4.2.6 นวตฺตพฺพํสํโฆทกฺขิณํปฏิคฺคณฺหาติกถา
๐ น วตฺตพฺพํ— “สํโฆ ทกฺขิณํ ปฏิคฺคณฺหาตี”ติ? อามนฺตา. นนุ สํโฆ อาหุเนโยฺย ปาหุเนโยฺย ทกฺขิเณโยฺย อญฺชลิกรณีโย อนุตฺตรํ ปุญฺญกฺเขตฺตํ โลกสฺสาติ? อามนฺตา. หญฺจิ สํโฆ อาหุเนโยฺย ปาหุเนโยฺย ทกฺขิเณโยฺย อญฺชลิกรณีโย อนุตฺตรํ ปุญฺญกฺเขตฺตํ โลกสฺส, เตน วต เร วตฺตพฺเพ— “สํโฆ ทกฺขิณํ ปฏิคฺคณฺหาตี”ติ.
๐ น วตฺตพฺพํ— “สํโฆ ทกฺขิณํ ปฏิคฺคณฺหาตี”ติ? อามนฺตา. นนุ จตฺตาโร ปุริสยุคา อฏฺฐ ปุริสปุคฺคลา ทกฺขิเณยฺยา วุตฺตา ภควตาติ? อามนฺตา. หญฺจิ จตฺตาโร ปุริสยุคา อฏฺฐ ปุริสปุคฺคลา ทกฺขิเณยฺยา วุตฺตา ภควตา, เตน วต เร วตฺตพฺเพ— “สํโฆ ทกฺขิณํ ปฏิคฺคณฺหาตี”ติ.
๐ น วตฺตพฺพํ— “สํโฆ ทกฺขิณํ ปฏิคฺคณฺหาตี”ติ? อามนฺตา. นนุ อตฺถิ เกจิ สํฆสฺส ทานํ เทนฺตีติ? อามนฺตา. หญฺจิ อตฺถิ เกจิ สํฆสฺส ทานํ เทนฺติ, เตน วต เร วตฺตพฺเพ— “สํโฆ ทกฺขิณํ ปฏิคฺคณฺหาตี”ติ. นนุ อตฺถิ เกจิ สํฆสฺส จีวรํ เทนฺติ …เป… ปิณฺฑปาตํ เทนฺติ… เสนาสนํ เทนฺติ… คิลานปจฺจยเภสชฺชปริกฺขารํ เทนฺติ… ขาทนียํ เทนฺติ… โภชนียํ เทนฺติ …เป… ปานียํ เทนฺตีติ? อามนฺตา. หญฺจิ อตฺถิ เกจิ สํฆสฺส ปานียํ เทนฺติ, เตน วต เร วตฺตพฺเพ— “สํโฆ ทกฺขิณํ ปฏิคฺคณฺหาตี”ติ.
๐ น วตฺตพฺพํ— “สํโฆ ทกฺขิณํ ปฏิคฺคณฺหาตี”ติ? อามนฺตา. นนุ วุตฺตํ ภควตา—
“อาหุติํ ชาตเวโทว,
มหาเมฆํว เมทนี;
สํโฆ สมาธิสมฺปนฺโน,
ปฏิคฺคณฺหาติ ทกฺขิณนฺ”ติ.
อตฺเถว สุตฺตนฺโตติ? อามนฺตา. เตน หิ สํโฆ ทกฺขิณํ ปฏิคฺคณฺหาตีติ.
× สํโฆ ทกฺขิณํ ปฏิคฺคณฺหาตีติ? อามนฺตา. มคฺโค ปฏิคฺคณฺหาติ, ผลํ ปฏิคฺคณฺหาตีติ? น เหวํ วตฺตพฺเพ …เป… .
น วตฺตพฺพํ สํโฆ ทกฺขิณํ ปฏิคฺคณฺหาตีติกถา นิฏฺฐิตา.