2.1 สีหาสนทายกตฺเถรอปทาน
“นิพฺพุเต โลกนาถมฺหิ,
สิทฺธตฺเถ ทฺวิปทุตฺตเม;
วิตฺถาริเก ปาวจเน,
พาหุชญฺญมฺหิ สาสเน.
ปสนฺนจิตฺโต สุมโน,
สีหาสนมกาสหํ;
สีหาสนํ กริตฺวาน,
ปาทปีฐมกาสหํ.
สีหาสเน จ วสฺสนฺเต,
ฆรํ ตตฺถ อกาสหํ;
เตน จิตฺตปฺปสาเทน,
ตุสิตํ อุปปชฺชหํ.
อายาเมน จตุพฺพีส-
โยชนํ อาสิ ตาวเท;
วิมานํ สุกตํ มยฺหํ,
วิตฺถาเรน จตุทฺทส.
สตํ กญฺญาสหสฺสานิ,
ปริวาเรนฺติ มํ สทา;
โสณฺณมยญฺจ ปลฺลงฺกํ,
พฺยเมฺห อาสิ สุนิมฺมิตํ.
หตฺถิยานํ อสฺสยานํ,
ทิพฺพยานํ อุปฏฺฐิตํ;
ปาสาทา สิวิกา เจว,
นิพฺพตฺตนฺติ ยทิจฺฉกํ.
มณิมยา จ ปลฺลงฺกา,
อญฺเญ สารมยา พหู;
นิพฺพตฺตนฺติ มมํ สพฺเพ,
สีหาสนสฺสิทํ ผลํ.
โสณฺณมยา รูปิมยา,
ผลิกาเวฬุริยามยา;
ปาทุกา อภิรูหามิ,
ปาทปีฐสฺสิทํ ผลํ.
จตุนฺนวุติโต กปฺเป,
ยํ กมฺมมกริํ ตทา;
ทุคฺคติํ นาภิชานามิ,
ปุญฺญกมฺมสฺสิทํ ผลํ.
เตสตฺตติมฺหิโต กปฺเป,
อินฺทนามา ตโย ชนา;_
ทฺเวสตฺตติมฺหิโต กปฺเป,
ตโย สุมนนามกา.
สมสตฺตติโต กปฺเป,
ตโย วรุณนามกา;
สตฺตรตนสมฺปนฺนา,
จตุทีปมฺหิ อิสฺสรา.
ปฏิสมฺภิทา จตโสฺส,
วิโมกฺขาปิ จ อฏฺฐิเม;
ฉฬภิญฺญา สจฺฉิกตา,
กตํ พุทฺธสฺส สาสนํ”.
อิตฺถํ สุทํ อายสฺมา สีหาสนทายโก เถโร อิมา คาถาโย อภาสิตฺถาติ.
สีหาสนทายกตฺเถรสฺสาปทานํ ปฐมํ.