4.3 มหากจฺจานตฺเถรอปทาน
“ปทุมุตฺตรนาถสฺส,
ปทุมํ นาม เจติยํ;
สิลาสนํ การยิตฺวา,
สุวณฺเณนาภิเลปยิํ.
รตนามยฉตฺตญฺจ,
ปคฺคยฺห วาฬพีชนิํ;
พุทฺธสฺส อภิโรเปสิํ,
โลกพนฺธุสฺส ตาทิโน.
ยาวตา เทวตา ภุมฺมา,
สพฺเพ สนฺนิปตุํ ตทา;
รตนามยฉตฺตานํ,
วิปากํ กถยิสฺสติ.
ตญฺจ สพฺพํ สุณิสฺสาม,
กถยนฺตสฺส สตฺถุโน;
ภิโยฺย หาสํ ชเนยฺยาม,
สมฺมาสมฺพุทฺธสาสเน.
เหมาสเน นิสีทิตฺวา,
สยมฺภู อคฺคปุคฺคโล;
ภิกฺขุสํฆปริพฺยูโฬฺห,
อิมา คาถา อภาสถ._
‘เยนิทํ อาสนํ ทินฺนํ,
โสวณฺณํ รตนามยํ;
ตมหํ กิตฺตยิสฺสามิ,
สุณาถ มม ภาสโต.
ติํส กปฺปานิ เทวินฺโท,
เทวรชฺชํ กริสฺสติ;
สมนฺตา โยชนสตํ,
อาภายาภิภวิสฺสติ.
มนุสฺสโลกมาคนฺตฺวา,
จกฺกวตฺตี ภวิสฺสติ;
ปภสฺสโรติ นาเมน,
อุคฺคเตโช ภวิสฺสติ._
ทิวา วา ยทิ วา รตฺติํ,
สตรํสีว อุคฺคโต;
สมนฺตา อฏฺฐรตนํ,
อุชฺโชติสฺสติ ขตฺติโย._
กปฺปสตสหสฺสมฺหิ,
โอกฺกากกุลสมฺภโว;
โคตโม นาม โคตฺเตน,
สตฺถา โลเก ภวิสฺสติ.
ตุสิตา หิ จวิตฺวาน,
สุกฺกมูเลน โจทิโต;
กจฺจาโน นาม นาเมน,
พฺรหฺมพนฺธุ ภวิสฺสติ.
โส ปจฺฉา ปพฺพชิตฺวาน,
อรหา เหสฺสตินาสโว;
โคตโม โลกปชฺโชโต,
อคฺคฏฺฐาเน ฐเปสฺสติ.
สํขิตฺตปุจฺฉิตํ ปญฺหํ,
วิตฺถาเรน กเถสฺสติ;
กถยนฺโต จ ตํ ปญฺหํ,
อชฺฌาสยํ ปูรยิสฺสติ’.
อฑฺเฒ กุเล อภิชาโต,
พฺราหฺมโณ มนฺตปารคู;
โอหาย ธนธญฺญานิ,
ปพฺพชิํ อนคาริยํ.
สํขิตฺเตนปิ ปุจฺฉนฺเต,
วิตฺถาเรน กเถมหํ;
อชฺฌาสยํ เตสํ ปูเรมิ,
โตเสมิ ทฺวิปทุตฺตมํ.
โตสิโต เม มหาวีโร,
สยมฺภู อคฺคปุคฺคโล;
ภิกฺขุสํเฆ นิสีทิตฺวา,
เอตทคฺเค ฐเปสิ มํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา มหากจฺจาโน เถโร อิมา คาถาโย อภาสิตฺถาติ.
มหากจฺจานตฺเถรสฺสาปทานํ ตติยํ.