4.2.8 นวตฺตพฺพํสํโฆภุญฺชตีติกถา
๐ น วตฺตพฺพํ— “สํโฆ ภุญฺชติ ปิวติ ขาทติ สายตี”ติ? อามนฺตา. นนุ อตฺถิ เกจิ สํฆภตฺตานิ กโรนฺติ, อุทฺเทสภตฺตานิ กโรนฺติ, ยาคุปานานิ กโรนฺตีติ? อามนฺตา. หญฺจิ อตฺถิ เกจิ สํฆภตฺตานิ กโรนฺติ, อุทฺเทสภตฺตานิ กโรนฺติ, ยาคุปานานิ กโรนฺติ, เตน วต เร วตฺตพฺเพ— “สํโฆ ภุญฺชติ ปิวติ ขาทติ สายตี”ติ.
๐ น วตฺตพฺพํ— “สํโฆ ภุญฺชติ ปิวติ ขาทติ สายตี”ติ? อามนฺตา. นนุ วุตฺตํ ภควตา— “คณโภชนํ ปรมฺปรโภชนํ อติริตฺตโภชนํ อนติริตฺตโภชนนฺ”ติ? อามนฺตา. หญฺจิ วุตฺตํ ภควตา— “คณโภชนํ ปรมฺปรโภชนํ อติริตฺตโภชนํ อนติริตฺตโภชนํ”, เตน วต เร วตฺตพฺเพ— “สํโฆ ภุญฺชติ ปิวติ ขาทติ สายตี”ติ.
๐ น วตฺตพฺพํ— “สํโฆ ภุญฺชติ ปิวติ ขาทติ สายตี”ติ? อามนฺตา. นนุ อฏฺฐ ปานานิ วุตฺตานิ ภควตา— อมฺพปานํ, ชมฺพุปานํ, โจจปานํ, โมจปานํ, มธุกปานํ, มุทฺทิกปานํ, สาลุกปานํ, ผารุสกปานนฺติ? อามนฺตา. หญฺจิ อฏฺฐ ปานานิ วุตฺตานิ ภควตา— อมฺพปานํ, ชมฺพุปานํ, โจจปานํ, โมจปานํ, มธุกปานํ, มุทฺทิกปานํ, สาลุกปานํ, ผารุสกปานํ, เตน วต เร วตฺตพฺเพ— “สํโฆ ภุญฺชติ ปิวติ ขาทติ สายตี”ติ.
× สํโฆ ภุญฺชติ ปิวติ ขาทติ สายตีติ? อามนฺตา. มคฺโค ภุญฺชติ ปิวติ ขาทติ สายติ, ผลํ ภุญฺชติ ปิวติ ขาทติ สายตีติ? น เหวํ วตฺตพฺเพ …เป… .
น วตฺตพฺพํ สํโฆ ภุญฺชตีติกถา นิฏฺฐิตา.