2.2 เอกตฺถมฺภิกตฺเถรอปทาน
“สิทฺธตฺถสฺส ภควโต,
มหาปูคคโณ อหุ;
สรณํ คตา จ เต พุทฺธํ,
สทฺทหนฺติ ตถาคตํ.
สพฺเพ สงฺคมฺม มนฺเตตฺวา,
มาฬํ กุพฺพนฺติ สตฺถุโน;
เอกตฺถมฺภํ อลภนฺตา,
วิจินนฺติ พฺรหาวเน.
เตหํ อรญฺเญ ทิสฺวาน,
อุปคมฺม คณํ ตทา;_
อญฺชลิํ ปคฺคเหตฺวาน,
ปริปุจฺฉิํ คณํ อหํ.
เต เม ปุฏฺฐา วิยากํสุ,
สีลวนฺโต อุปาสกา;
มาฬํ มยํ กตฺตุกามา,
เอกตฺถมฺโภ น ลพฺภติ.
เอกตฺถมฺภํ มมํ เทถ,
อหํ ทสฺสามิ สตฺถุโน;
อาหริสฺสามหํ ถมฺภํ,
อปฺโปสฺสุกฺกา ภวนฺตุ เต.
เต เม ถมฺภํ ปเวจฺฉิํสุ,
ปสนฺนา ตุฏฺฐมานสา;
ตโต ปฏินิวตฺติตฺวา,
อคมํสุ สกํ ฆรํ.
อจิรํ คเต ปูคคเณ,
ถมฺภํ อหาสหํ ตทา;
หฏฺโฐ หฏฺเฐน จิตฺเตน,
ปฐมํ อุสฺสเปสหํ.
เตน จิตฺตปฺปสาเทน,
วิมานํ อุปปชฺชหํ;
อุพฺพิทฺธํ ภวนํ มยฺหํ,_
สตฺตภูมํ สมุคฺคตํ.
วชฺชมานาสุ เภรีสุ,
ปริจาเรมหํ สทา;
ปญฺจปญฺญาสกปฺปมฺหิ,
ราชา อาสิํ ยโสธโร.
ตตฺถาปิ ภวนํ มยฺหํ,
สตฺตภูมํ สมุคฺคตํ;
กูฏาคารวรูเปตํ,
เอกตฺถมฺภํ มโนรมํ.
เอกวีสติกปฺปมฺหิ,
อุเทโน นาม ขตฺติโย;_
ตตฺราปิ ภวนํ มยฺหํ,
สตฺตภูมํ สมุคฺคตํ.
ยํ ยํ โยนุปปชฺชามิ,
เทวตฺตํ อถ มานุสํ;
อนุโภมิ สุขํ สพฺพํ,
เอกตฺถมฺภสฺสิทํ ผลํ.
จตุนฺนวุติโต กปฺเป,
ยํ ถมฺภมททํ ตทา;
ทุคฺคติํ นาภิชานามิ,
เอกตฺถมฺภสฺสิทํ ผลํ.
ปฏิสมฺภิทา จตโสฺส,
วิโมกฺขาปิ จ อฏฺฐิเม;
ฉฬภิญฺญา สจฺฉิกตา,
กตํ พุทฺธสฺส สาสนํ”.
อิตฺถํ สุทํ อายสฺมา เอกตฺถมฺภิโก เถโร อิมา คาถาโย อภาสิตฺถาติ.
เอกตฺถมฺภิกตฺเถรสฺสาปทานํ ทุติยํ.