2.7 อุปเสนวงฺคนฺตปุตฺตตฺเถรอปทาน
“ปทุมุตฺตรํ ภควนฺตํ,
โลกเชฏฺฐํ นราสภํ;
ปพฺภารมฺหิ นิสีทนฺตํ,
อุปคจฺฉิํ นรุตฺตมํ._
กณิการปุปฺผํ ทิสฺวา,
วณฺเฏ เฉตฺวานหํ ตทา;
อลงฺกริตฺวา ฉตฺตมฺหิ,
พุทฺธสฺส อภิโรปยิํ.
ปิณฺฑปาตญฺจ ปาทาสิํ,
ปรมนฺนํ สุโภชนํ;
พุทฺเธน นวเม ตตฺถ,
สมเณ อฏฺฐ โภชยิํ.
อนุโมทิ มหาวีโร,
สยมฺภู อคฺคปุคฺคโล;
อิมินา ฉตฺตทาเนน,_
ปรมนฺนปเวจฺฉนา.
เตน จิตฺตปฺปสาเทน,
สมฺปตฺติมนุโภสฺสสิ;
ฉตฺติํสกฺขตฺตุํ เทวินฺโท,
เทวรชฺชํ กริสฺสติ.
เอกวีสติกฺขตฺตุญฺจ,
จกฺกวตฺตี ภวิสฺสติ;
ปเทสรชฺชํ วิปุลํ,
คณนาโต อสงฺขิยํ.
สตสหสฺสิโต กปฺเป,
โอกฺกากกุลสมฺภโว;
โคตโม นาม โคตฺเตน,
สตฺถา โลเก ภวิสฺสติ.
สาสเน ทิพฺพมานมฺหิ,
มนุสฺสตฺตํ คมิสฺสติ;
ตสฺส ธมฺเมสุ ทายาโท,
โอรโส ธมฺมนิมฺมิโต.
อุปเสโนติ นาเมน,_
เหสฺสติ สตฺถุ สาวโก;
สมนฺตปาสาทิกตฺตา,
อคฺคฏฺฐาเน ฐเปสฺสติ.
จริมํ วตฺตเต มยฺหํ,
ภวา สพฺเพ สมูหตา;
ธาเรมิ อนฺติมํ เทหํ,
เชตฺวา มารํ สวาหินิํ.
ปฏิสมฺภิทา จตโสฺส,
วิโมกฺขาปิ จ อฏฺฐิเม;
ฉฬภิญฺญา สจฺฉิกตา,
กตํ พุทฺธสฺส สาสนํ”.
อิตฺถํ สุทํ อายสฺมา อุปเสโน วงฺคนฺตปุตฺโต เถโร อิมา คาถาโย อภาสิตฺถาติ.
อุปเสนวงฺคนฺตปุตฺตตฺเถรสฺสาปทานํ สตฺตมํ.
ตติยภาณวารํ.