပေတိ, ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အနာဟဋော ဟောတိ, သမ္မုခီဘူတာ ပဋိက္ကောသန္တိ— ဓမ္မပတိရူပကေန ဝဂ္ဂကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ ပဌမံ ကမ္မဝါစံ အနုဿာဝေတိ, ပစ္ဆာ ဉတ္တိံ ဌပေတိ, ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ ပဋိက္ကောသန္တိ— ဓမ္မပတိရူပကေန ဝဂ္ဂကမ္မံ. ဣဒံ ဝုစ္စတိ, ဘိက္ခဝေ, ဓမ္မပတိရူပကေန ဝဂ္ဂကမ္မံ. (4)
ကတမဉ္စ, ဘိက္ခဝေ, ဓမ္မပတိရူပကေန သမဂ္ဂကမ္မံ? ဉတ္တိဒုတိယေ စေ, ဘိက္ခဝေ, ကမ္မေ ပဌမံ ကမ္မဝါစံ အနုဿာဝေတိ, ပစ္ဆာ ဉတ္တိံ ဌပေတိ, ယာဝတိကာ ဘိက္ခူ ကမ္မပ္ပတ္တာ, တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ န ပဋိက္ကောသန္တိ— ဓမ္မပတိရူပကေန သမဂ္ဂကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ ပဌမံ ကမ္မဝါစံ အနုဿာဝေတိ, ပစ္ဆာ ဉတ္တိံ ဌပေတိ, ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ န ပဋိက္ကောသန္တိ— ဓမ္မပတိရူပကေန သမဂ္ဂကမ္မံ. ဣဒံ ဝုစ္စတိ, ဘိက္ခဝေ, ဓမ္မပတိရူပကေန သမဂ္ဂကမ္မံ. (5)
ကတမဉ္စ, ဘိက္ခဝေ, ဓမ္မေန သမဂ္ဂကမ္မံ? ဉတ္တိဒုတိယေ စေ, ဘိက္ခဝေ, ကမ္မေ ပဌမံ ဉတ္တိံ ဌပေတိ, ပစ္ဆာ ဧကာယ ကမ္မဝါစာယ ကမ္မံ ကရောတိ, ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ န ပဋိက္ကောသန္တိ— ဓမ္မေန သမဂ္ဂကမ္မံ. ဉတ္တိစတုတ္ထေ စေ, ဘိက္ခဝေ, ကမ္မေ ပဌမံ ဉတ္တိံ ဌပေတိ, ပစ္ဆာ တီဟိ ကမ္မဝါစာဟိ ကမ္မံ ကရောတိ, ယာဝတိကာ ဘိက္ခူ ကမ္မပ္ပတ္တာ, တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ န ပဋိက္ကောသန္တိ, ဓမ္မေန သမဂ္ဂကမ္မံ. ဣဒံ ဝုစ္စတိ, ဘိက္ခဝေ, ဓမ္မေန သမဂ္ဂကမ္မံ. (6)