19 กุสลตฺติก, จิตฺตสํสฏฺฐทุก
กุสลํ จิตฺตสํสฏฺฐํ ธมฺมํ ปฏิจฺจ นกุสโล นจิตฺตสํสฏฺโฐ ธมฺโม อุปฺปชฺชติ เหตุปจฺจยา. กุสลํ จิตฺตสํสฏฺฐํ ธมฺมํ ปฏิจฺจ นอกุสโล นจิตฺตสํสฏฺโฐ ธมฺโม อุปฺปชฺชติ เหตุปจฺจยา. กุสลํ จิตฺตสํสฏฺฐํ ธมฺมํ ปฏิจฺจ นอพฺยากโต นจิตฺตสํสฏฺโฐ ธมฺโม อุปฺปชฺชติ เหตุปจฺจยา. กุสลํ จิตฺตสํสฏฺฐํ ธมฺมํ ปฏิจฺจ นอกุสโล นจิตฺตสํสฏฺโฐ จ นอพฺยากโต นจิตฺตสํสฏฺโฐ จ ธมฺมา อุปฺปชฺชนฺติ เหตุปจฺจยา. กุสลํ จิตฺตสํสฏฺฐํ ธมฺมํ ปฏิจฺจ นกุสโล นจิตฺตสํสฏฺโฐ จ นอกุสโล นจิตฺตสํสฏฺโฐ จ ธมฺมา อุปฺปชฺชนฺติ เหตุปจฺจยา… ปญฺจ.
อกุสลํ จิตฺตสํสฏฺฐํ ธมฺมํ ปฏิจฺจ นอกุสโล นจิตฺตสํสฏฺโฐ ธมฺโม อุปฺปชฺชติ เหตุปจฺจยา. อกุสลํ จิตฺตสํสฏฺฐํ ธมฺมํ ปฏิจฺจ นกุสโล นจิตฺตสํสฏฺโฐ ธมฺโม อุปฺปชฺชติ เหตุปจฺจยา. อกุสลํ จิตฺตสํสฏฺฐํ ธมฺมํ ปฏิจฺจ นอพฺยากโต นจิตฺตสํสฏฺโฐ ธมฺโม อุปฺปชฺชติ เหตุปจฺจยา. อกุสลํ จิตฺตสํสฏฺฐํ ธมฺมํ ปฏิจฺจ นกุสโล นจิตฺตสํสฏฺโฐ จ นอพฺยากโต นจิตฺตสํสฏฺโฐ จ ธมฺมา อุปฺปชฺชนฺติ เหตุปจฺจยา. อกุสลํ จิตฺตสํสฏฺฐํ ธมฺมํ ปฏิจฺจ นกุสโล นจิตฺตสํสฏฺโฐ จ นอกุสโล นจิตฺตสํสฏฺโฐ จ ธมฺมา อุปฺปชฺชนฺติ เหตุปจฺจยา… ปญฺจ.
อพฺยากตํ จิตฺตสํสฏฺฐํ ธมฺมํ ปฏิจฺจ นกุสโล นจิตฺตสํสฏฺโฐ ธมฺโม อุปฺปชฺชติ เหตุปจฺจยา. อพฺยากตํ จิตฺตสํสฏฺฐํ ธมฺมํ ปฏิจฺจ นอกุสโล นจิตฺตสํสฏฺโฐ ธมฺโม อุปฺปชฺชติ เหตุปจฺจยา. อพฺยากตํ จิตฺตสํสฏฺฐํ ธมฺมํ ปฏิจฺจ นกุสโล นจิตฺตสํสฏฺโฐ จ นอกุสโล นจิตฺตสํสฏฺโฐ จ ธมฺมา อุปฺปชฺชนฺติ เหตุปจฺจยา… ตีณิ. (สํขิตฺตํ.)
เหตุยา เตรส, อารมฺมเณ นว …เป… วิปาเก ตีณิ …เป… อวิคเต เตรส.