3.3 ติสรณคมนิยตฺเถรอปทาน
“นคเร จนฺทวติยา,
มาตุอุปฏฺฐาโก อหุํ;
อนฺธา มาตา ปิตา มยฺหํ,
เต โปเสมิ อหํ ตทา.
รโหคโต นิสีทิตฺวา,
เอวํ จินฺเตสหํ ตทา;
โปเสนฺโต มาตาปิตโร,
ปพฺพชฺชํ น ลภามหํ.
มหนฺธการปิหิตา,
ติวิธคฺคีหิ ฑยฺหเร;
เอตาทิเส ภเว ชาเต,
นตฺถิ โกจิ วินายโก.
พุทฺโธ โลเก สมุปฺปนฺโน,
ทิปฺปติ ทานิ สาสนํ;
สกฺกา อุทฺธริตุํ อตฺตา,
ปุญฺญกาเมน ชนฺตุนา.
อุคฺคยฺห ตีณิ สรเณ,_
ปริปุณฺณานิ โคปยิํ;
เตน กมฺเมน สุกเตน,
ปฏิโมกฺขามิ ทุคฺคติํ.
นิสโภ นาม สมโณ,
พุทฺธสฺส อคฺคสาวโก;
ตมหํ อุปคนฺตฺวาน,
สรณคมนํ คหิํ.
วสฺสสตสหสฺสานิ,
อายุ วิชฺชติ ตาวเท;
ตาวตา สรณคมนํ,
ปริปุณฺณํ อโคปยิํ.
จริเม วตฺตมานมฺหิ,
สรณํ ตํ อนุสฺสริํ;
เตน กมฺเมน สุกเตน,
ตาวติํสํ อคจฺฉหํ.
เทวโลกคโต สนฺโต,
ปุญฺญกมฺมสมาหิโต;
ยํ เทสํ อุปปชฺชามิ,
อฏฺฐ เหตู ลภามหํ.
ทิสาสุ ปูชิโต โหมิ,
ติกฺขปญฺโญ ภวามหํ;
สพฺเพ เทวานุวตฺตนฺติ,
อมิตโภคํ ลภามหํ.
สุวณฺณวณฺโณ สพฺพตฺถ,
ปฏิกนฺโต ภวามหํ;
มิตฺตานํ อจโล โหมิ,
ยโส อพฺภุคฺคโต มมํ.
อสีติกฺขตฺตุ เทวินฺโท,
เทวรชฺชมการยิํ;
ทิพฺพสุขํ อนุภวิํ,
อจฺฉราหิ ปุรกฺขโต.
ปญฺจสตฺตติกฺขตฺตุญฺจ,
จกฺกวตฺตี อโหสหํ;
ปเทสรชฺชํ วิปุลํ,
คณนาโต อสงฺขิยํ.
ปจฺฉิเม ภเว สมฺปตฺเต,
ปุญฺญกมฺมสมาหิโต;
ปุเร สาวตฺถิยํ ชาโต,
มหาสาเล สุอฑฺฒเก.
นครา นิกฺขมิตฺวาน,
ทารเกหิ ปุรกฺขโต;
หสขิฑฺฑสมงฺคีหํ,
สํฆารามํ อุปาคมิํ.
ตตฺถทฺทสาสิํ สมณํ,
วิปฺปมุตฺตํ นิรูปธิํ;
โส เม ธมฺมมเทเสสิ,
สรณญฺจ อทาสิ เม.
โสหํ สุตฺวาน สรณํ,
สรณํ เม อนุสฺสริํ;
เอกาสเน นิสีทิตฺวา,
อรหตฺตมปาปุณิํ.
ชาติยา สตฺตเม วเสฺส,
อรหตฺตมปาปุณิํ;
อุปสมฺปาทยิ พุทฺโธ,_
คุณมญฺญาย จกฺขุมา.
อปริเมเยฺย อิโต กปฺเป,
สรณานิ อคจฺฉหํ;
ตโต เม สุกตํ กมฺมํ,
ผลํ ทเสฺสสิ เม อิธ.
สุโคปิตํ เม สรณํ,
มานสํ สุปฺปณีหิตํ;
อนุโภตฺวา ยสํ สพฺพํ,
ปตฺโตมฺหิ อจลํ ปทํ.
เยสํ โสตาวธานตฺถิ,
สุโณถ มม ภาสโต;
อหํ โว กถยิสฺสามิ,
สามํ ทิฏฺฐํ ปทํ มม.
‘พุทฺโธ โลเก สมุปฺปนฺโน,
วตฺตเต ชินสาสนํ;
อมตา วาทิตา เภรี,
โสกสลฺลวิโนทนา.
ยถาสเกน ถาเมน,
ปุญฺญกฺเขตฺเต อนุตฺตเร;
อธิการํ กเรยฺยาถ,
ปสฺสยิสฺสถ นิพฺพุติํ.
ปคฺคยฺห ตีณิ สรเณ,
ปญฺจสีลานิ โคปิย;
พุทฺเธ จิตฺตํ ปสาเทตฺวา,
ทุกฺขสฺสนฺตํ กริสฺสถ.
สมฺมา ธมฺมํ ภาเวตฺวาน,
สีลานิ ปริโคปิย;
อจิรํ อรหตฺตํ โว,
สพฺเพปิ ปาปุณิสฺสถ.
เตวิชฺโช อิทฺธิปตฺโตมฺหิ,
เจโตปริยโกวิโท;
สาวโก เต มหาวีร,
สรโณ วนฺทติ สตฺถุโน’.
อปริเมเยฺย อิโต กปฺเป,
สรณํ พุทฺธสฺส คจฺฉหํ;
ทุคฺคติํ นาภิชานามิ,
สรณํ คมเน ผลํ.
ปฏิสมฺภิทา จตโสฺส,
วิโมกฺขาปิ จ อฏฺฐิเม;
ฉฬภิญฺญา สจฺฉิกตา,
กตํ พุทฺธสฺส สาสนํ”.
อิตฺถํ สุทํ อายสฺมา ติสรณคมนิโย เถโร อิมา คาถาโย อภาสิตฺถาติ.
ติสรณคมนิยตฺเถรสฺสาปทานํ ตติยํ.