40.7 คิริมานนฺทตฺเถรอปทาน
“ภริยา เม กาลงฺกตา,
ปุตฺโต สีวถิกํ คโต;
มาตา ปิตา มตา ภาตา,
เอกจิตมฺหิ ฑยฺหเร.
เตน โสเกน สนฺตตฺโต,
กิโส ปณฺฑุ อโหสหํ;
จิตฺตกฺเขโป จ เม อาสิ,
เตน โสเกน อฏฺฏิโต.
โสกสลฺลปเรโตหํ,
วนนฺตมุปสงฺกมิํ;
ปวตฺตผลํ ภุญฺชิตฺวา,
รุกฺขมูเล วสามหํ.
สุเมโธ นาม สมฺพุทฺโธ,
ทุกฺขสฺสนฺตกโร ชิโน;
มมุทฺธริตุกาโม โส,
อาคญฺฉิ มม สนฺติกํ.
ปทสทฺทํ สุณิตฺวาน,
สุเมธสฺส มเหสิโน;
ปคฺคเหตฺวานหํ สีสํ,
อุโลฺลเกสิํ มหามุนิํ._
อุปาคเต มหาวีเร,_
ปีติ เม อุทปชฺชถ;
ตทาสิเมกคฺคมโน,
ทิสฺวา ตํ โลกนายกํ.
สติํ ปฏิลภิตฺวาน,
ปณฺณมุฏฺฐิมทาสหํ;
นิสีทิ ภควา ตตฺถ,
อนุกมฺปาย จกฺขุมา.
นิสชฺช ตตฺถ ภควา,
สุเมโธ โลกนายโก;
ธมฺมํ เม กถยี พุทฺโธ,
โสกสลฺลวิโนทนํ.
‘อนวฺหิตา ตโต อาคุํ,
อนนุญฺญาตา อิโต คตา;
ยถาคตา ตถา คตา,
ตตฺถ กา ปริเทวนา.
ยถาปิ ปถิกา สตฺตา,
วสฺสมานาย วุฏฺฐิยา;
สภณฺฑา อุปคจฺฉนฺติ,
วสฺสสฺสาปตนาย เต.
วเสฺส จ เต โอรมิเต,
สมฺปยนฺติ ยทิจฺฉกํ;
เอวํ มาตา ปิตา ตุยฺหํ,
ตตฺถ กา ปริเทวนา.
อาคนฺตุกา ปาหุนกา,
จลิเตริตกมฺปิตา;
เอวํ มาตา ปิตา ตุยฺหํ,
ตตฺถ กา ปริเทวนา.
ยถาปิ อุรโค ชิณฺณํ,
หิตฺวา คจฺฉติ สํ ตจํ;
เอวํ มาตา ปิตา ตุยฺหํ,
สํ ตนุํ อิธ หียเร’.
พุทฺธสฺส คิรมญฺญาย,
โสกสลฺลํ วิวชฺชยิํ;
ปาโมชฺชํ ชนยิตฺวาน,
พุทฺธเสฏฺฐํ อวนฺทหํ.
วนฺทิตฺวาน มหานาคํ,
ปูชยิํ คิริมญฺชริํ;
ทิพฺพคนฺธํ สมฺปวนฺตํ,
สุเมธํ โลกนายกํ.
ปูชยิตฺวาน สมฺพุทฺธํ,
สิเร กตฺวาน อญฺชลิํ;
อนุสฺสรํ คุณคฺคานิ,
สนฺถวิํ โลกนายกํ.
‘นิตฺติณฺโณสิ มหาวีร,
สพฺพญฺญุ โลกนายก;
สพฺเพ สตฺเต อุทฺธรสิ,
ญาเณน ตฺวํ มหามุเน.
วิมติํ ทฺเวฬฺหกํ วาปิ,
สญฺฉินฺทสิ มหามุเน;
ปฏิปาเทสิ เม มคฺคํ,
ตว ญาเณน จกฺขุม.
อรหา วสิปตฺตา จ,
ฉฬภิญฺญา มหิทฺธิกา;
อนฺตลิกฺขจรา ธีรา,
ปริวาเรนฺติ ตาวเท.
ปฏิปนฺนา จ เสขา จ,
ผลฏฺฐา สนฺติ สาวกา;
สูโรทเยว ปทุมา,
ปุปฺผนฺติ ตว สาวกา.
มหาสมุทฺโทวกฺโขโภ,
อตุโลปิ ทุรุตฺตโร;
เอวํ ญาเณน สมฺปนฺโน,
อปฺปเมโยฺยสิ จกฺขุม’.
วนฺทิตฺวาหํ โลกชินํ,
จกฺขุมนฺตํ มหายสํ;
ปุถุ ทิสา นมสฺสนฺโต,
ปฏิกุฏิโก อคญฺฉหํ.
เทวโลกา จวิตฺวาน,
สมฺปชาโน ปติสฺสโต;
โอกฺกมิํ มาตุยา กุจฺฉิํ,
สนฺธาวนฺโต ภวาภเว.
อคารา อภินิกฺขมฺม,
ปพฺพชิํ อนคาริยํ;
อาตาปี นิปโก ฌายี,
ปฏิสลฺลานโคจโร.
ปธานํ ปทหิตฺวาน,
โตสยิตฺวา มหามุนิํ;
จนฺโทวพฺภฆนา มุตฺโต,
วิจรามิ อหํ สทา.
วิเวกมนุยุตฺโตมฺหิ,
อุปสนฺโต นิรูปธิ;_
สพฺพาสเว ปริญฺญาย,
วิหรามิ อนาสโว.
ติํสกปฺปสหสฺสมฺหิ,
ยํ พุทฺธมภิปูชยิํ;
ทุคฺคติํ นาภิชานามิ,
พุทฺธปูชายิทํ ผลํ.
กิเลสา ฌาปิตา มยฺหํ,
ภวา สพฺเพ สมูหตา;
สพฺพาสวา ปริกฺขีณา,
นตฺถิ ทานิ ปุนพฺภโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา คิริมานนฺโท เถโร อิมา คาถาโย อภาสิตฺถาติ.
คิริมานนฺทตฺเถรสฺสาปทานํ สตฺตมํ.