18.12 โลกิยทุก
ปญฺจนฺนํ ขนฺธานํ กติ โลกิยา, กติ โลกุตฺตรา? ทฺวาทสนฺนํ อายตนานํ กติ โลกิยา, กติ โลกุตฺตรา? อฏฺฐารสนฺนํ ธาตูนํ กติ โลกิยา, กติ โลกุตฺตรา? จตุนฺนํ สจฺจานํ กติ โลกิยา, กติ โลกุตฺตรา …เป… สตฺตนฺนํ จิตฺตานํ กติ โลกิยา, กติ โลกุตฺตรา?
รูปกฺขนฺโธ โลกิโย. จตฺตาโร ขนฺธา สิยา โลกิยา, สิยา โลกุตฺตรา. ทสายตนา โลกิยา. ทฺเว อายตนา สิยา โลกิยา, สิยา โลกุตฺตรา. โสฬส ธาตุโย โลกิยา. ทฺเว ธาตุโย สิยา โลกิยา, สิยา โลกุตฺตรา. ทฺเว สจฺจา โลกิยา. ทฺเว สจฺจา โลกุตฺตรา.
ทสินฺทฺริยา โลกิยา. ตีณินฺทฺริยา โลกุตฺตรา. นวินฺทฺริยา สิยา โลกิยา, สิยา โลกุตฺตรา. ตโย อกุสลเหตู โลกิยา. ฉ เหตู สิยา โลกิยา, สิยา โลกุตฺตรา. กพฬีกาโร อาหาโร โลกิโย. ตโย อาหารา สิยา โลกิยา, สิยา โลกุตฺตรา. ฉ ผสฺสา โลกิยา. มโนวิญฺญาณธาตุสมฺผโสฺส สิยา โลกิโย, สิยา โลกุตฺตโร. ฉ เวทนา โลกิยา. มโนวิญฺญาณธาตุสมฺผสฺสชา เวทนา สิยา โลกิยา, สิยา โลกุตฺตรา. ฉ สญฺญา โลกิยา. มโนวิญฺญาณธาตุสมฺผสฺสชา สญฺญา สิยา โลกิยา, สิยา โลกุตฺตรา. ฉ เจตนา โลกิยา. มโนวิญฺญาณธาตุสมฺผสฺสชา เจตนา สิยา โลกิยา, สิยา โลกุตฺตรา. ฉ จิตฺตา โลกิยา. มโนวิญฺญาณธาตุ สิยา โลกิยา, สิยา โลกุตฺตราติ.
อภิญฺญา ทฺเว สารมฺมณา,
ทิฏฺฐา กุสลเวทนา;
วิปากา จ อุปาทินฺนา,
วิตกฺกํ รูปโลกิยาติ.
ธมฺมหทยวิภงฺโค นิฏฺฐิโต.
วิภงฺคปกรณํ นิฏฺฐิตํ.