2.5 ปิลินฺทวจฺฉตฺเถรอปทาน
“นิพฺพุเต โลกนาถมฺหิ,
สุเมเธ อคฺคปุคฺคเล;
ปสนฺนจิตฺโต สุมโน,
ถูปปูชํ อกาสหํ.
เย จ ขีณาสวา ตตฺถ,
ฉฬภิญฺญา มหิทฺธิกา;
เตหํ ตตฺถ สมาเนตฺวา,
สํฆภตฺตํ อกาสหํ.
สุเมธสฺส ภควโต,
อุปฏฺฐาโก ตทา อหุ;_
สุเมโธ นาม นาเมน,
อนุโมทิตฺถ โส ตทา.
เตน จิตฺตปฺปสาเทน,
วิมานํ อุปปชฺชหํ;
ฉฬาสีติสหสฺสานิ,
อจฺฉราโย รมิํสุ เม.
มเมว อนุวตฺตนฺติ,
สพฺพกาเมหิ ตา สทา;
อญฺเญ เทเว อภิโภมิ,
ปุญฺญกมฺมสฺสิทํ ผลํ.
ปญฺจวีสติกปฺปมฺหิ,
วรุโณ นาม ขตฺติโย;
วิสุทฺธโภชโน อาสิํ,
จกฺกวตฺตี อหํ ตทา.
น เต พีชํ ปวปนฺติ,
นปิ นียนฺติ นงฺคลา;
อกฏฺฐปากิมํ สาลิํ,
ปริภุญฺชนฺติ มานุสา.
ตตฺถ รชฺชํ กริตฺวาน,
เทวตฺตํ ปุน คจฺฉหํ;
ตทาปิ เอทิสา มยฺหํ,
นิพฺพตฺตา โภคสมฺปทา.
น มํ มิตฺตา อมิตฺตา วา,
หิํสนฺติ สพฺพปาณิโน;
สพฺเพสมฺปิ ปิโย โหมิ,
ปุญฺญกมฺมสฺสิทํ ผลํ.
ติํสกปฺปสหสฺสมฺหิ,
ยํ ทานมททิํ ตทา;
ทุคฺคติํ นาภิชานามิ,
คนฺธาเลปสฺสิทํ ผลํ.
อิมสฺมิํ ภทฺทเก กปฺเป,_
เอโก อาสิํ ชนาธิโป;
มหานุภาโว ราชาหํ,
จกฺกวตฺตี มหพฺพโล.
โสหํ ปญฺจสุ สีเลสุ,
ฐเปตฺวา ชนตํ พหุํ;
ปาเปตฺวา สุคติํเยว,
เทวตานํ ปิโย อหุํ.
ปฏิสมฺภิทา จตโสฺส,
วิโมกฺขาปิ จ อฏฺฐิเม;
ฉฬภิญฺญา สจฺฉิกตา,
กตํ พุทฺธสฺส สาสนํ”.
อิตฺถํ สุทํ อายสฺมา ปิลินฺทวจฺโฉ เถโร อิมา คาถาโย อภาสิตฺถาติ.
ปิลินฺทวจฺฉตฺเถรสฺสาปทานํ ปญฺจมํ.