40.10 อชิตตฺเถรอปทาน
“ปทุมุตฺตโร นาม ชิโน,
สพฺพธมฺมาน ปารคู;
อชฺโฌคาเหตฺวา หิมวนฺตํ,
นิสีทิ โลกนายโก.
นาหํ อทฺทกฺขิํ สมฺพุทฺธํ,
นปิ สทฺทํ สุโณมหํ;
มม ภกฺขํ คเวสนฺโต,
อาหิณฺฑามิ วเน อหํ.
ตตฺถทฺทสฺสาสิํ สมฺพุทฺธํ,
ทฺวตฺติํสวรลกฺขณํ;
ทิสฺวาน วิตฺติมาปชฺชิํ,
สตฺโต โก นามยํ ภเว.
ลกฺขณานิ วิโลเกตฺวา,
มม วิชฺชํ อนุสฺสริํ;
สุตญฺหิ เมตํ วุฑฺฒานํ,
ปณฺฑิตานํ สุภาสิตํ.
เตสํ ยถา ตํ วจนํ,
อยํ พุทฺโธ ภวิสฺสติ;
ยนฺนูนาหํ สกฺกเรยฺยํ,
คติํ เม โสธยิสฺสติ.
ขิปฺปํ อสฺสมมาคนฺตฺวา,
มธุเตลํ คหิํ อหํ;
โกลมฺพกํ คเหตฺวาน,
อุปคจฺฉิํ วินายกํ._
ติทณฺฑเก คเหตฺวาน,
อพฺโภกาเส ฐเปสหํ;
ปทีปํ ปชฺชลิตฺวาน,
อฏฺฐกฺขตฺตุํ อวนฺทหํ.
สตฺตรตฺตินฺทิวํ พุทฺโธ,
นิสีทิ ปุริสุตฺตโม;
ตโต รตฺยา วิวสาเน,
วุฏฺฐาสิ โลกนายโก.
ปสนฺนจิตฺโต สุมโน,
สพฺพรตฺตินฺทิวํ อหํ;
ทีปํ พุทฺธสฺส ปาทาสิํ,
ปสนฺโน เสหิ ปาณิภิ.
สพฺเพ วนา คนฺธมยา,
ปพฺพเต คนฺธมาทเน;
พุทฺธสฺส อานุภาเวน,
อาคจฺฉุํ พุทฺธสนฺติกํ.
เย เกจิ ปุปฺผคนฺธาเส,
ปุปฺผิตา ธรณีรุหา;
พุทฺธสฺส อานุภาเวน,
สพฺเพ สนฺนิปตุํ ตทา.
ยาวตา หิมวนฺตมฺหิ,
นาคา จ ครุฬา อุโภ;
ธมฺมญฺจ โสตุกามา เต,
อาคจฺฉุํ พุทฺธสนฺติกํ.
เทวโล นาม สมโณ,
พุทฺธสฺส อคฺคสาวโก;
วสีสตสหเสฺสหิ,
พุทฺธสนฺติกุปาคมิ.
ปทุมุตฺตโร โลกวิทู,
อาหุตีนํ ปฏิคฺคโห;
ภิกฺขุสํเฆ นิสีทิตฺวา,
อิมา คาถา อภาสถ._
‘โย เม ทีปํ ปทีเปสิ,
ปสนฺโน เสหิ ปาณิภิ;
ตมหํ กิตฺตยิสฺสามิ,
สุณาถ มม ภาสโต.
สฏฺฐิ กปฺปสหสฺสานิ,
เทวโลเก รมิสฺสติ;
สหสฺสกฺขตฺตุํ ราชา จ,
จกฺกวตฺตี ภวิสฺสติ.
โสฬสมํ ภาณวารํ.
ฉตฺติํสกฺขตฺตุํ เทวินฺโท,
เทวรชฺชํ กริสฺสติ;
ปถวิยํ สตฺตสตํ,
วิปุลํ รชฺชํ กริสฺสติ.
ปเทสรชฺชํ วิปุลํ,
คณนาโต อสงฺขิยํ;
อิมินา ทีปทาเนน,_
ทิพฺพจกฺขุ ภวิสฺสติ.
สมนฺตโต อฏฺฐโกสํ,
ปสฺสิสฺสติ อยํ สทา;
เทวโลกา จวนฺตสฺส,
นิพฺพตฺตนฺตสฺส ชนฺตุโน.
ทิวา วา ยทิ วา รตฺติํ,
ปทีปํ ธารยิสฺสติ;
ชายมานสฺส สตฺตสฺส,
ปุญฺญกมฺมสมงฺคิโน.
ยาวตา นครํ อาสิ,
ตาวตา โชตยิสฺสติ;
อุปปชฺชติ ยํ โยนิํ,_
เทวตฺตํ อถ มานุสํ.
อเสฺสว ทีปทานสฺส,
อฏฺฐทีปผเลน หิ;
น ชยิสฺสนฺติมํ ชนฺตู,
ทีปทานสฺสิทํ ผลํ.
กปฺปสตสหสฺสมฺหิ,
โอกฺกากกุลสมฺภโว;
โคตโม นาม โคตฺเตน,
สตฺถา โลเก ภวิสฺสติ.
ตสฺส ธมฺเมสุ ทายาโท,
โอรโส ธมฺมนิมฺมิโต;
สพฺพาสเว ปริญฺญาย,
นิพฺพายิสฺสตินาสโว.
โตสยิตฺวาน สมฺพุทฺธํ,
โคตมํ สกฺยปุงฺควํ;
อชิโต นาม นาเมน,
เหสฺสติ สตฺถุ สาวโก’.
สฏฺฐิ กปฺปสหสฺสานิ,
เทวโลเก รมิํ อหํ;
ตตฺราปิ เม ทีปสตํ,
โชตเต นิจฺจกาลิกํ.
เทวโลเก มนุเสฺส วา,
นิทฺธาวนฺติ ปภา มม;
พุทฺธเสฏฺฐํ สริตฺวาน,
ภิโยฺย หาสํ ชเนสหํ.
ตุสิตาหํ จวิตฺวาน,
โอกฺกมิํ มาตุกุจฺฉิยํ;
ชายมานสฺส สนฺตสฺส,
อาโลโก วิปุโล อหุ.
อคารา อภินิกฺขมฺม,
ปพฺพชิํ อนคาริยํ;
พาวริํ อุปสงฺกมฺม,
สิสฺสตฺตํ อชฺฌุปาคมิํ.
หิมวนฺเต วสนฺโตหํ,
อสฺโสสิํ โลกนายกํ;
อุตฺตมตฺถํ คเวสนฺโต,_
อุปคจฺฉิํ วินายกํ._
ทนฺโต พุทฺโธ ทเมตาวี,
โอฆติณฺโณ นิรูปธิ;
นิพฺพานํ กถยี พุทฺโธ,
สพฺพทุกฺขปฺปโมจนํ.
ตํ เม อาคมนํ สิทฺธํ,
โตสิโตหํ มหามุนิํ;
ติโสฺส วิชฺชา อนุปฺปตฺตา,
กตํ พุทฺธสฺส สาสนํ.
สตสหสฺสิโต กปฺเป,
ยํ ทีปมททิํ ตทา;
ทุคฺคติํ นาภิชานามิ,
ทีปทานสฺสิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”. (3886)
อิตฺถํ สุทํ อายสฺมา อชิโต เถโร อิมา คาถาโย อภาสิตฺถาติ.
อชิตตฺเถรสฺสาปทานํ ทสมํ.
ปิลินฺทวจฺฉวคฺโค จตฺตาลีสโม.ตสฺสุทฺทานํ
ปิลินฺทวจฺโฉ เสโล จ,
สพฺพกิตฺตี มธุนฺทโท;
กูฏาคารี พากุโล จ,
คิริ สฬลสวฺหโย.
สพฺพโท อชิโต เจว,
คาถาโย คณิตา อิห;
สตานิ ปญฺจ คาถานํ,
วีสติ จ ตทุตฺตรีติ.
อถ วคฺคุทฺทานํ
ปทุมารกฺขโท เจว,
อุมา คนฺโธทเกน จ;_
เอกปทฺม สทฺทสญฺญี,
มนฺทารํ โพธิวนฺทโก.
อวฏญฺจ ปิลินฺทิ จ,
คาถาโย คณิตา อิห;
จตุสตฺตติ คาถาโย,
เอกาทส สตานิ จ.
ปทุมวคฺคทสกํ.
จตุตฺถสตกํ สมตฺตํ.