2.3.8 อรูเปรูปกถา
๐ อตฺถิ รูปํ อรูเปสูติ? อามนฺตา. รูปภโว รูปคติ รูปสตฺตาวาโส รูปสํสาโร รูปโยนิ รูปตฺตภาวปฏิลาโภติ? น เหวํ วตฺตพฺเพ …เป… นนุ อรูปภโว อรูปคติ อรูปสตฺตาวาโส อรูปสํสาโร อรูปโยนิ อรูปตฺตภาวปฏิลาโภติ? อามนฺตา. หญฺจิ อรูปภโว …เป… อรูปตฺตภาวปฏิลาโภ, โน จ วต เร วตฺตพฺเพ— “อตฺถิ รูปํ อรูเปสู”ติ.
๐ อตฺถิ รูปํ อรูเปสูติ? อามนฺตา. ปญฺจโวการภโว คติ สตฺตาวาโส สํสาโร โยนิ วิญฺญาณฏฺฐิติ อตฺตภาวปฏิลาโภติ? น เหวํ วตฺตพฺเพ …เป… นนุ จตุโวการภโว …เป… อตฺตภาวปฏิลาโภติ? อามนฺตา. หญฺจิ จตุโวการภโว คติ …เป… อตฺตภาวปฏิลาโภ, โน จ วต เร วตฺตพฺเพ— “อตฺถิ รูปํ อรูเปสู”ติ.
๐ อตฺถิ รูปํ รูปธาตุยา, โส จ รูปภโว รูปคติ รูปสตฺตาวาโส รูปสํสาโร รูปโยนิ รูปตฺตภาวปฏิลาโภติ? อามนฺตา. อตฺถิ รูปํ อรูเปสุ, โส จ รูปภโว รูปคติ …เป… รูปตฺตภาวปฏิลาโภติ? น เหวํ วตฺตพฺเพ …เป… อตฺถิ รูปํ รูปธาตุยา, โส จ ปญฺจโวการภโว คติ …เป… อตฺตภาวปฏิลาโภติ? อามนฺตา. อตฺถิ รูปํ อรูเปสุ, โส จ ปญฺจโวการภโว คติ …เป… อตฺตภาวปฏิลาโภติ? น เหวํ วตฺตพฺเพ …เป… .
๐ อตฺถิ รูปํ อรูเปสุ, โส จ อรูปภโว อรูปคติ อรูปสตฺตาวาโส อรูปสํสาโร อรูปโยนิ อรูปตฺตภาวปฏิลาโภติ? อามนฺตา. อตฺถิ รูปํ รูปธาตุยา, โส จ อรูปภโว อรูปคติ …เป… อรูปตฺตภาวปฏิลาโภติ? น เหวํ วตฺตพฺเพ …เป… อตฺถิ รูปํ อรูเปสุ, โส จ จตุโวการภโว คติ …เป… อตฺตภาวปฏิลาโภติ? อามนฺตา. อตฺถิ รูปํ รูปธาตุยา, โส จ จตุโวการภโว คติ …เป… อตฺตภาวปฏิลาโภติ? น เหวํ วตฺตพฺเพ …เป… .
๐ อตฺถิ รูปํ อรูเปสูติ? อามนฺตา. นนุ รูปานํ นิสฺสรณํ อรูปํ วุตฺตํ ภควตาติ? อามนฺตา. หญฺจิ รูปานํ นิสฺสรณํ อรูปํ วุตฺตํ ภควตา, โน จ วต เร วตฺตพฺเพ— “อตฺถิ รูปํ อรูเปสู”ติ.
๐ รูปานํ นิสฺสรณํ อรูปํ วุตฺตํ ภควตา, อตฺถิ รูปํ อรูเปสูติ? อามนฺตา. กามานํ นิสฺสรณํ เนกฺขมฺมํ วุตฺตํ ภควตา, อตฺถิ เนกฺขมฺเมสุ กามา, อตฺถิ อนาสเวสุ อาสวา, อตฺถิ อปริยาปนฺเนสุ ปริยาปนฺนาติ? น เหวํ วตฺตพฺเพ …เป… .
อรูเป รูปกถา นิฏฺฐิตา.