4.2.2 นตฺถิอรหโตอกาลมจฺจูติกถา
๐ นตฺถิ อรหโต อกาลมจฺจูติ? อามนฺตา. นตฺถิ อรหนฺตฆาตโกติ? น เหวํ วตฺตพฺเพ …เป… อตฺถิ อรหนฺตฆาตโกติ? อามนฺตา. อตฺถิ อรหโต อกาลมจฺจูติ? น เหวํ วตฺตพฺเพ …เป… นตฺถิ อรหโต อกาลมจฺจูติ? อามนฺตา. โย อรหนฺตํ ชีวิตา โวโรเปติ, สติ ชีวิเต ชีวิตาวเสเส ชีวิตา โวโรเปติ, อสติ ชีวิเต ชีวิตาวเสเส ชีวิตา โวโรเปตีติ? สติ ชีวิเต ชีวิตาวเสเส ชีวิตา โวโรเปตีติ. หญฺจิ สติ ชีวิเต ชีวิตาวเสเส ชีวิตา โวโรเปติ, โน จ วต เร วตฺตพฺเพ— “นตฺถิ อรหโต อกาลมจฺจู”ติ. อสติ ชีวิเต ชีวิตาวเสเส ชีวิตา โวโรเปตีติ, นตฺถิ อรหนฺตฆาตโกติ? น เหวํ วตฺตพฺเพ …เป… .
๐ นตฺถิ อรหโต อกาลมจฺจูติ? อามนฺตา. อรหโต กาเย วิสํ น กเมยฺย, สตฺถํ น กเมยฺย, อคฺคิ น กเมยฺยาติ? น เหวํ วตฺตพฺเพ …เป… นนุ อรหโต กาเย วิสํ กเมยฺย, สตฺถํ กเมยฺย, อคฺคิ กเมยฺยาติ? อามนฺตา. หญฺจิ อรหโต กาเย วิสํ กเมยฺย, สตฺถํ กเมยฺย, อคฺคิ กเมยฺย, โน จ วต เร วตฺตพฺเพ— “นตฺถิ อรหโต อกาลมจฺจู”ติ.
๐ อรหโต กาเย วิสํ น กเมยฺย, สตฺถํ น กเมยฺย, อคฺคิ น กเมยฺยาติ? อามนฺตา. นตฺถิ อรหนฺตฆาตโกติ? น เหวํ วตฺตพฺเพ …เป… .
× อตฺถิ อรหโต อกาลมจฺจูติ? อามนฺตา. นนุ วุตฺตํ ภควตา— “นาหํ, ภิกฺขเว, สญฺเจตนิกานํ กมฺมานํ กตานํ อุปจิตานํ อปฺปฏิสํเวทิตฺวา พฺยนฺตีภาวํ วทามิ; ตญฺจ โข ทิฏฺเฐว ธมฺเม อุปปชฺชํ วา อปเร วา ปริยาเย”ติ. อตฺเถว สุตฺตนฺโตติ? อามนฺตา. เตน หิ นตฺถิ อรหโต อกาลมจฺจูติ.
นตฺถิ อรหโต อกาลมจฺจูติกถา นิฏฺฐิตา.