35.1 เอกปทุมิยตฺเถรอปทาน
“ปทุมุตฺตโร นาม ชิโน,
สพฺพธมฺมาน ปารคู;
ภวาภเว วิภาเวนฺโต,
ตาเรสิ ชนตํ พหุํ.
หํสราชา ตทา โหมิ,
ทิชานํ ปวโร อหํ;
ชาตสฺสรํ สโมคยฺห,
กีฬามิ หํสกีฬิตํ.
ปทุมุตฺตโร โลกวิทู,
อาหุตีนํ ปฏิคฺคโห;
ชาตสฺสรสฺส อุปริ,
อาคจฺฉิ ตาวเท ชิโน.
ทิสฺวานหํ เทวเทวํ,
สยมฺภุํ โลกนายกํ;
วณฺเฏ เฉตฺวาน ปทุมํ,
สตปตฺตํ มโนรมํ.
มุขตุณฺเฑน ปคฺคยฺห,
ปสนฺโน โลกนายเก;
อุกฺขิปิตฺวาน คคเน,_
พุทฺธเสฏฺฐํ อปูชยิํ.
ปทุมุตฺตโร โลกวิทู,
อาหุตีนํ ปฏิคฺคโห;
อนฺตลิกฺเข ฐิโต สตฺถา,
อกา เม อนุโมทนํ.
‘อิมินา เอกปทุเมน,
เจตนาปณิธีหิ จ;
กปฺปานํ สตสหสฺสํ,
วินิปาตํ น คจฺฉสิ’.
อิทํ วตฺวาน สมฺพุทฺโธ,_
ชลชุตฺตมนามโก;
มม กมฺมํ ปกิตฺเตตฺวา,
อคมา เยน ปตฺถิตํ.
สตสหสฺสิโต กปฺเป,
ยํ กมฺมมกริํ ตทา;
ทุคฺคติํ นาภิชานามิ,
พุทฺธปูชายิทํ ผลํ.
ปฏิสมฺภิทา จตโสฺส,
วิโมกฺขาปิ จ อฏฺฐิเม;
ฉฬภิญฺญา สจฺฉิกตา,
กตํ พุทฺธสฺส สาสนํ”.
อิตฺถํ สุทํ อายสฺมา เอกปทุมิโย เถโร อิมา คาถาโย อภาสิตฺถาติ.
เอกปทุมิยตฺเถรสฺสาปทานํ ปฐมํ.