34.6 ปภงฺกรตฺเถรอปทาน
“ปทุมุตฺตรภควโต,
โลกเชฏฺฐสฺส ตาทิโน;
วิปิเน เจติยํ อาสิ,
วาฬมิคสมากุเล.
น โกจิ วิสหิ คนฺตุํ,
เจติยํ อภิวนฺทิตุํ;
ติณกฏฺฐลโตนทฺธํ,
ปลุคฺคํ อาสิ เจติยํ.
วนกมฺมิโก ตทา อาสิํ,
ปิตุมาตุมเตนหํ;
อทฺทสํ วิปิเน ถูปํ,
ลุคฺคํ ติณลตากุลํ.
ทิสฺวานาหํ พุทฺธถูปํ,
ครุจิตฺตํ อุปฏฺฐหิํ;
พุทฺธเสฏฺฐสฺส ถูโปยํ,
ปลุคฺโค อจฺฉตี วเน.
นจฺฉนฺนํ นปฺปติรูปํ,
ชานนฺตสฺส คุณาคุณํ;
พุทฺธถูปํ อโสเธตฺวา,
อญฺญํ กมฺมํ ปโยชเย.
ติณกฏฺฐญฺจ วลฺลิญฺจ,
โสธยิตฺวาน เจติเย;
วนฺทิตฺวา อฏฺฐ วารานิ,
ปฏิกุฏิโก อคจฺฉหํ.
เตน กมฺเมน สุกเตน,
เจตนาปณิธีหิ จ;
ชหิตฺวา มานุสํ เทหํ,
ตาวติํสมคจฺฉหํ.
ตตฺถ เม สุกตํ พฺยมฺหํ,
โสวณฺณํ สปภสฺสรํ;
สฏฺฐิโยชนมุพฺพิทฺธํ,
ติํสโยชนวิตฺถตํ.
ติสตานิ จ วารานิ,
เทวรชฺชมการยิํ;
ปญฺจวีสติกฺขตฺตุญฺจ,
จกฺกวตฺตี อโหสหํ.
ภวาภเว สํสรนฺโต,
มหาโภคํ ลภามหํ;
โภเค เม อูนตา นตฺถิ,
โสธนาย อิทํ ผลํ.
สิวิกา หตฺถิขนฺเธน,
วิปิเน คจฺฉโต มม;
ยํ ยํ ทิสาหํ คจฺฉามิ,
สรณํ สมฺปเต วนํ.
ขาณุํ วา กณฺฏกํ วาปิ,
นาหํ ปสฺสามิ จกฺขุนา;
ปุญฺญกมฺเมน สํยุตฺโต,
สยเมวาปนียเร.
กุฏฺฐํ คณฺโฑ กิลาโส จ,
อปมาโร วิตจฺฉิกา;
ททฺทุ กจฺฉุ จ เม นตฺถิ,
โสธนาย อิทํ ผลํ.
อญฺญมฺปิ เม อจฺฉริยํ,
พุทฺธถูปสฺส โสธเน;
นาภิชานามิ เม กาเย,
ชาตํ ปิฬกพินฺทุกํ.
อญฺญมฺปิ เม อจฺฉริยํ,
พุทฺธถูปมฺหิ โสธิเต;
ทุเว ภเว สํสรามิ,
เทวตฺเต อถ มานุเส.
อญฺญมฺปิ เม อจฺฉริยํ,
พุทฺธถูปมฺหิ โสธิเต;
สุวณฺณวณฺโณ สพฺพตฺถ,
สปฺปภาโส ภวามหํ.
อญฺญมฺปิ เม อจฺฉริยํ,
พุทฺธถูปมฺหิ โสธิเต;
อมนาปํ วิวชฺชติ,
มนาปํ อุปติฏฺฐติ.
อญฺญมฺปิ เม อจฺฉริยํ,
พุทฺธถูปมฺหิ โสธิเต;
วิสุทฺธํ โหติ เม จิตฺตํ,
เอกคฺคํ สุสมาหิตํ.
อญฺญมฺปิ เม อจฺฉริยํ,
พุทฺธถูปมฺหิ โสธิเต;
เอกาสเน นิสีทิตฺวา,
อรหตฺตมปาปุณิํ.
สตสหสฺสิโต กปฺเป,
ยํ กมฺมมกริํ ตทา;
ทุคฺคติํ นาภิชานามิ,
โสธนาย อิทํ ผลํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา ปภงฺกโร เถโร อิมา คาถาโย อภาสิตฺถาติ.
ปภงฺกรตฺเถรสฺสาปทานํ ฉฏฺฐํ.