41.10 อุเทนตฺเถรอปทาน
“หิมวนฺตสฺสาวิทูเร,
ปทุโม นาม ปพฺพโต;
อสฺสโม สุกโต มยฺหํ,
ปณฺณสาลา สุมาปิตา.
นทิโย สนฺทเร ตตฺถ,
สุปติตฺถา มโนรมา;
อจฺโฉทกา สีตชลา,
สนฺทเร นทิโย สทา.
ปาฐีนา ปาวุสา มจฺฉา,
พลชา มุญฺชโรหิตา;
โสเภนฺตา นทิโย เอเต,
วสนฺติ นทิยา สทา.
อมฺพชมฺพูหิ สญฺฉนฺนา,
กเรริติลกา ตถา;
อุทฺทาลกา ปาฏลิโย,_
โสเภนฺติ มม อสฺสมํ.
องฺโกลกา พิมฺพิชาลา,
มายาการี จ ปุปฺผิตา;
คนฺเธน อุปวายนฺตา,
โสเภนฺติ มม อสฺสมํ.
อติมุตฺตา สตฺตลิกา,
นาคา สาลา จ ปุปฺผิตา;
ทิพฺพคนฺธํ สมฺปวนฺตา,
โสเภนฺติ มม อสฺสมํ.
โกสมฺพา สฬลา นีปา,
อฏฺฐงฺคาปิ จ ปุปฺผิตา;
ทิพฺพคนฺธํ สมฺปวนฺตา,
โสเภนฺติ มม อสฺสมํ.
หรีตกา อามลกา,
อมฺพชมฺพุวิภีตกา;
โกลา ภลฺลาตกา พิลฺลา,
ผลานิ พหุ อสฺสเม.
กลมฺพา กนฺทลี ตตฺถ,
ปุปฺผนฺติ มม อสฺสเม;
ทิพฺพคนฺธํ สมฺปวนฺตา,
โสเภนฺติ มม อสฺสมํ.
อโสกปิณฺฑิวารี จ,
นิมฺพรุกฺขา จ ปุปฺผิตา;
ทิพฺพคนฺธํ สมฺปวนฺตา,
โสเภนฺติ มม อสฺสมํ.
ปุนฺนาคา คิริปุนฺนาคา,
ติมิรา ตตฺถ ปุปฺผิตา;
ทิพฺพคนฺธํ สมฺปวนฺตา,
โสเภนฺติ มม อสฺสมํ.
นิคฺคุณฺฑี สิรินิคฺคุณฺฑี,
จมฺปรุกฺเขตฺถ ปุปฺผิตา;
ทิพฺพคนฺธํ สมฺปวนฺตา,
โสเภนฺติ มม อสฺสมํ.
อวิทูเร โปกฺขรณี,
จกฺกวากูปกูชิตา;
มนฺทาลเกหิ สญฺฉนฺนา,
ปทุมุปฺปลเกหิ จ.
อจฺโฉทกา สีตชลา,
สุปติตฺถา มโนรมา;
อจฺฉา ผลิกสมานา,
โสเภนฺติ มม อสฺสมํ.
ปทุมา ปุปฺผเร ตตฺถ,
ปุณฺฑรีกา จ อุปฺปลา;
มนฺทาลเกหิ สญฺฉนฺนา,
โสเภนฺติ มม อสฺสมํ.
ปาฐีนา ปาวุสา มจฺฉา,
พลชา มุญฺชโรหิตา;
วิจรนฺตาว เต ตตฺถ,
โสเภนฺติ มม อสฺสมํ.
กุมฺภีลา สุสุมารา จ,
กจฺฉปา จ คหา พหู;
โอคหา อชครา จ,
โสเภนฺติ มม อสฺสมํ.
ปาเรวตา รวิหํสา,
จกฺกวากา นทีจรา;
ทินฺทิภา สาฬิกา เจตฺถ,
โสเภนฺติ มม อสฺสมํ.
นยิตา อมฺพคนฺธี จ,
เกตกา ตตฺถ ปุปฺผิตา;
ทิพฺพคนฺธํ สมฺปวนฺตา,
โสเภนฺติ มม อสฺสมํ.
สีหา พฺยคฺฆา จ ทีปี จ,
อจฺฉโกกตรจฺฉกา;
อนุสญฺจรนฺตา ปวเน,
โสเภนฺติ มม อสฺสมํ.
ชฏาภาเรน ภริตา,
อชินุตฺตรวาสนา;
อนุสญฺจรนฺตา ปวเน,
โสเภนฺติ มม อสฺสมํ.
อชินานิธรา เอเต,
นิปกา สนฺตวุตฺติโน;
อปฺปาหาราว เต สพฺเพ,
โสเภนฺติ มม อสฺสมํ.
ขาริภารํ คเหตฺวาน,
อชฺโฌคยฺห วนํ ตทา;
มูลผลานิ ภุญฺชนฺตา,
วสนฺติ อสฺสเม ตทา.
น เต ทารุํ อาหรนฺติ,
อุทกํ ปาทโธวนํ;_
สพฺเพสํ อานุภาเวน,
สยเมวาหรียติ.
จุลฺลาสีติสหสฺสานิ,
อิสเยตฺถ สมาคตา;_
สพฺเพว ฌายิโน เอเต,
อุตฺตมตฺถคเวสกา._
ตปสฺสิโน พฺรหฺมจารี,
โจเทนฺตา อปฺปนาว เต;
อมฺพราวจรา สพฺเพ,
วสนฺติ อสฺสเม ตทา.
ปญฺจาหํ สนฺนิปตนฺติ,
เอกคฺคา สนฺตวุตฺติโน;
อญฺโญญฺญํ อภิวาเทตฺวา,
ปกฺกมนฺติ ทิสามุขา.
ปทุมุตฺตโร นาม ชิโน,
สพฺพธมฺมาน ปารคู;
ตมนฺธการํ วิธมํ,
อุปฺปชฺชิ ตาวเท ชิโน._
มม อสฺสมสามนฺตา,
ยกฺโข อาสิ มหิทฺธิโก;
โส เม สํสิตฺถ สมฺพุทฺธํ,
ชลชุตฺตมนายกํ.
‘เอส พุทฺโธ สมุปฺปนฺโน,
ปทุมุตฺตโร มหามุนิ;
ขิปฺปํ คนฺตฺวาน สมฺพุทฺธํ,
ปยิรูปาส มาริส’.
ยกฺขสฺส วจนํ สุตฺวา,
วิปฺปสนฺเนน เจตสา;
อสฺสมํ สํสาเมตฺวาน,
นิกฺขมิํ วิปินา ตทา.
เจเฬว ฑยฺหมานมฺหิ,
นิกฺขมิตฺวาน อสฺสมา;
เอกรตฺติํ นิวาเสตฺวา,
อุปคจฺฉิํ วินายกํ._
ปทุมุตฺตโร โลกวิทู,
อาหุตีนํ ปฏิคฺคโห;
จตุสจฺจํ ปกาเสนฺโต,
เทเสสิ อมตํ ปทํ.
สุผุลฺลํ ปทุมํ คยฺห,
อุปคนฺตฺวา มเหสิโน;_
ปสนฺนจิตฺโต สุมโน,
พุทฺธสฺส อภิโรปยิํ.
ปูชยิตฺวาน สมฺพุทฺธํ,
ชลชุตฺตมนายกํ;
เอกํสํ อชินํ กตฺวา,
สนฺถวิํ โลกนายกํ.
‘เยน ญาเณน สมฺพุทฺโธ,
วสตีห อนาสโว;
ตํ ญาณํ กิตฺตยิสฺสามิ,
สุณาถ มม ภาสโต.
สํสารโสตํ ฉินฺทิตฺวา,
ตาเรสิ สพฺพปาณินํ;
ตว ธมฺมํ สุณิตฺวาน,
ตณฺหาโสตํ ตรนฺติ เต.
ตุวํ สตฺถา จ เกตุ จ,
ธโช ยูโป จ ปาณินํ;
ปรายโณ ปติฏฺฐา จ,
ทีโป จ ทฺวิปทุตฺตม.
ยาวตา คณิโน โลเก,
สตฺถวาหา ปวุจฺจเร;
ตุวํ อคฺโคสิ สพฺพญฺญุ,
ตว อนฺโตคธาว เต.
ตว ญาเณน สพฺพญฺญุ,
ตาเรสิ ชนตํ พหุํ;
ตว ทสฺสนมาคมฺม,
ทุกฺขสฺสนฺตํ กริสฺสเร.
เย เกจิเม คนฺธชาตา,
โลเก วายนฺติ จกฺขุม;
ตว คนฺธสโม นตฺถิ,
ปุญฺญกฺเขตฺเต มหามุเน.
ติรจฺฉานโยนิํ นิรยํ,
ปริโมเจสิ จกฺขุม;
อสงฺขตํ ปทํ สนฺตํ,
เทเสสิ ตฺวํ มหามุเน’.
ปทุมุตฺตโร โลกวิทู,
อาหุตีนํ ปฏิคฺคโห;
ภิกฺขุสํเฆ นิสีทิตฺวา,
อิมา คาถา อภาสถ._
‘โย เม ญาณํ อปูเชสิ,
ปสนฺโน เสหิ ปาณิภิ;
ตมหํ กิตฺตยิสฺสามิ,
สุณาถ มม ภาสโต.
ติํสกปฺปสหสฺสานิ,
เทวโลเก รมิสฺสติ;
สหสฺสกฺขตฺตุํ ราชา จ,
จกฺกวตฺตี ภวิสฺสติ’.
สุลทฺธลาภํ ลทฺโธมฺหิ,
โตสยิตฺวาน สุพฺพตํ;
สพฺพาสเว ปริญฺญาย,
วิหรามิ อนาสโว.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”. (4264)
อิตฺถํ สุทํ อายสฺมา อุเทโน เถโร อิมา คาถาโย อภาสิตฺถาติ.
อุเทนตฺเถรสฺสาปทานํ ทสมํ.
เมตฺเตยฺยวคฺโค เอกจตฺตาลีสโม.
ตสฺสุทฺทานํ
เมตฺเตโยฺย ปุณฺณโก เถโร,
เมตฺตคู โธตโกปิ จ;
อุปสิโว จ นนฺโท จ,_
เหมโก สตฺตโม ตหิํ.
โตเทโยฺย ชตุกณฺณี จ,
อุเทโน จ มหายโส;_
ตีณิ คาถาสตาเนตฺถ,
อสีติ ตีณิ จุตฺตริํ.