33.10 สปริวารฉตฺตทายกตฺเถรอปทาน
“ปทุมุตฺตโร โลกวิทู,
อาหุตีนํ ปฏิคฺคโห;
อากาเส ชลวุฏฺฐีว,
วสฺสเต ธมฺมวุฏฺฐิยา.
ตมทฺทสาสิํ สมฺพุทฺธํ,
เทเสนฺตํ อมตํ ปทํ;
สกํ จิตฺตํ ปสาเทตฺวา,
อคมาสิํ สกํ ฆรํ.
ฉตฺตํ อลงฺกตํ คยฺห,
อุปคจฺฉิํ นรุตฺตมํ;_
หฏฺโฐ หฏฺเฐน จิตฺเตน,
อากาเส อุกฺขิปิํ อหํ.
สุสงฺคหิตยานํว,
ทนฺโตว สาวกุตฺตโม;
อุปคนฺตฺวาน สมฺพุทฺธํ,_
มตฺถเก สมฺปติฏฺฐหิ.
อนุกมฺปโก การุณิโก,
พุทฺโธ โลกคฺคนายโก;
ภิกฺขุสํเฆ นิสีทิตฺวา,
อิมา คาถา อภาสถ._
‘เยน ฉตฺตมิทํ ทินฺนํ,
อลงฺกตํ มโนรมํ;
เตน จิตฺตปฺปสาเทน,
ทุคฺคติํ โส น คจฺฉติ.
สตฺตกฺขตฺตุญฺจ เทเวสุ,
เทวรชฺชํ กริสฺสติ;
พาตฺติํสกฺขตฺตุญฺจ ราชา,
จกฺกวตฺตี ภวิสฺสติ.
กปฺปสตสหสฺสมฺหิ,
โอกฺกากกุลสมฺภโว;
โคตโม นาม โคตฺเตน,
สตฺถา โลเก ภวิสฺสติ.
ตสฺส ธมฺเมสุ ทายาโท,
โอรโส ธมฺมนิมฺมิโต;
สพฺพาสเว ปริญฺญาย,
นิพฺพายิสฺสตินาสโว’.
พุทฺธสฺส คิรมญฺญาย,
วาจาสภิมุทีริตํ;
ปสนฺนจิตฺโต สุมโน,
ภิโยฺย หาสํ ชเนสหํ.
ชหิตฺวา มานุสํ โยนิํ,
ทิพฺพํ โยนิํ สมชฺฌคํ;
วิมานมุตฺตมํ มยฺหํ,
อพฺภุคฺคตํ มโนรมํ.
วิมานา นิกฺขมนฺตสฺส,
เสตจฺฉตฺตํ ธรียติ;
ตทา สญฺญํ ปฏิลภิํ,
ปุพฺพกมฺมสฺสิทํ ผลํ.
เทวโลกา จวิตฺวาน,
มนุสฺสตฺตญฺจ อาคมิํ;
ฉตฺติํสกฺขตฺตุํ จกฺกวตฺตี,
สตฺตกปฺปสตมฺหิโต.
ตมฺหา กายา จวิตฺวาน,
อาคจฺฉิํ ติทสํ ปุรํ;
สํสริตฺวานุปุพฺเพน,
มานุสํ ปุนราคมิํ.
โอกฺกนฺตํ มาตุกุจฺฉิํ มํ,
เสตจฺฉตฺตํ อธารยุํ;
ชาติยา สตฺตวโสฺสหํ,
ปพฺพชิํ อนคาริยํ.
สุนนฺโท นาม นาเมน,
พฺราหฺมโณ มนฺตปารคู;
ผลิกํ ฉตฺตมาทาย,
สาวกคฺคสฺส โส ตทา.
อนุโมทิ มหาวีโร,
สาริปุตฺโต มหากถี;
สุตฺวานุโมทนํ ตสฺส,
ปุพฺพกมฺมมนุสฺสริํ.
อญฺชลิํ ปคฺคเหตฺวาน,
สกํ จิตฺตํ ปสาทยิํ;
สริตฺวา ปุริมํ กมฺมํ,
อรหตฺตมปาปุณิํ.
อุฏฺฐาย อาสนา ตมฺหา,_
สิเร กตฺวาน อญฺชลิํ;
สมฺพุทฺธํ อภิวาเทตฺวา,
อิมํ วาจํ อุทีรยิํ._
สตสหสฺสิโต กปฺเป,
พุทฺโธ โลเก อนุตฺตโร;
ปทุมุตฺตโร โลกวิทู,
อาหุตีนํ ปฏิคฺคโห.
ตสฺส ฉตฺตํ มยา ทินฺนํ,
วิจิตฺตํ สมลงฺกตํ;
อุโภ หตฺเถหิ ปคฺคณฺหิ,_
สยมฺภู อคฺคปุคฺคโล.
อโห พุทฺธา อโห ธมฺมา,
อโห โน สตฺถุสมฺปทา;
เอกจฺฉตฺตสฺส ทาเนน,
ทุคฺคติํ นุปปชฺชหํ.
กิเลสา ฌาปิตา มยฺหํ,
ภวา สพฺเพ สมูหตา;
สพฺพาสเว ปริญฺญาย,
วิหรามิ อนาสโว.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”. (2925)
อิตฺถํ สุทํ อายสฺมา สปริวารฉตฺตทายโก เถโร อิมา คาถาโย อภาสิตฺถาติ.
สปริวารฉตฺตทายกตฺเถรสฺสาปทานํ ทสมํ.
อุมาปุปฺผิยวคฺโค เตตฺติํสติโม.
ตสฺสุทฺทานํ
อุมาปุปฺผญฺจ ปุลินํ,_
หาโส ยญฺโญ นิมิตฺตโก;
สํสาวโก นิคฺคุณฺฑี จ,
สุมนํ ปุปฺผฉตฺตโก;
สปริวารฉตฺโต จ,
คาถา สตฺตสตุตฺตราติ.