34.8 อุตฺตเรยฺยทายกตฺเถรอปทาน
“นคเร หํสวติยา,
อโหสิํ พฺราหฺมโณ ตทา;
อชฺฌายโก มนฺตธโร,
ติณฺณํ เวทาน ปารคู.
ปุรกฺขโต สสิเสฺสหิ,
ชาติมา จ สุสิกฺขิโต;
โตยาภิเสจนตฺถาย,
นครา นิกฺขมิํ ตทา.
ปทุมุตฺตโร นาม ชิโน,
สพฺพธมฺมาน ปารคู;
ขีณาสวสหเสฺสหิ,
ปาวิสี นครํ ชิโน.
สุจารุรูปํ ทิสฺวาน,
อาเนญฺชการิตํ วิย;
ปริวุตํ อรหนฺเตหิ,
ทิสฺวา จิตฺตํ ปสาทยิํ.
สิรสฺมิํ อญฺชลิํ กตฺวา,
นมสฺสิตฺวาน สุพฺพตํ;
ปสนฺนจิตฺโต สุมโน,
อุตฺตรียมทาสหํ._
อุโภ หตฺเถหิ ปคฺคยฺห,_
สาฏกํ อุกฺขิปิํ อหํ;
ยาวตา พุทฺธปริสา,
ตาว ฉาเทสิ สาฏโก.
ปิณฺฑจารํ จรนฺตสฺส,
มหาภิกฺขุคณาทิโน;
ฉทํ กโรนฺโต อฏฺฐาสิ,
หาสยนฺโต มมํ ตทา.
ฆรโต นิกฺขมนฺตสฺส,
สยมฺภู อคฺคปุคฺคโล;
วีถิยํว ฐิโต สตฺถา,
อกา เม อนุโมทนํ.
ปสนฺนจิตฺโต สุมโน,
โย เม อทาสิ สาฏกํ;
ตมหํ กิตฺตยิสฺสามิ,
สุโณถ มม ภาสโต.
‘ติํสกปฺปสหสฺสานิ,
เทวโลเก รมิสฺสติ;
ปญฺญาสกฺขตฺตุํ เทวินฺโท,
เทวรชฺชํ กริสฺสติ.
เทวโลเก วสนฺตสฺส,
ปุญฺญกมฺมสมงฺคิโน;
สมนฺตา โยชนสตํ,
ทุสฺสจฺฉนฺนํ ภวิสฺสติ.
ฉตฺติํสกฺขตฺตุํ ราชา จ,
จกฺกวตฺตี ภวิสฺสติ;
ปเทสรชฺชํ วิปุลํ,
คณนาโต อสงฺขิยํ.
ภเว สํสรมานสฺส,
ปุญฺญกมฺมสมงฺคิโน;
มนสา ปตฺถิตํ สพฺพํ,
นิพฺพตฺติสฺสติ ตาวเท.
โกเสยฺยกมฺพลิยานิ,
โขมกปฺปาสิกานิ จ;
มหคฺฆานิ จ ทุสฺสานิ,
ปฏิลจฺฉติยํ นโร.
มนสา ปตฺถิตํ สพฺพํ,
ปฏิลจฺฉติยํ นโร;
เอกทุสฺสสฺส วิปากํ,
อนุโภสฺสติ สพฺพทา.
โส ปจฺฉา ปพฺพชิตฺวาน,
สุกฺกมูเลน โจทิโต;
โคตมสฺส ภควโต,
ธมฺมํ สจฺฉิกริสฺสติ’.
อโห เม สุกตํ กมฺมํ,
สพฺพญฺญุสฺส มเหสิโน;
เอกาหํ สาฏกํ ทตฺวา,
ปตฺโตมฺหิ อมตํ ปทํ.
มณฺฑเป รุกฺขมูเล วา,
วสโต สุญฺญเก ฆเร;
ธาเรติ ทุสฺสฉทนํ,
สมนฺตา พฺยามโต มม.
อวิญฺญตฺตํ นิวาเสมิ,
จีวรํ ปจฺจยญฺจหํ;
ลาภี อนฺนสฺส ปานสฺส,
อุตฺตเรยฺยสฺสิทํ ผลํ._
สตสหสฺสิโต กปฺเป,
ยํ กมฺมมกริํ ตทา;
ทุคฺคติํ นาภิชานามิ,
วตฺถทานสฺสิทํ ผลํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา อุตฺตเรยฺยทายโก เถโร อิมา คาถาโย อภาสิตฺถาติ.
อุตฺตเรยฺยทายกตฺเถรสฺสาปทานํ อฏฺฐมํ.