40.6 พากุลตฺเถรอปทาน
“หิมวนฺตสฺสาวิทูเร,
โสภิโต นาม ปพฺพโต;
อสฺสโม สุกโต มยฺหํ,
สกสิเสฺสหิ มาปิโต.
มณฺฑปา จ พหู ตตฺถ,
ปุปฺผิตา สินฺทุวารกา;
กปิตฺถา จ พหู ตตฺถ,
ปุปฺผิตา ชีวชีวกา.
นิคฺคุณฺฑิโย พหู ตตฺถ,
พทรามลกานิ จ;
ผารุสกา อลาพู จ,
ปุณฺฑรีกา จ ปุปฺผิตา.
อาฬกา เพลุวา ตตฺถ,
กทลี มาตุลุงฺคกา;
มหานามา พหู ตตฺถ,
อชฺชุนา จ ปิยงฺคุกา.
โกสมฺพา สฬลา นิมฺพา,
นิโคฺรธา จ กปิตฺถนา;
เอทิโส อสฺสโม มยฺหํ,
สสิโสฺสหํ ตหิํ วสิํ.
อโนมทสฺสี ภควา,
สยมฺภู โลกนายโก;
คเวสํ ปฏิสลฺลานํ,
มมสฺสมมุปาคมิ.
อุเปตมฺหิ มหาวีเร,_
อโนมทสฺสิมหายเส;
ขเณน โลกนาถสฺส,
วาตาพาโธ สมุฏฺฐหิ.
วิจรนฺโต อรญฺญมฺหิ,
อทฺทสํ โลกนายกํ;
อุปคนฺตฺวาน สมฺพุทฺธํ,_
จกฺขุมนฺตํ มหายสํ.
อิริยญฺจาปิ ทิสฺวาน,_
อุปลกฺเขสหํ ตทา;_
อสํสยญฺหิ พุทฺธสฺส,
พฺยาธิ โน อุทปชฺชถ.
ขิปฺปํ อสฺสมมาคญฺฉิํ,
มม สิสฺสาน สนฺติเก;
เภสชฺชํ กตฺตุกาโมหํ,
สิเสฺส อามนฺตยิํ ตทา.
ปฏิสฺสุณิตฺวาน เม วากฺยํ,
สิสฺสา สพฺเพ สคารวา;
เอกชฺฌํ สนฺนิปติํสุ,
สตฺถุคารวตา มม.
ขิปฺปํ ปพฺพตมารุยฺห,
สพฺโพสธมหาสหํ;
ปานียโยคํ กตฺวาน,
พุทฺธเสฏฺฐสฺสทาสหํ.
ปริภุตฺเต มหาวีเร,
สพฺพญฺญุโลกนายเก;
ขิปฺปํ วาโต วูปสมิ,
สุคตสฺส มเหสิโน.
ปสฺสทฺธํ ทรถํ ทิสฺวา,
อโนมทสฺสี มหายโส;
สกาสเน นิสีทิตฺวา,
อิมา คาถา อภาสถ._
‘โย เม ปาทาสิ เภสชฺชํ,
พฺยาธิญฺจ สมยี มม;
ตมหํ กิตฺตยิสฺสามิ,
สุณาถ มม ภาสโต.
กปฺปสตสหสฺสานิ,
เทวโลเก รมิสฺสติ;
วาทิเต ตูริเย ตตฺถ,
โมทิสฺสติ สทา อยํ.
มนุสฺสโลกมาคนฺตฺวา,
สุกฺกมูเลน โจทิโต;
สหสฺสกฺขตฺตุํ ราชา จ,
จกฺกวตฺตี ภวิสฺสติ.
ปญฺจปญฺญาสกปฺปมฺหิ,
อโนโม นาม ขตฺติโย;
จาตุรนฺโต วิชิตาวี,
ชมฺพุมณฺฑสฺส อิสฺสโร.
สตฺตรตนสมฺปนฺโน,
จกฺกวตฺตี มหพฺพโล;
ตาวติํเสปิ โขเภตฺวา,
อิสฺสรํ การยิสฺสติ._
เทวภูโต มนุโสฺส วา,
อปฺปาพาโธ ภวิสฺสติ;
ปริคฺคหํ วิวชฺเชตฺวา,
พฺยาธิํ โลเก ตริสฺสติ.
อปฺปริเมเยฺย อิโต กปฺเป,
โอกฺกากกุลสมฺภโว;
โคตโม นาม โคตฺเตน,
สตฺถา โลเก ภวิสฺสติ.
ตสฺส ธมฺเมสุ ทายาโท,
โอรโส ธมฺมนิมฺมิโต;
สพฺพาสเว ปริญฺญาย,
นิพฺพายิสฺสตินาสโว.
กิเลเส ฌาปยิตฺวาน,
ตณฺหาโสตํ ตริสฺสติ;
พากุโล นาม นาเมน,
เหสฺสติ สตฺถุ สาวโก.
อิทํ สพฺพํ อภิญฺญาย,_
โคตโม สกฺยปุงฺคโว;
ภิกฺขุสํเฆ นิสีทิตฺวา,
เอตทคฺเค ฐเปสฺสติ’.
อโนมทสฺสี ภควา,
สยมฺภู โลกนายโก;
วิเวกานุวิโลเกนฺโต,
มมสฺสมมุปาคมิ.
อุปาคตํ มหาวีรํ,_
สพฺพญฺญุํ โลกนายกํ;
สพฺโพสเธน ตปฺเปสิํ,
ปสนฺโน เสหิ ปาณิภิ.
ตสฺส เม สุกตํ กมฺมํ,
สุเขตฺเต พีชสมฺปทา;
เขเปตุํ เนว สกฺโกมิ,
ตทา หิ สุกตํ มม.
ลาภา มม สุลทฺธํ เม,
โยหํ อทฺทกฺขิ นายกํ;
เตน กมฺมาวเสเสน,
ปตฺโตมฺหิ อจลํ ปทํ.
สพฺพเมตํ อภิญฺญาย,
โคตโม สกฺยปุงฺคโว;
ภิกฺขุสํเฆ นิสีทิตฺวา,
เอตทคฺเค ฐเปสิ มํ.
อปริเมเยฺย อิโต กปฺเป,
ยํ กมฺมมกริํ ตทา;
ทุคฺคติํ นาภิชานามิ,
เภสชฺชสฺส อิทํ ผลํ.
กิเลสา ฌาปิตา มยฺหํ,
ภวา สพฺเพ สมูหตา;
สพฺพาสวา ปริกฺขีณา,
นตฺถิ ทานิ ปุนพฺภโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา พากุโล เถโร อิมา คาถาโย อภาสิตฺถาติ.
พากุลตฺเถรสฺสาปทานํ ฉฏฺฐํ.