2.3.2.1 เหตุโคจฺฉก
เอกาทสายตนา น เหตู. ธมฺมายตนํ สิยา เหตุ, สิยา น เหตุ. ทสายตนา อเหตุกา. ทฺวายตนา สิยา สเหตุกา, สิยา อเหตุกา. ทสายตนา เหตุวิปฺปยุตฺตา. ทฺวายตนา สิยา เหตุสมฺปยุตฺตา, สิยา เหตุวิปฺปยุตฺตา. ทสายตนา น วตฺตพฺพา— “เหตู เจว สเหตุกา จา”ติปิ, “สเหตุกา เจว น จ เหตู”ติปิ. มนายตนํ น วตฺตพฺพํ— “เหตุ เจว สเหตุกญฺจา”ติ, สิยา สเหตุกญฺเจว น จ เหตุ, สิยา น วตฺตพฺพํ— “สเหตุกญฺเจว น จ เหตู”ติ. ธมฺมายตนํ สิยา เหตุ เจว สเหตุกญฺจ, สิยา สเหตุกญฺเจว น จ เหตุ, สิยา น วตฺตพฺพํ— “เหตุ เจว สเหตุกญฺจา”ติปิ, “สเหตุกญฺเจว น จ เหตู”ติปิ. ทสายตนา น วตฺตพฺพา— “เหตู เจว เหตุสมฺปยุตฺตา จา”ติปิ, “เหตุสมฺปยุตฺตา เจว น จ เหตู”ติปิ. มนายตนํ น วตฺตพฺพํ— “เหตุ เจว เหตุสมฺปยุตฺตญฺจา”ติ, สิยา เหตุสมฺปยุตฺตญฺเจว น จ เหตุ, สิยา น วตฺตพฺพํ— “เหตุสมฺปยุตฺตญฺเจว น จ เหตู”ติ. ธมฺมายตนํ สิยา เหตุ เจว เหตุสมฺปยุตฺตญฺจ, สิยา เหตุสมฺปยุตฺตญฺเจว น จ เหตุ, สิยา น วตฺตพฺพํ— “เหตุ เจว เหตุสมฺปยุตฺตญฺจา”ติปิ, “เหตุสมฺปยุตฺตญฺเจว น จ เหตู”ติปิ. ทสายตนา น เหตุอเหตุกา. มนายตนํ สิยา น เหตุสเหตุกํ, สิยา น เหตุอเหตุกํ. ธมฺมายตนํ สิยา น เหตุสเหตุกํ, สิยา น เหตุอเหตุกํ, สิยา น วตฺตพฺพํ— “น เหตุสเหตุกนฺ”ติปิ, “น เหตุอเหตุกนฺ”ติปิ.