34.5 ผุสิตกมฺปิยตฺเถรอปทาน
“วิปสฺสี นาม สมฺพุทฺโธ,
โลกเชฏฺโฐ นราสโภ;
ขีณาสเวหิ สหิโต,
สํฆาราเม วสี ตทา.
อารามทฺวารา นิกฺขมฺม,
วิปสฺสี โลกนายโก;
สห สตสหเสฺสหิ,
อฏฺฐ ขีณาสเวหิ โส.
อชิเนน นิวตฺโถหํ,
วากจีรธโรปิ จ;
กุสุโมทกมาทาย,
สมฺพุทฺธํ อุปสงฺกมิํ.
สกํ จิตฺตํ ปสาเทตฺวา,
เวทชาโต กตญฺชลี;
กุสุโมทกมาทาย,
พุทฺธมพฺภุกฺกิริํ อหํ.
เตน กมฺเมน สมฺพุทฺโธ,
ชลชุตฺตมนามโก;
มม กมฺมํ ปกิตฺเตตฺวา,
อคมา เยน ปตฺถิตํ.
ผุสิตา ปญฺจสหสฺสา,
เยหิ ปูเชสหํ ชินํ;
อฑฺฒเตยฺยสหเสฺสหิ,
เทวรชฺชํ อการยิํ.
อฑฺฒเตยฺยสหเสฺสหิ,
จกฺกวตฺตี อโหสหํ;
อวเสเสน กมฺเมน,
อรหตฺตมปาปุณิํ.
เทวราชา ยทา โหมิ,
มนุชาธิปตี ยทา;
ตเมว นามเธยฺยํ เม,
ผุสิโต นาม โหมหํ.
เทวภูตสฺส สนฺตสฺส,
อถาปิ มานุสสฺส วา;
สมนฺตา พฺยามโต มยฺหํ,
ผุสิตํว ปวสฺสติ.
ภวา อุคฺฆาฏิตา มยฺหํ,
กิเลสา ฌาปิตา มม;
สพฺพาสวปริกฺขีโณ,
ผุสิตสฺส อิทํ ผลํ.
จนฺทนเสฺสว เม กายา,
ตถา คนฺโธ ปวายติ;
สรีรโต มม คนฺโธ,
อฑฺฒโกเส ปวายติ.
ทิพฺพคนฺธํ สมฺปวนฺตํ,
ปุญฺญกมฺมสมงฺคินํ;
คนฺธํ ฆตฺวาน ชานนฺติ,
ผุสิโต อาคโต อิธ.
สาขาปลาสกฏฺฐานิ,
ติณานิปิ จ สพฺพโส;
มม สงฺกปฺปมญฺญาย,
คนฺโธ สมฺปชฺชเต ขเณ.
สตสหสฺสิโต กปฺเป,
จนฺทนํ อภิปูชยิํ;
ทุคฺคติํ นาภิชานามิ,
ผุสิตสฺส อิทํ ผลํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา ผุสิตกมฺปิโย เถโร อิมา คาถาโย อภาสิตฺถาติ.
ผุสิตกมฺปิยตฺเถรสฺสาปทานํ ปญฺจมํ.