3.5 อนฺนสํสาวกตฺเถรอปทาน
155.
1022
“สุวณฺณวณฺณํ สมฺพุทฺธํ,
คจฺฉนฺตํ อนฺตราปเณ;
กญฺจนคฺฆิยสํกาสํ,
พาตฺติํสวรลกฺขณํ.
156.
1023
สิทฺธตฺถํ โลกปชฺโชตํ,
อปฺปเมยฺยํ อโนปมํ;
อลตฺถํ ปรมํ ปีติํ,
ทิสฺวา ทนฺตํ ชุตินฺธรํ.
157.
1024
สมฺพุทฺธํ อภินาเมตฺวา,
โภชยิํ ตํ มหามุนิํ;
มหาการุณิโก โลเก,
อนุโมทิ มมํ ตทา.
158.
1025
ตสฺมิํ มหาการุณิเก,
ปรมสฺสาสการเก;
พุทฺเธ จิตฺตํ ปสาเทตฺวา,
กปฺปํ สคฺคมฺหิ โมทหํ.
159.
1026
จตุนฺนวุติโต กปฺเป,
ยํ ทานมททิํ ตทา;
ทุคฺคติํ นาภิชานามิ,
ภิกฺขาทานสฺสิทํ ผลํ.
160.
1027
ปฏิสมฺภิทา จตโสฺส,
วิโมกฺขาปิ จ อฏฺฐิเม;
ฉฬภิญฺญา สจฺฉิกตา,
กตํ พุทฺธสฺส สาสนํ”.
1028
อิตฺถํ สุทํ อายสฺมา อนฺนสํสาวโก เถโร อิมา คาถาโย อภาสิตฺถาติ.
1029
อนฺนสํสาวกตฺเถรสฺสาปทานํ ปญฺจมํ.