1.4 มหาโมคฺคลฺลานตฺเถรอปทาน
“อโนมทสฺสี ภควา,
โลกเชฏฺโฐ นราสโภ;
วิหาสิ หิมวนฺตมฺหิ,
เทวสงฺฆปุรกฺขโต.
วรุโณ นาม นาเมน,
นาคราชา อหํ ตทา;
กามรูปี วิกุพฺพามิ,
มโหทธินิวาสหํ.
สงฺคณิยํ คณํ หิตฺวา,
ตูริยํ ปฏฺฐเปสหํ;
สมฺพุทฺธํ ปริวาเรตฺวา,
วาเทสุํ อจฺฉรา ตทา.
วชฺชมาเนสุ ตูเรสุ,
เทวา ตูรานิ วชฺชยุํ;
อุภินฺนํ สทฺทํ สุตฺวาน,_
พุทฺโธปิ สมฺปพุชฺฌถ.
นิมนฺเตตฺวาน สมฺพุทฺธํ,
สกํ ภวนุปาคมิํ;
อาสนํ ปญฺญเปตฺวาน,
กาลมาโรจยิํ อหํ.
ขีณาสวสหเสฺสหิ,
ปริวุโต โลกนายโก;
โอภาเสนฺโต ทิสา สพฺพา,
ภวนํ เม อุปาคมิ.
อุปวิฏฺฐํ มหาวีรํ,_
เทวเทวํ นราสภํ;
สภิกฺขุสํฆํ ตปฺเปสิํ,
อนฺนปาเนนหํ ตทา.
อนุโมทิ มหาวีโร,
สยมฺภู อคฺคปุคฺคโล;
ภิกฺขุสํเฆ นิสีทิตฺวา,
อิมา คาถา อภาสถ._
โย โส สํฆํ อปูเชสิ,
พุทฺธญฺจ โลกนายกํ;
เตน จิตฺตปฺปสาเทน,
เทวโลกํ คมิสฺสติ.
สตฺตสตฺตติกฺขตฺตุญฺจ,
เทวรชฺชํ กริสฺสติ;
ปถพฺยา รชฺชํ อฏฺฐสตํ,
วสุธํ อาวสิสฺสติ.
ปญฺจปญฺญาสกฺขตฺตุญฺจ,
จกฺกวตฺตี ภวิสฺสติ;
โภคา อสงฺขิยา ตสฺส,
อุปฺปชฺชิสฺสนฺติ ตาวเท._
อปริเมเยฺย อิโต กปฺเป,
โอกฺกากกุลสมฺภโว;
โคตโม นาม โคตฺเตน,
สตฺถา โลเก ภวิสฺสติ.
นิรยา โส จวิตฺวาน,
มนุสฺสตํ คมิสฺสติ;
โกลิโต นาม นาเมน,
พฺรหฺมพนฺธุ ภวิสฺสติ.
โส ปจฺฉา ปพฺพชิตฺวาน,
กุสลมูเลน โจทิโต;
โคตมสฺส ภควโต,
ทุติโย เหสฺสติ สาวโก.
อารทฺธวีริโย ปหิตตฺโต,
อิทฺธิยา ปารมิํ คโต;_
สพฺพาสเว ปริญฺญาย,
นิพฺพายิสฺสตินาสโว.
ปาปมิตฺโตปนิสฺสาย,
กามราควสํ คโต;
มาตรํ ปิตรญฺจาปิ,
ฆาตยิํ ทุฏฺฐมานโส.
ยํ ยํ โยนุปปชฺชามิ,
นิรยํ อถ มานุสํ;
ปาปกมฺมสมงฺคิตา,
ภินฺนสีโส มรามหํ.
อิทํ ปจฺฉิมกํ มยฺหํ,_
จริโม วตฺตเต ภโว;
อิธาปิ เอทิโส มยฺหํ,_
มรณกาเล ภวิสฺสติ.
ปวิเวกมนุยุตฺโต,
สมาธิภาวนารโต;
สพฺพาสเว ปริญฺญาย,
วิหรามิ อนาสโว.
ธรณิมฺปิ สุคมฺภีรํ,
พหลํ ทุปฺปธํสิยํ;
วามงฺคุฏฺเฐน โขเภยฺยํ,
อิทฺธิยา ปารมิํ คโต._
อสฺมิมานํ น ปสฺสามิ,
มาโน มยฺหํ น วิชฺชติ;
สามเณเร อุปาทาย,
ครุจิตฺตํ กโรมหํ.
อปริเมเยฺย อิโต กปฺเป,
ยํ กมฺมมภินีหริํ;
ตาหํ ภูมิมนุปฺปตฺโต,
ปตฺโตมฺหิ อาสวกฺขยํ.
ปฏิสมฺภิทา จตโสฺส,
วิโมกฺขาปิ จ อฏฺฐิเม;
ฉฬภิญฺญา สจฺฉิกตา,
กตํ พุทฺธสฺส สาสนํ”.
อิตฺถํ สุทํ อายสฺมา มหาโมคฺคลฺลาโน เถโร อิมา คาถาโย อภาสิตฺถาติ.
มหาโมคฺคลฺลานตฺเถรสฺสาปทานํ ทุติยํ.