40.1.5 ทานปฏิยาทน
มิตฺตามจฺเจ สมาเนตฺวา,
อิทํ วจนมพฺรวิํ;_
‘สุทุลฺลโภ มยา ลทฺโธ,
มณิ โชติรโส ยถา.
เกน ตํ ปูชยิสฺสาม,
อปฺปเมโยฺย อนูปโม;
อตุโล อสโม ธีโร,
ชิโน อปฺปฏิปุคฺคโล.
ตถาสมสโม เจว,
อทุติโย นราสโภ;
ทุกฺกรํ อธิการญฺหิ,
พุทฺธานุจฺฉวิกํ มยา.
นานาปุปฺเผ สมาเนตฺวา,
กโรม ปุปฺผมณฺฑปํ;
พุทฺธานุจฺฉวิกํ เอตํ,
สพฺพปูชา ภวิสฺสติ’.
อุปฺปลํ ปทุมํ วาปิ,_
วสฺสิกํ อธิมุตฺตกํ;
จมฺปกํ นาคปุปฺผญฺจ,
มณฺฑปํ การยิํ อหํ.
สตาสนสหสฺสานิ,
ฉตฺตจฺฉายาย ปญฺญปิํ;
ปจฺฉิมํ อาสนํ มยฺหํ,
อธิกํ สตมคฺฆติ.
สตาสนสหสฺสานิ,
ฉตฺตจฺฉายาย ปญฺญปิํ;
ปฏิยาเทตฺวา อนฺนปานํ,
กาลํ อาโรจยิํ อหํ.
อาโรจิตมฺหิ กาลมฺหิ,
ปทุมุตฺตโร มหามุนิ;
วสีสตสหเสฺสหิ,
นิเวสนมุเปสิ เม.
ธาเรนฺตํ อุปริจฺฉตฺตํ,
สุผุลฺลปุปฺผมณฺฑเป;
วสีสตสหเสฺสหิ,
นิสีทิ ปุริสุตฺตโม.
‘ฉตฺตสตสหสฺสานิ,
สตสหสฺสมาสนํ;
กปฺปิยํ อนวชฺชญฺจ,
ปฏิคณฺหาหิ จกฺขุม’.
ปทุมุตฺตโร โลกวิทู,
อาหุตีนํ ปฏิคฺคโห;
มมํ ตาเรตุกาโม โส,
สมฺปฏิจฺฉิ มหามุนิ.