40.1.7 พฺยากรณ
‘อนูนกํ ทานวรํ,
โย เม ปาทาสิ มาณโว;
ตมหํ กิตฺตยิสฺสามิ,
สุณาถ มม ภาสโต.
หตฺถี อสฺสา รถา ปตฺตี,
เสนา จ จตุรงฺคินี;
ปริวาเรสฺสนฺติมํ นิจฺจํ,
สพฺพทานสฺสิทํ ผลํ.
หตฺถิยานํ อสฺสยานํ,
สิวิกา สนฺทมานิกา;
อุปฏฺฐิสฺสนฺติมํ นิจฺจํ,_
สพฺพทานสฺสิทํ ผลํ.
สฏฺฐิ รถสหสฺสานิ,
สพฺพาลงฺการภูสิตา;
ปริวาเรสฺสนฺติมํ นิจฺจํ,
สพฺพทานสฺสิทํ ผลํ.
สฏฺฐิ ตูริยสหสฺสานิ,
เภริโย สมลงฺกตา;
วชฺชยิสฺสนฺติมํ นิจฺจํ,
สพฺพทานสฺสิทํ ผลํ.
ฉฬาสีติสหสฺสานิ,
นาริโย สมลงฺกตา;
วิจิตฺตวตฺถาภรณา,
อามุกฺกมณิกุณฺฑลา.
อฬารปมฺหา หสุลา,
สุสญฺญา ตนุมชฺฌิมา;
ปริวาเรสฺสนฺติมํ นิจฺจํ,
สพฺพทานสฺสิทํ ผลํ.
ติํสกปฺปสหสฺสานิ,
เทวโลเก รมิสฺสติ;
สหสฺสกฺขตฺตุํ เทวินฺโท,
เทวรชฺชํ กริสฺสติ.
สหสฺสกฺขตฺตุํ ราชา จ,
จกฺกวตฺตี ภวิสฺสติ;
ปเทสรชฺชํ วิปุลํ,
คณนาโต อสงฺขิยํ.
เทวโลเก วสนฺตสฺส,
ปุญฺญกมฺมสมงฺคิโน;
เทวโลกปริยนฺตํ,
รตนฉตฺตํ ธริสฺสติ.
อิจฺฉิสฺสติ ยทา ฉายํ,_
ฉทนํ ทุสฺสปุปฺผชํ;
อิมสฺส จิตฺตมญฺญาย,_
นิพทฺธํ ฉาทยิสฺสติ.
เทวโลกา จวิตฺวาน,
สุกฺกมูเลน โจทิโต;
ปุญฺญกมฺเมน สํยุตฺโต,
พฺรหฺมพนฺธุ ภวิสฺสติ.
กปฺปสตสหสฺสมฺหิ,
โอกฺกากกุลสมฺภโว;
โคตโม นาม โคตฺเตน,
สตฺถา โลเก ภวิสฺสติ.
สพฺพเมตํ อภิญฺญาย,
โคตโม สกฺยปุงฺคโว;
ภิกฺขุสํเฆ นิสีทิตฺวา,
เอตทคฺเค ฐเปสฺสติ.
ปิลินฺทวจฺฉนาเมน,
เหสฺสติ สตฺถุสาวโก;
เทวานํ อสุรานญฺจ,
คนฺธพฺพานญฺจ สกฺกโต.
ภิกฺขูนํ ภิกฺขุนีนญฺจ,
คิหีนญฺจ ตเถว โส;
ปิโย หุตฺวาน สพฺเพสํ,
วิหริสฺสตินาสโว’.