3.39 สรีรธาตุวิภชน
อสฺโสสิ โข ราชา มาคโธ อชาตสตฺตุ เวเทหิปุตฺโต— “ภควา กิร กุสินารายํ ปรินิพฺพุโต”ติ. อถ โข ราชา มาคโธ อชาตสตฺตุ เวเทหิปุตฺโต โกสินารกานํ มลฺลานํ ทูตํ ปาเหสิ— “ภควาปิ ขตฺติโย อหมฺปิ ขตฺติโย, อหมฺปิ อรหามิ ภควโต สรีรานํ ภาคํ, อหมฺปิ ภควโต สรีรานํ ถูปญฺจ มหญฺจ กริสฺสามี”ติ.
อโสฺสสุํ โข เวสาลิกา ลิจฺฉวี— “ภควา กิร กุสินารายํ ปรินิพฺพุโต”ติ. อถ โข เวสาลิกา ลิจฺฉวี โกสินารกานํ มลฺลานํ ทูตํ ปาเหสุํ— “ภควาปิ ขตฺติโย มยมฺปิ ขตฺติยา, มยมฺปิ อรหาม ภควโต สรีรานํ ภาคํ, มยมฺปิ ภควโต สรีรานํ ถูปญฺจ มหญฺจ กริสฺสามา”ติ.
อโสฺสสุํ โข กปิลวตฺถุวาสี สกฺยา— “ภควา กิร กุสินารายํ ปรินิพฺพุโต”ติ. อถ โข กปิลวตฺถุวาสี สกฺยา โกสินารกานํ มลฺลานํ ทูตํ ปาเหสุํ— “ภควา อมฺหากํ ญาติเสฏฺโฐ, มยมฺปิ อรหาม ภควโต สรีรานํ ภาคํ, มยมฺปิ ภควโต สรีรานํ ถูปญฺจ มหญฺจ กริสฺสามา”ติ.
อโสฺสสุํ โข อลฺลกปฺปกา พุลโย— “ภควา กิร กุสินารายํ ปรินิพฺพุโต”ติ. อถ โข อลฺลกปฺปกา พุลโย โกสินารกานํ มลฺลานํ ทูตํ ปาเหสุํ— “ภควาปิ ขตฺติโย มยมฺปิ ขตฺติยา, มยมฺปิ อรหาม ภควโต สรีรานํ ภาคํ, มยมฺปิ ภควโต สรีรานํ ถูปญฺจ มหญฺจ กริสฺสามา”ติ.
อโสฺสสุํ โข รามคามกา โกฬิยา— “ภควา กิร กุสินารายํ ปรินิพฺพุโต”ติ. อถ โข รามคามกา โกฬิยา โกสินารกานํ มลฺลานํ ทูตํ ปาเหสุํ— “ภควาปิ ขตฺติโย มยมฺปิ ขตฺติยา, มยมฺปิ อรหาม ภควโต สรีรานํ ภาคํ, มยมฺปิ ภควโต สรีรานํ ถูปญฺจ มหญฺจ กริสฺสามา”ติ.
อสฺโสสิ โข เวฏฺฐทีปโก พฺราหฺมโณ— “ภควา กิร กุสินารายํ ปรินิพฺพุโต”ติ. อถ โข เวฏฺฐทีปโก พฺราหฺมโณ โกสินารกานํ มลฺลานํ ทูตํ ปาเหสิ— “ภควาปิ ขตฺติโย อหมฺปิสฺมิ พฺราหฺมโณ, อหมฺปิ อรหามิ ภควโต สรีรานํ ภาคํ, อหมฺปิ ภควโต สรีรานํ ถูปญฺจ มหญฺจ กริสฺสามี”ติ.
อโสฺสสุํ โข ปาเวยฺยกา มลฺลา— “ภควา กิร กุสินารายํ ปรินิพฺพุโต”ติ. อถ โข ปาเวยฺยกา มลฺลา โกสินารกานํ มลฺลานํ ทูตํ ปาเหสุํ— “ภควาปิ ขตฺติโย มยมฺปิ ขตฺติยา, มยมฺปิ อรหาม ภควโต สรีรานํ ภาคํ, มยมฺปิ ภควโต สรีรานํ ถูปญฺจ มหญฺจ กริสฺสามา”ติ.
เอวํ วุตฺเต, โกสินารกา มลฺลา เต สํเฆ คเณ เอตทโวจุํ— “ภควา อมฺหากํ คามกฺเขตฺเต ปรินิพฺพุโต, น มยํ ทสฺสาม ภควโต สรีรานํ ภาคนฺ”ติ.
เอวํ วุตฺเต, โทโณ พฺราหฺมโณ เต สํเฆ คเณ เอตทโวจ—
“สุณนฺตุ โภนฺโต มม เอกวาจํ,
อมฺหาก พุทฺโธ อหุ ขนฺติวาโท;
น หิ สาธุ ยํ อุตฺตมปุคฺคลสฺส,
สรีรภาเค สิยา สมฺปหาโร.
สพฺเพว โภนฺโต สหิตา สมคฺคา,
สมฺโมทมานา กโรมฏฺฐภาเค;
วิตฺถาริกา โหนฺตุ ทิสาสุ ถูปา,
พหู ชนา จกฺขุมโต ปสนฺนา”ติ.
“เตน หิ, พฺราหฺมณ, ตฺวญฺเญว ภควโต สรีรานิ อฏฺฐธา สมํ สวิภตฺตํ วิภชาหี”ติ. “เอวํ, โภ”ติ โข โทโณ พฺราหฺมโณ เตสํ สํฆานํ คณานํ ปฏิสฺสุตฺวา ภควโต สรีรานิ อฏฺฐธา สมํ สุวิภตฺตํ วิภชิตฺวา เต สํเฆ คเณ เอตทโวจ— “อิมํ เม โภนฺโต ตุมฺพํ ททนฺตุ อหมฺปิ ตุมฺพสฺส ถูปญฺจ มหญฺจ กริสฺสามี”ติ. อทํสุ โข เต โทณสฺส พฺราหฺมณสฺส ตุมฺพํ.
อโสฺสสุํ โข ปิปฺปลิวนิยา โมริยา— “ภควา กิร กุสินารายํ ปรินิพฺพุโต”ติ. อถ โข ปิปฺปลิวนิยา โมริยา โกสินารกานํ มลฺลานํ ทูตํ ปาเหสุํ— “ภควาปิ ขตฺติโย มยมฺปิ ขตฺติยา, มยมฺปิ อรหาม ภควโต สรีรานํ ภาคํ, มยมฺปิ ภควโต สรีรานํ ถูปญฺจ มหญฺจ กริสฺสามา”ติ. “นตฺถิ ภควโต สรีรานํ ภาโค, วิภตฺตานิ ภควโต สรีรานิ. อิโต องฺคารํ หรถา”ติ. เต ตโต องฺคารํ หริํสุ.