4.2.7 นวตฺตพฺพํสํโฆทกฺขิณํวิโสเธตีติกถา
๐ น วตฺตพฺพํ— “สํโฆ ทกฺขิณํ วิโสเธตี”ติ? อามนฺตา. นนุ สํโฆ อาหุเนโยฺย ปาหุเนโยฺย ทกฺขิเณโยฺย อญฺชลิกรณีโย อนุตฺตรํ ปุญฺญกฺเขตฺตํ โลกสฺสาติ? อามนฺตา. หญฺจิ สํโฆ อาหุเนโยฺย …เป… อนุตฺตรํ ปุญฺญกฺเขตฺตํ โลกสฺส, เตน วต เร วตฺตพฺเพ— “สํโฆ ทกฺขิณํ วิโสเธตี”ติ.
๐ น วตฺตพฺพํ— “สํโฆ ทกฺขิณํ วิโสเธตี”ติ? อามนฺตา. นนุ จตฺตาโร ปุริสยุคา อฏฺฐ ปุริสปุคฺคลา ทกฺขิเณยฺยา วุตฺตา ภควตาติ? อามนฺตา. หญฺจิ จตฺตาโร ปุริสยุคา อฏฺฐ ปุริสปุคฺคลา ทกฺขิเณยฺยา วุตฺตา ภควตา, เตน วต เร วตฺตพฺเพ— “สํโฆ ทกฺขิณํ วิโสเธตี”ติ.
๐ น วตฺตพฺพํ— “สํโฆ ทกฺขิณํ วิโสเธตี”ติ? อามนฺตา. นนุ อตฺถิ เกจิ สํฆสฺส ทานํ ทตฺวา ทกฺขิณํ อาราเธนฺตีติ? อามนฺตา. หญฺจิ อตฺถิ เกจิ สํฆสฺส ทานํ ทตฺวา ทกฺขิณํ อาราเธนฺติ, เตน วต เร วตฺตพฺเพ— “สํโฆ ทกฺขิณํ วิโสเธตี”ติ.
๐ นนุ อตฺถิ เกจิ สํฆสฺส จีวรํ ทตฺวา …เป… ปิณฺฑปาตํ ทตฺวา …เป… เสนาสนํ ทตฺวา… คิลานปจฺจยเภสชฺชปริกฺขารํ ทตฺวา… ขาทนียํ ทตฺวา… โภชนียํ ทตฺวา …เป… ปานียํ ทตฺวา ทกฺขิณํ อาราเธนฺตีติ? อามนฺตา. หญฺจิ อตฺถิ เกจิ สํฆสฺส ปานียํ ทตฺวา ทกฺขิณํ อาราเธนฺติ, เตน วต เร วตฺตพฺเพ— “สํโฆ ทกฺขิณํ วิโสเธตี”ติ.
× สํโฆ ทกฺขิณํ วิโสเธตีติ? อามนฺตา. มคฺโค วิโสเธติ, ผลํ วิโสเธตีติ? น เหวํ วตฺตพฺเพ …เป… .
น วตฺตพฺพํ สํโฆ ทกฺขิณํ วิโสเธตีติกถา นิฏฺฐิตา.