3.40 ธาตุถูปปูชา
อถ โข ราชา มาคโธ อชาตสตฺตุ เวเทหิปุตฺโต ราชคเห ภควโต สรีรานํ ถูปญฺจ มหญฺจ อกาสิ. เวสาลิกาปิ ลิจฺฉวี เวสาลิยํ ภควโต สรีรานํ ถูปญฺจ มหญฺจ อกํสุ. กปิลวตฺถุวาสีปิ สกฺยา กปิลวตฺถุสฺมิํ ภควโต สรีรานํ ถูปญฺจ มหญฺจ อกํสุ. อลฺลกปฺปกาปิ พุลโย อลฺลกปฺเป ภควโต สรีรานํ ถูปญฺจ มหญฺจ อกํสุ. รามคามกาปิ โกฬิยา รามคาเม ภควโต สรีรานํ ถูปญฺจ มหญฺจ อกํสุ. เวฏฺฐทีปโกปิ พฺราหฺมโณ เวฏฺฐทีเป ภควโต สรีรานํ ถูปญฺจ มหญฺจ อกาสิ. ปาเวยฺยกาปิ มลฺลา ปาวายํ ภควโต สรีรานํ ถูปญฺจ มหญฺจ อกํสุ. โกสินารกาปิ มลฺลา กุสินารายํ ภควโต สรีรานํ ถูปญฺจ มหญฺจ อกํสุ. โทโณปิ พฺราหฺมโณ ตุมฺพสฺส ถูปญฺจ มหญฺจ อกาสิ. ปิปฺปลิวนิยาปิ โมริยา ปิปฺปลิวเน องฺคารานํ ถูปญฺจ มหญฺจ อกํสุ. อิติ อฏฺฐ สรีรถูปา นวโม ตุมฺพถูโป ทสโม องฺคารถูโป. เอวเมตํ ภูตปุพฺพนฺติ.
อฏฺฐโทณํ จกฺขุมโต สรีรํ,
สตฺตโทณํ ชมฺพุทีเป มเหนฺติ;
เอกญฺจ โทณํ ปุริสวรุตฺตมสฺส,
รามคาเม นาคราชา มเหติ.
เอกาหิ ทาฐา ติทิเวหิ ปูชิตา,
เอกา ปน คนฺธารปุเร มหียติ;
กาลิงฺครญฺโญ วิชิเต ปุเนกํ,
เอกํ ปน นาคราชา มเหติ.
ตเสฺสว เตเชน อยํ วสุนฺธรา,
อายาคเสฏฺเฐหิ มหี อลงฺกตา;
เอวํ อิมํ จกฺขุมโต สรีรํ,
สุสกฺกตํ สกฺกตสกฺกเตหิ.
เทวินฺทนาคินฺทนรินฺทปูชิโต,
มนุสฺสินฺทเสฏฺเฐหิ ตเถว ปูชิโต;
ตํ วนฺทถ ปญฺชลิกา ลภิตฺวา,
พุทฺโธ หเว กปฺปสเตหิ ทุลฺลโภติ.
จตฺตาลีส สมา ทนฺตา,
เกสา โลมา จ สพฺพโส;
เทวา หริํสุ เอเกกํ,
จกฺกวาฬปรมฺปราติ.
มหาปรินิพฺพานสุตฺตํ นิฏฺฐิตํ ตติยํ.