34.10 อุกฺขิตฺตปทุมิยตฺเถรอปทาน
“นคเร หํสวติยา,
อโหสิํ มาลิโก ตทา;
โอคาเหตฺวา ปทุมสรํ,
สตปตฺตํ โอจินามหํ.
ปทุมุตฺตโร นาม ชิโน,
สพฺพธมฺมาน ปารคู;
สห สตสหเสฺสหิ,
สนฺตจิตฺเตหิ ตาทิภิ.
ขีณาสเวหิ สุทฺเธหิ,
ฉฬภิญฺเญหิ ฌายิภิ;
มม วุทฺธิํ สมเนฺวสํ,
อาคจฺฉิ มม สนฺติกํ.
ทิสฺวานหํ เทวเทวํ,
สยมฺภุํ โลกนายกํ;
วณฺเฏ เฉตฺวา สตปตฺตํ,
อุกฺขิปิมมฺพเร ตทา._
ยทิ พุทฺโธ ตุวํ วีร,
โลกเชฏฺโฐ นราสโภ;
สยํ คนฺตฺวา สตปตฺตา,
มตฺถเก ธารยนฺตุ เต.
อธิฏฺฐหิ มหาวีโร,
โลกเชฏฺโฐ นราสโภ;
พุทฺธสฺส อานุภาเวน,
มตฺถเก ธารยิํสุ เต.
เตน กมฺเมน สุกเตน,
เจตนาปณิธีหิ จ;
ชหิตฺวา มานุสํ เทหํ,
ตาวติํสมคจฺฉหํ.
ตตฺถ เม สุกตํ พฺยมฺหํ,
สตปตฺตนฺติ วุจฺจติ;
สฏฺฐิโยชนมุพฺพิทฺธํ,
ติํสโยชนวิตฺถตํ.
สหสฺสกฺขตฺตุํ เทวินฺโท,
เทวรชฺชมการยิํ;
ปญฺจสตฺตติกฺขตฺตุญฺจ,
จกฺกวตฺตี อโหสหํ.
ปเทสรชฺชํ วิปุลํ,
คณนาโต อสงฺขิยํ;
อนุโภมิ สกํ กมฺมํ,
ปุพฺเพ สุกตมตฺตโน.
เตเนเวกปทุเมน,
อนุโภตฺวาน สมฺปทา;
โคตมสฺส ภควโต,
ธมฺมํ สจฺฉิกริํ อหํ.
กิเลสา ฌาปิตา มยฺหํ,
ภวา สพฺเพ สมูหตา;
นาโคว พนฺธนํ เฉตฺวา,
วิหรามิ อนาสโว.
สตสหสฺสิโต กปฺเป,
ยํ ปุปฺผมภิปูชยิํ;
ทุคฺคติํ นาภิชานามิ,
เอกปทุมสฺสิทํ ผลํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”. (3067)
อิตฺถํ สุทํ อายสฺมา อุกฺขิตฺตปทุมิโย เถโร อิมา คาถาโย อภาสิตฺถาติ.
อุกฺขิตฺตปทุมิยตฺเถรสฺสาปทานํ ทสมํ.
คนฺโธทกวคฺโค จตุติํสติโม.
ตสฺสุทฺทานํ
คนฺธธูโป อุทกญฺจ,
ปุนฺนาค เอกทุสฺสกา;
ผุสิโต จ ปภงฺกโร,
กุฏิโท อุตฺตรียโก.
สวนี เอกปทุมี,
คาถาโย สพฺพปิณฺฑิตา;
เอกํ คาถาสตญฺเจว,
จตุตาลีสเมว จ.