40.1.2 ทานวตฺถุสมฺปาทน
นฬกาเร อุปาคมฺม,
ฉตฺตํ กาเรสิ ตาวเท;
ฉตฺตสตสหสฺสานิ,
เอกโต สนฺนิปาตยิํ.
ทุสฺสสตสหสฺสานิ,
เอกโต สนฺนิปาตยิํ;
ปตฺตสตสหสฺสานิ,
เอกโต สนฺนิปาตยิํ.
วาสิโย สตฺถเก จาปิ,
สูจิโย นขเฉทเน;
เหฏฺฐาฉตฺเต ฐปาเปสิํ,
กาเรตฺวา ตทนุจฺฉเว.
วิธูปเน ตาลวณฺเฏ,
โมรหตฺเถ จ จามเร;
ปริสฺสาวเน เตลธาเร,
การยิํ ตทนุจฺฉเว.
สูจิฆเร อํสพทฺเธ,
อโถปิ กายพนฺธเน;
อาธารเก จ สุกเต,
การยิํ ตทนุจฺฉเว.
ปริโภคภาชเน จ,
อโถปิ โลหถาลเก;
เภสชฺเช ปูรยิตฺวาน,
เหฏฺฐาฉตฺเต ฐเปสหํ.
วจํ อุสีรํ ลฏฺฐิมธุํ,
ปิปฺผลี มริจานิ จ;
หรีตกิํ สิงฺคีเวรํ,
สพฺพํ ปูเรสิ ภาชเน.
อุปาหนา ปาทุกาโย,_
อโถ อุทกปุญฺฉเน;
กตฺตรทณฺเฑ สุกเต,
การยิํ ตทนุจฺฉเว.
โอสธญฺชนนาฬี จ,
สลากา ธมฺมกุตฺตรา;
กุญฺจิกา ปญฺจวณฺเณหิ,
สิพฺพิเต กุญฺจิกาฆเร.
อาโยเค ธูมเนตฺเต จ,
อโถปิ ทีปธารเก;
ตุมฺพเก จ กรณฺเฑ จ,
การยิํ ตทนุจฺฉเว.
สณฺฑาเส ปิปฺผเล เจว,
อโถปิ มลหารเก;
เภสชฺชถวิเก เจว,
การยิํ ตทนุจฺฉเว.
อาสนฺทิโย ปีฐเก จ,
ปลฺลงฺเก จตุโรมเย;
ตทนุจฺฉเว การยิตฺวา,
เหฏฺฐาฉตฺเต ฐเปสหํ.
อุณฺณาภิสี ตูลภิสี,_
อโถปิ ปีฐิกาภิสี;
พิมฺโพหเน จ สุกเต,
การยิํ ตทนุจฺฉเว.
กุรุวินฺเท มธุสิตฺเถ,
เตลํ หตฺถปฺปตาปกํ;
สิปาฏิผลเก สุจี,
มญฺจํ อตฺถรเณน จ.
เสนาสเน ปาทปุญฺเฉ,
สยนาสนทณฺฑเก;
ทนฺตโปเณ จ อาฏลี,
สีสาเลปนคนฺธเก.
อรณี ผลปีเฐ จ,
ปตฺตปิธานถาลเก;
อุทกสฺส กฏจฺฉู จ,_
จุณฺณกํ รชนมฺพณํ.
สมฺมชฺชนํ อุทปตฺตํ,
ตถา วสฺสิกสาฏิกํ;
นิสีทนํ กณฺฑุจฺฉาทิ,
อถ อนฺตรวาสกํ.
อุตฺตราสงฺคสงฺฆาฏี,_
นตฺถุกํ มุขโสธนํ;
พิฬงฺคโลณํ ปหูตญฺจ,
มธุญฺจ ทธิปานกํ.
ธูปํ สิตฺถํ ปิโลติญฺจ,
มุขปุญฺฉนสุตฺตกํ;
ทาตพฺพํ นาม ยํ อตฺถิ,
ยญฺจ กปฺปติ สตฺถุโน.
สพฺพเมตํ สมาเนตฺวา,
อานนฺทํ อุปสงฺกมิํ;
อุปสงฺกมฺม ราชานํ,_
ชเนตารํ มเหสิโน;
สิรสา อภิวาเทตฺวา,
อิทํ วจนมพฺรวิํ._