4.2.9 นวตฺตพฺพํสํฆสฺสทินฺนํมหปฺผลนฺติกถา
๐ น วตฺตพฺพํ— “สํฆสฺส ทินฺนํ มหปฺผลนฺ”ติ? อามนฺตา. นนุ สํโฆ อาหุเนโยฺย ปาหุเนโยฺย ทกฺขิเณโยฺย อญฺชลิกรณีโย อนุตฺตรํ ปุญฺญกฺเขตฺตํ โลกสฺสาติ? อามนฺตา. หญฺจิ สํโฆ อาหุเนโยฺย …เป… อนุตฺตรํ ปุญฺญกฺเขตฺตํ โลกสฺส, เตน วต เร วตฺตพฺเพ— “สํฆสฺส ทินฺนํ มหปฺผลนฺ”ติ.
๐ น วตฺตพฺพํ— “สํฆสฺส ทินฺนํ มหปฺผลนฺ”ติ? อามนฺตา. นนุ จตฺตาโร ปุริสยุคา อฏฺฐ ปุริสปุคฺคลา ทกฺขิเณยฺยา วุตฺตา ภควตาติ? อามนฺตา. หญฺจิ จตฺตาโร ปุริสยุคา อฏฺฐ ปุริสปุคฺคลา ทกฺขิเณยฺยา วุตฺตา ภควตา, เตน วต เร วตฺตพฺเพ— “สํฆสฺส ทินฺนํ มหปฺผลนฺ”ติ.
๐ น วตฺตพฺพํ— “สํฆสฺส ทินฺนํ มหปฺผลนฺ”ติ? อามนฺตา. นนุ วุตฺตํ ภควตา— “สํเฆ, โคตมิ, เทหิ, สํเฆ เต ทินฺเน อหญฺเจว ปูชิโต ภวิสฺสามิ สํโฆ จา”ติ. อตฺเถว สุตฺตนฺโตติ? อามนฺตา. เตน หิ สํฆสฺส ทินฺนํ มหปฺผลนฺติ.
๐ น วตฺตพฺพํ— “สํฆสฺส ทินฺนํ มหปฺผลนฺ”ติ? อามนฺตา. นนุ สกฺโก เทวานมินฺโท ภควนฺตํ เอตทโวจ—
“ยชมานานํ มนุสฺสานํ,
ปุญฺญเปกฺขาน ปาณินํ;
กโรตํ โอปธิกํ ปุญฺญํ,
กตฺถ ทินฺนํ มหปฺผลนฺ”ติ.
“จตฺตาโร จ ปฏิปนฺนา,
จตฺตาโร จ ผเล ฐิตา;
เอส สํโฆ อุชุภูโต,
ปญฺญาสีลสมาหิโต.
ยชมานานํ มนุสฺสานํ,
ปุญฺญเปกฺขาน ปาณินํ;
กโรตํ โอปธิกํ ปุญฺญํ,
สํเฆ ทินฺนํ มหปฺผลนฺติ.
เอโส หิ สํโฆ วิปุโล มหคฺคโต,
เอสปฺปเมโยฺย อุทธีว สาคโร;
เอเต หิ เสฏฺฐา นรวีรสาวกา,
ปภงฺกรา ธมฺมมุทีรยนฺติ.
เตสํ สุทินฺนํ สุหุตํ สุยิฏฺฐํ,
เย สํฆมุทฺทิสฺส ททนฺติ ทานํ;
สา ทกฺขิณา สํฆคตา ปติฏฺฐิตา,
มหปฺผลา โลกวิทูน วณฺณิตา.
เอตาทิสํ ยญฺญมนุสฺสรนฺตา,
เย เวทชาตา วิจรนฺติ โลเก;
วิเนยฺย มจฺเฉรมลํ สมูลํ,
อนินฺทิตา สคฺคมุเปนฺติ ฐานนฺ”ติ.
อตฺเถว สุตฺตนฺโตติ? อามนฺตา. เตน หิ สํฆสฺส ทินฺนํ มหปฺผลนฺติ.
น วตฺตพฺพํ สํฆสฺส ทินฺนํ มหปฺผลนฺติกถา นิฏฺฐิตา.