7 มหาสมยสุตฺต
เอวํ เม สุตํ— เอกํ สมยํ ภควา สกฺเกสุ วิหรติ กปิลวตฺถุสฺมิํ มหาวเน มหตา ภิกฺขุสํเฆน สทฺธิํ ปญฺจมตฺเตหิ ภิกฺขุสเตหิ สพฺเพเหว อรหนฺเตหิ; ทสหิ จ โลกธาตูหิ เทวตา เยภุเยฺยน สนฺนิปติตา โหนฺติ ภควนฺตํ ทสฺสนาย ภิกฺขุสํฆญฺจ. อถ โข จตุนฺนํ สุทฺธาวาสกายิกานํ เทวตานํ เอตทโหสิ— “อยํ โข ภควา สกฺเกสุ วิหรติ กปิลวตฺถุสฺมิํ มหาวเน มหตา ภิกฺขุสํเฆน สทฺธิํ ปญฺจมตฺเตหิ ภิกฺขุสเตหิ สพฺเพเหว อรหนฺเตหิ; ทสหิ จ โลกธาตูหิ เทวตา เยภุเยฺยน สนฺนิปติตา โหนฺติ ภควนฺตํ ทสฺสนาย ภิกฺขุสํฆญฺจ. ยนฺนูน มยมฺปิ เยน ภควา เตนุปสงฺกเมยฺยาม; อุปสงฺกมิตฺวา ภควโต สนฺติเก ปจฺเจกํ คาถํ ภาเสยฺยามา”ติ.
อถ โข ตา เทวตา เสยฺยถาปิ นาม พลวา ปุริโส สมิญฺชิตํ วา พาหํ ปสาเรยฺย ปสาริตํ วา พาหํ สมิญฺเชยฺย; เอวเมว— สุทฺธาวาเสสุ เทเวสุ อนฺตรหิตา ภควโต ปุรโต ปาตุรเหสุํ. อถ โข ตา เทวตา ภควนฺตํ อภิวาเทตฺวา เอกมนฺตํ อฏฺฐํสุ. เอกมนฺตํ ฐิตา โข เอกา เทวตา ภควโต สนฺติเก อิมํ คาถํ อภาสิ—
“มหาสมโย ปวนสฺมิํ,
เทวกายา สมาคตา;
อาคตมฺห อิมํ ธมฺมสมยํ,
ทกฺขิตาเย อปราชิตสํฆนฺ”ติ.
อถ โข อปรา เทวตา ภควโต สนฺติเก อิมํ คาถํ อภาสิ—
“ตตฺร ภิกฺขโว สมาทหํสุ,
จิตฺตมตฺตโน อุชุกํ อกํสุ;
สารถีว เนตฺตานิ คเหตฺวา,
อินฺทฺริยานิ รกฺขนฺติ ปณฺฑิตา”ติ._
อถ โข อปรา เทวตา ภควโต สนฺติเก อิมํ คาถํ อภาสิ—
“เฉตฺวา ขีลํ เฉตฺวา ปลิฆํ,
อินฺทขีลํ อูหจฺจ มเนชา;_
เต จรนฺติ สุทฺธา วิมลา,
จกฺขุมตา สุทนฺตา สุสุนาคา”ติ.
อถ โข อปรา เทวตา ภควโต สนฺติเก อิมํ คาถํ อภาสิ—
“เย เกจิ พุทฺธํ สรณํ คตาเส,
น เต คมิสฺสนฺติ อปายภูมิํ;
ปหาย มานุสํ เทหํ,
เทวกายํ ปริปูเรสฺสนฺตี”ติ.