2.14.5.3 อาสวโคจฺฉก
อาสเวหิ ธมฺเมหิ เย ธมฺมา… อาสวสมฺปยุตฺเตหิ ธมฺเมหิ เย ธมฺมา… อาสเวหิ เจว สาสเวหิ จ ธมฺเมหิ เย ธมฺมา… อาสเวหิ เจว อาสวสมฺปยุตฺเตหิ จ ธมฺเมหิ เย ธมฺมา… อาสวสมฺปยุตฺเตหิ เจว โน จ อาสเวหิ ธมฺเมหิ เย ธมฺมา วิปฺปยุตฺตา… เต ธมฺมา อสงฺขตํ ขนฺธโต ฐเปตฺวา ปญฺจหิ ขนฺเธหิ ทฺวาทสหายตเนหิ อฏฺฐารสหิ ธาตูหิ สงฺคหิตา. กติหิ อสงฺคหิตา? น เกหิจิ ขนฺเธหิ น เกหิจิ อายตเนหิ น กาหิจิ ธาตูหิ อสงฺคหิตา.
สาสเวหิ ธมฺเมหิ เย ธมฺมา… อาสววิปฺปยุตฺเตหิ ธมฺเมหิ เย ธมฺมา… สาสเวหิ เจว โน จ อาสเวหิ ธมฺเมหิ เย ธมฺมา… อาสววิปฺปยุตฺเตหิ สาสเวหิ ธมฺเมหิ เย ธมฺมา วิปฺปยุตฺตา… เต ธมฺมา จตูหิ ขนฺเธหิ ทฺวีหายตเนหิ ทฺวีหิ ธาตูหิ สงฺคหิตา. กติหิ อสงฺคหิตา? เอเกน ขนฺเธน ทสหายตเนหิ โสฬสหิ ธาตูหิ อสงฺคหิตา.
อนาสเวหิ ธมฺเมหิ เย ธมฺมา… อาสววิปฺปยุตฺเตหิ อนาสเวหิ ธมฺเมหิ เย ธมฺมา วิปฺปยุตฺตา… เต ธมฺมา จตูหิ ขนฺเธหิ ทฺวีหายตเนหิ อฏฺฐหิ ธาตูหิ สงฺคหิตา. กติหิ อสงฺคหิตา? เอเกน ขนฺเธน ทสหายตเนหิ ทสหิ ธาตูหิ อสงฺคหิตา.