3.4 ปญฺจสีลสมาทานิยตฺเถรอปทาน
“นคเร จนฺทวติยา,
ภตโก อาสหํ ตทา;
ปรกมฺมายเน ยุตฺโต,
ปพฺพชฺชํ น ลภามหํ.
มหนฺธการปิหิตา,
ติวิธคฺคีหิ ฑยฺหเร;
เกน นุ โข อุปาเยน,
วิสํยุตฺโต ภเว อหํ.
เทยฺยธมฺโม จ เม นตฺถิ,
วราโก ภตโก อหํ;
ยนฺนูนาหํ ปญฺจสีลํ,
รกฺเขยฺยํ ปริปูรยํ.
อโนมทสฺสิสฺส มุนิโน,
นิสโภ นาม สาวโก;
ตมหํ อุปสงฺกมฺม,
ปญฺจสิกฺขาปทคฺคหิํ.
วสฺสสตสหสฺสานิ,
อายุ วิชฺชติ ตาวเท;
ตาวตา ปญฺจสีลานิ,
ปริปุณฺณานิ โคปยิํ.
มจฺจุกาเล จ สมฺปตฺเต,
เทวา อสฺสาสยนฺติ มํ;
‘รโถ สหสฺสยุตฺโต เต,
มาริสายํ อุปฏฺฐิโต’.
วตฺตนฺเต จริเม จิตฺเต,
มม สีลํ อนุสฺสริํ;
เตน กมฺเมน สุกเตน,
ตาวติํสํ อคจฺฉหํ.
ติํสกฺขตฺตุญฺจ เทวินฺโท,
เทวรชฺชมการยิํ;
ทิพฺพสุขํ อนุภวิํ,
อจฺฉราหิ ปุรกฺขโต.
ปญฺจสตฺตติกฺขตฺตุญฺจ,
จกฺกวตฺตี อโหสหํ;
ปเทสรชฺชํ วิปุลํ,
คณนาโต อสงฺขิยํ.
เทวโลกา จวิตฺวาน,
สุกฺกมูเลน โจทิโต;
ปุเร เวสาลิยํ ชาโต,
มหาสาเล สุอฑฺฒเก.
วสฺสูปนายิเก กาเล,
ทิปฺปนฺเต ชินสาสเน;
มาตา จ เม ปิตา เจว,
ปญฺจสิกฺขาปทคฺคหุํ.
สห สุตฺวานหํ สีลํ,
มม สีลํ อนุสฺสริํ;
เอกาสเน นิสีทิตฺวา,
อรหตฺตมปาปุณิํ.
ชาติยา ปญฺจวเสฺสน ,
อรหตฺตมปาปุณิํ;
อุปสมฺปาทยิ พุทฺโธ,_
คุณมญฺญาย จกฺขุมา.
ปริปุณฺณานิ โคเปตฺวา,
ปญฺจสิกฺขาปทานหํ;
อปริเมเยฺย อิโต กปฺเป,
วินิปาตํ น คจฺฉหํ.
สฺวาหํ ยสมนุภวิํ,
เตสํ สีลาน วาหสา;
กปฺปโกฏิมฺปิ กิตฺเตนฺโต,
กิตฺตเย เอกเทสกํ.
ปญฺจ สีลานิ โคเปตฺวา,
ตโย เหตู ลภามหํ;
ทีฆายุโก มหาโภโค,
ติกฺขปญฺโญ ภวามหํ.
สงฺกิตฺเตนฺโต จ สพฺเพสํ,
อธิมตฺตญฺจ โปริสํ;
ภวาภเว สํสริตฺวา,
เอเต ฐาเน ลภามหํ.
อปริเมยฺยสีเลสุ,
วตฺตนฺตา ชินสาวกา;
ภเวสุ ยทิ รชฺเชยฺยุํ,
วิปาโก กีทิโส ภเว.
สุจิณฺณํ เม ปญฺจสีลํ,
ภตเกน ตปสฺสินา;
เตน สีเลนหํ อชฺช,
โมจยิํ สพฺพพนฺธนา.
อปริเมเยฺย อิโต กปฺเป,
ปญฺจ สีลานิ โคปยิํ;
ทุคฺคติํ นาภิชานามิ,
ปญฺจสีลานิทํ ผลํ.
ปฏิสมฺภิทา จตโสฺส,
วิโมกฺขาปิ จ อฏฺฐิเม;
ฉฬภิญฺญา สจฺฉิกตา,
กตํ พุทฺธสฺส สาสนํ”.
อิตฺถํ สุทํ อายสฺมา ปญฺจสีลสมาทานิโย เถโร อิมา คาถาโย อภาสิตฺถาติ.
ปญฺจสีลสมาทานิยตฺเถรสฺสาปทานํ จตุตฺถํ.