4.2.3 สพฺพมิทํกมฺมโตติกถา
๐ สพฺพมิทํ กมฺมโตติ? อามนฺตา. กมฺมมฺปิ กมฺมโตติ? น เหวํ วตฺตพฺเพ …เป… สพฺพมิทํ กมฺมโตติ? อามนฺตา. สพฺพมิทํ ปุพฺเพกตเหตูติ? น เหวํ วตฺตพฺเพ …เป… สพฺพมิทํ กมฺมโตติ? อามนฺตา. สพฺพมิทํ กมฺมวิปากโตติ? น เหวํ วตฺตพฺเพ …เป… .
๐ สพฺพมิทํ กมฺมวิปากโตติ? อามนฺตา. กมฺมวิปาเกน ปาณํ หเนยฺยาติ? อามนฺตา. ปาณาติปาโต สผโลติ? อามนฺตา. กมฺมวิปาโก สผโลติ? น เหวํ วตฺตพฺเพ …เป… กมฺมวิปาโก อผโลติ? อามนฺตา. ปาณาติปาโต อผโลติ? น เหวํ วตฺตพฺเพ …เป… .
๐ กมฺมวิปาเกน อทินฺนํ อาทิเยยฺย …เป… มุสา ภเณยฺย… ปิสุณํ ภเณยฺย… ผรุสํ ภเณยฺย… สมฺผํ ปลเปยฺย… สนฺธิํ ฉินฺเทยฺย… นิโลฺลปํ หเรยฺย… เอกาคาริกํ กเรยฺย… ปริปนฺเถ ติฏฺเฐยฺย… ปรทารํ คจฺเฉยฺย… คามฆาตกํ กเรยฺย… นิคมฆาตกํ กเรยฺย… กมฺมวิปาเกน ทานํ ทเทยฺย… จีวรํ ทเทยฺย… ปิณฺฑปาตํ ทเทยฺย… เสนาสนํ ทเทยฺย… คิลานปจฺจยเภสชฺชปริกฺขารํ ทเทยฺยาติ? อามนฺตา. คิลานปจฺจยเภสชฺชปริกฺขาโร สผโลติ? อามนฺตา. กมฺมวิปาโก สผโลติ? น เหวํ วตฺตพฺเพ …เป… กมฺมวิปาโก อผโลติ? อามนฺตา. คิลานปจฺจยเภสชฺชปริกฺขาโร อผโลติ? น เหวํ วตฺตพฺเพ …เป… .
× น วตฺตพฺพํ— “สพฺพมิทํ กมฺมโต”ติ? อามนฺตา. นนุ วุตฺตํ ภควตา—
“กมฺมุนา วตฺตตี โลโก,
กมฺมุนา วตฺตตี ปชา;
กมฺมนิพนฺธนา สตฺตา,
รถสฺสาณีว ยายโต.
กมฺเมน กิตฺติํ ลภเต ปสํสํ,
กมฺเมน ชานิญฺจ วธญฺจ พนฺธํ;
ตํ กมฺมํ นานากรณํ วิทิตฺวา,
กสฺมา วเท นตฺถิ กมฺมนฺติ โลเก”ติ.
อตฺเถว สุตฺตนฺโตติ? อามนฺตา. เตน หิ “สพฺพมิทํ กมฺมโต”ติ.
สพฺพมิทํ กมฺมโตติกถา นิฏฺฐิตา.