40.1.3 ทาโนกาสยาจนา
‘เอกโต ชาตสํวทฺธา,
อุภินฺนํ เอกโต มนํ;_
สาธารณา สุขทุกฺเข,
อุโภ จ อนุวตฺตกา._
อตฺถิ เจตสิกํ ทุกฺขํ,
ตวาเธยฺยํ อรินฺทม;
ยทิ สกฺโกสิ ตํ ทุกฺขํ,
วิโนเทยฺยาสิ ขตฺติย’.
‘ตว ทุกฺขํ มม ทุกฺขํ,
อุภินฺนํ เอกโต มโน;_
นิฏฺฐิตนฺติ วิชานาหิ,
มมาเธยฺยํ สเจ ตุวํ’.
‘ชานาหิ โข มหาราช,
ทุกฺขํ เม ทุพฺพิโนทยํ;
ปหุ สมาโน คชฺชสุ,
เอกํ เต ทุจฺจชํ วรํ.
ยาวตา วิชิเต อตฺถิ,
ยาวตา มม ชีวิตํ;
เอเตหิ ยทิ เต อตฺโถ,
ทสฺสามิ อวิกมฺปิโต.
คชฺชิตํ โข ตยา เทว,
มิจฺฉา ตํ พหุ คชฺชิตํ;
ชานิสฺสามิ ตุวํ อชฺช,
สพฺพธมฺเม ปติฏฺฐิตํ’.
‘อติพาฬฺหํ นิปีเฬสิ,
ททมานสฺส เม สโต;
กิํ เต เม ปีฬิเตนตฺโถ,
ปตฺถิตํ เต กเถหิ เม’.
‘อิจฺฉามหํ มหาราช,
พุทฺธเสฏฺฐํ อนุตฺตรํ;
โภชยิสฺสามิ สมฺพุทฺธํ,
วชฺชํ เม มาหุ ชีวิตํ’.
‘อญฺญํ เตหํ วรํ ทมฺมิ,
มา ยาจิตฺโถ ตถาคตํ;
อเทโยฺย กสฺสจิ พุทฺโธ,
มณิ โชติรโส ยถา’.
‘นนุ เต คชฺชิตํ เทว,
ยาว ชีวิตมตฺตโน;
ชีวิตํ ททมาเนน,
ยุตฺตํ ทาตุํ ตถาคตํ’.
‘ฐปนีโย มหาวีโร,
อเทโยฺย กสฺสจิ ชิโน;
น เม ปฏิสฺสุโต พุทฺโธ,
วรสฺสุ อมิตํ ธนํ’.
‘วินิจฺฉยํ ปาปุณาม,
ปุจฺฉิสฺสาม วินิจฺฉเย;
ยถาสณฺฐํ กเถสฺสนฺติ,
ปฏิปุจฺฉาม ตํ ตถา’.
รญฺโญ หตฺเถ คเหตฺวาน,
อคมาสิํ วินิจฺฉยํ;
ปุรโต อกฺขทสฺสานํ,
อิทํ วจนมพฺรวิํ._
‘สุณนฺตุ เม อกฺขทสฺสา,
ราชา วรมทาสิ เม;
น กิญฺจิ ฐปยิตฺวาน,
ชีวิตมฺปิ ปวารยิ.
ตสฺส เม วรทินฺนสฺส,
พุทฺธเสฏฺฐํ วริํ อหํ;
สุทินฺโน โหติ เม พุทฺโธ,
ฉินฺทถ สํสยํ มม’.
‘โสสฺสาม ตว วจนํ,
ภูมิปาลสฺส ราชิโน;
อุภินฺนํ วจนํ สุตฺวา,_
ฉินฺทิสฺสาเมตฺถ สํสยํ.
สพฺพํ เทว ตยา ทินฺนํ,
อิมสฺส สพฺพคาหิกํ;_
น กิญฺจิ ฐปยิตฺวาน,
ชีวิตมฺปิ ปวารยิ’.
‘กิจฺฉปฺปตฺโตว หุตฺวาน,
ยาจี วรมนุตฺตรํ;
อิมํ สุทุกฺขิตํ ญตฺวา,_
อทาสิํ สพฺพคาหิกํ’.
‘ปราชโย ตุวํ เทว,
อสฺส เทโยฺย ตถาคโต;
อุภินฺนํ สํสโย ฉินฺโน,_
ยถาสณฺฐมฺหิ ติฏฺฐถ’.
ราชา ตตฺเถว ฐตฺวาน,
อกฺขทเสฺสตทพฺรวิ;
‘สมฺมา มยฺหมฺปิ เทยฺยาถ,
ปุน พุทฺธํ ลภามหํ’.
‘ปูเรตฺวา ตว สงฺกปฺปํ,
โภชยิตฺวา ตถาคตํ;
ปุน เทยฺยาสิ สมฺพุทฺธํ,
อานนฺทสฺส ยสสฺสิโน’.