4.2.1 อตฺถิอรหโตปุญฺญูปจโยติกถา
๐ อตฺถิ อรหโต ปุญฺญูปจโยติ? อามนฺตา. อตฺถิ อรหโต อปุญฺญูปจโยติ? น เหวํ วตฺตพฺเพ …เป… นตฺถิ อรหโต อปุญฺญูปจโยติ? อามนฺตา. นตฺถิ อรหโต ปุญฺญูปจโยติ? น เหวํ วตฺตพฺเพ …เป… .
๐ อตฺถิ อรหโต ปุญฺญูปจโยติ? อามนฺตา. อรหา ปุญฺญาภิสงฺขารํ อภิสงฺขโรติ, อาเนญฺชาภิสงฺขารํ อภิสงฺขโรติ, คติสํวตฺตนิยํ กมฺมํ กโรติ, ภวสํวตฺตนิยํ กมฺมํ กโรติ, อิสฺสริยสํวตฺตนิยํ กมฺมํ กโรติ, อธิปจฺจสํวตฺตนิยํ กมฺมํ กโรติ, มหาโภคสํวตฺตนิยํ กมฺมํ กโรติ, มหาปริวารสํวตฺตนิยํ กมฺมํ กโรติ, เทวโสภคฺยสํวตฺตนิยํ กมฺมํ กโรติ, มนุสฺสโสภคฺยสํวตฺตนิยํ กมฺมํ กโรตีติ? น เหวํ วตฺตพฺเพ …เป… .
๐ อตฺถิ อรหโต ปุญฺญูปจโยติ? อามนฺตา. อรหา อาจินาตีติ? น เหวํ วตฺตพฺเพ …เป… อรหา อปจินาตีติ? น เหวํ วตฺตพฺเพ …เป… อรหา ปชหตีติ …เป… อรหา อุปาทิยตีติ …เป… อรหา วิสิเนตีติ …เป… อรหา อุสฺสิเนตีติ …เป… อรหา วิธูเปตีติ …เป… อรหา สนฺธูเปตีติ? น เหวํ วตฺตพฺเพ …เป… นนุ อรหา เนวาจินาติ น อปจินาติ อปจินิตฺวา ฐิโตติ? อามนฺตา. หญฺจิ อรหา เนวาจินาติ นาปจินาติ อปจินิตฺวา ฐิโต, โน จ วต เร วตฺตพฺเพ— “อตฺถิ อรหโต ปุญฺญูปจโย”ติ.
๐ นนุ อรหา เนว ปชหติ น อุปาทิยติ ปชหิตฺวา ฐิโต, เนว วิสิเนติ น อุสฺสิเนติ วิสิเนตฺวา ฐิโต, เนว วิธูเปติ น สนฺธูเปติ วิธูเปตฺวา ฐิโตติ? อามนฺตา. หญฺจิ อรหา เนว วิธูเปติ น สนฺธูเปติ วิธูเปตฺวา ฐิโต, โน จ วต เร วตฺตพฺเพ— “อตฺถิ อรหโต ปุญฺญูปจโย”ติ.
× นตฺถิ อรหโต ปุญฺญูปจโยติ? อามนฺตา. อรหา ทานํ ทเทยฺยาติ? อามนฺตา. หญฺจิ อรหา ทานํ ทเทยฺย, โน จ วต เร วตฺตพฺเพ— “นตฺถิ อรหโต ปุญฺญูปจโย”ติ.
× อรหา จีวรํ ทเทยฺย …เป… ปิณฺฑปาตํ ทเทยฺย… เสนาสนํ ทเทยฺย… คิลานปจฺจยเภสชฺชปริกฺขารํ ทเทยฺย… ขาทนียํ ทเทยฺย… โภชนียํ ทเทยฺย… ปานียํ ทเทยฺย… เจติยํ วนฺเทยฺย… เจติเย มาลํ อาโรเปยฺย… คนฺธํ อาโรเปยฺย… วิเลปนํ อาโรเปยฺย …เป… เจติยํ อภิทกฺขิณํ กเรยฺยาติ? อามนฺตา. หญฺจิ อรหา เจติยํ อภิทกฺขิณํ กเรยฺย, โน จ วต เร วตฺตพฺเพ— “นตฺถิ อรหโต ปุญฺญูปจโย”ติ.
อตฺถิ อรหโต ปุญฺญูปจโยติกถา นิฏฺฐิตา.