4.2.4 อินฺทฺริยพทฺธกถา
๐ อินฺทฺริยพทฺธญฺเญว ทุกฺขนฺติ? อามนฺตา. อินฺทฺริยพทฺธญฺเญว อนิจฺจํ สงฺขตํ ปฏิจฺจสมุปฺปนฺนํ ขยธมฺมํ วยธมฺมํ วิราคธมฺมํ นิโรธธมฺมํ วิปริณามธมฺมนฺติ? น เหวํ วตฺตพฺเพ …เป… นนุ อนินฺทฺริยพทฺธํ อนิจฺจํ สงฺขตํ ปฏิจฺจสมุปฺปนฺนํ ขยธมฺมํ วยธมฺมํ วิราคธมฺมํ นิโรธธมฺมํ วิปริณามธมฺมนฺติ? อามนฺตา. หญฺจิ อนินฺทฺริยพทฺธํ อนิจฺจํ สงฺขตํ ปฏิจฺจสมุปฺปนฺนํ ขยธมฺมํ วยธมฺมํ วิราคธมฺมํ นิโรธธมฺมํ วิปริณามธมฺมํ, โน จ วต เร วตฺตพฺเพ— “อินฺทฺริยพทฺธญฺเญว ทุกฺขนฺ”ติ.
๐ อนินฺทฺริยพทฺธํ อนิจฺจํ สงฺขตํ ปฏิจฺจสมุปฺปนฺนํ …เป… วิปริณามธมฺมํ, ตญฺจ น ทุกฺขนฺติ? อามนฺตา. อินฺทฺริยพทฺธํ อนิจฺจํ สงฺขตํ …เป… วิปริณามธมฺมํ, ตญฺจ น ทุกฺขนฺติ? น เหวํ วตฺตพฺเพ …เป… .
๐ อินฺทฺริยพทฺธํ อนิจฺจํ สงฺขตํ …เป… วิปริณามธมฺมํ, ตญฺจ ทุกฺขนฺติ? อามนฺตา. อนินฺทฺริยพทฺธํ อนิจฺจํ สงฺขตํ …เป… วิปริณามธมฺมํ, ตญฺจ ทุกฺขนฺติ? น เหวํ วตฺตพฺเพ …เป… .
๐ อินฺทฺริยพทฺธญฺเญว ทุกฺขนฺติ? อามนฺตา. นนุ ยทนิจฺจํ ตํ ทุกฺขํ วุตฺตํ ภควตา— “อนินฺทฺริยพทฺธํ อนิจฺจนฺ”ติ? อามนฺตา. หญฺจิ ยทนิจฺจํ ตํ ทุกฺขํ วุตฺตํ ภควตา— “อนินฺทฺริยพทฺธํ อนิจฺจํ”, โน จ วต เร วตฺตพฺเพ— “อินฺทฺริยพทฺธญฺเญว ทุกฺขนฺ”ติ.
× น วตฺตพฺพํ— “อินฺทฺริยพทฺธญฺเญว ทุกฺขนฺ”ติ? อามนฺตา. ยถา อินฺทฺริยพทฺธสฺส ทุกฺขสฺส ปริญฺญาย ภควติ พฺรหฺมจริยํ วุสฺสติ, เอวเมวํ อนินฺทฺริยพทฺธสฺส ทุกฺขสฺส ปริญฺญาย ภควติ พฺรหฺมจริยํ วุสฺสตีติ? น เหวํ วตฺตพฺเพ …เป… ยถา อินฺทฺริยพทฺธํ ทุกฺขํ ปริญฺญาตํ น ปุน อุปฺปชฺชติ, เอวเมวํ อนินฺทฺริยพทฺธํ ทุกฺขํ ปริญฺญาตํ น ปุน อุปฺปชฺชตีติ? น เหวํ วตฺตพฺเพ. เตน หิ อินฺทฺริยพทฺธญฺเญว ทุกฺขนฺติ.
อินฺทฺริยพทฺธกถา นิฏฺฐิตา.