89 สรณทุก, อชฺฌตฺตารมฺมณตฺติก
101.
277
สรณํ อชฺฌตฺตารมฺมณํ ธมฺมํ ปฏิจฺจ นสรโณ นอชฺฌตฺตารมฺมโณ ธมฺโม อุปฺปชฺชติ เหตุปจฺจยา. อรณํ อชฺฌตฺตารมฺมณํ ธมฺมํ ปฏิจฺจ นสรโณ นอชฺฌตฺตารมฺมโณ ธมฺโม อุปฺปชฺชติ เหตุปจฺจยา. เหตุยา ทฺเว, อญฺญมญฺเญ เอกํ …เป… วิปาเก เอกํ …เป… อวิคเต ทฺเว.
278
สรณํ พหิทฺธารมฺมณํ ธมฺมํ ปฏิจฺจ นสรโณ นพหิทฺธารมฺมโณ ธมฺโม อุปฺปชฺชติ เหตุปจฺจยา. อรณํ พหิทฺธารมฺมณํ ธมฺมํ ปฏิจฺจ นสรโณ นพหิทฺธารมฺมโณ ธมฺโม อุปฺปชฺชติ เหตุปจฺจยา. เหตุยา ทฺเว, อญฺญมญฺเญ เอกํ …เป… วิปาเก เอกํ …เป… อวิคเต ทฺเว.