41.3 เมตฺตคุตฺเถรอปทาน
“หิมวนฺตสฺสาวิทูเร,
อโสโก นาม ปพฺพโต;
ตตฺถาสิ อสฺสโม มยฺหํ,
วิสฺสกมฺเมน มาปิโต.
สุเมโธ นาม สมฺพุทฺโธ,
อคฺโค การุณิโก มุนิ;
นิวาสยิตฺวา ปุพฺพเณฺห,
ปิณฺฑาย เม อุปาคมิ.
อุปาคตํ มหาวีรํ,_
สุเมธํ โลกนายกํ;
ปคฺคยฺห สุคตปตฺตํ,
สปฺปิเตลํ อปูรยิํ.
ทตฺวานหํ พุทฺธเสฏฺเฐ,
สุเมเธ โลกนายเก;
อญฺชลิํ ปคฺคเหตฺวาน,
ภิโยฺย หาสํ ชเนสหํ.
อิมินา สปฺปิทาเนน,_
เจตนาปณิธีหิ จ;
เทวภูโต มนุโสฺส วา,
ลภามิ วิปุลํ สุขํ.
วินิปาตํ วิวชฺเชตฺวา,
สํสรามิ ภวาภเว;
ตตฺถ จิตฺตํ ปณิธิตฺวา,
ลภามิ อจลํ ปทํ.
‘ลาภา ตุยฺหํ สุลทฺธํ เต,
ยํ มํ อทฺทกฺขิ พฺราหฺมณ;
มม ทสฺสนมาคมฺม,
อรหตฺตํ ภวิสฺสติ.
วิสฺสตฺโถ โหหิ มา ภายิ,
อธิคนฺตฺวา มหายสํ;
มมญฺหิ สปฺปิํ ทตฺวาน,
ปริโมกฺขสิ ชาติยา’.
อิมินา สปฺปิทาเนน,_
เจตนาปณิธีหิ จ;
เทวภูโต มนุโสฺส วา,
ลภเส วิปุลํ สุขํ.
อิมินา สปฺปิทาเนน,_
เมตฺตจิตฺตวตาย จ;
อฏฺฐารเส กปฺปสเต,
เทวโลเก รมิสฺสสิ.
อฏฺฐติํสติกฺขตฺตุญฺจ,
เทวราชา ภวิสฺสสิ;
ปเทสรชฺชํ วิปุลํ,
คณนาโต อสงฺขิยํ.
เอกปญฺญาสกฺขตฺตุญฺจ,
จกฺกวตฺตี ภวิสฺสสิ;
จาตุรนฺโต วิชิตาวี,
ชมฺพุมณฺฑสฺส อิสฺสโร.
มหาสมุทฺโทวกฺโขโภ,
ทุทฺธโร ปถวี ยถา;
เอวเมวํ จ เต โภคา,
อปฺปเมยฺยา ภวิสฺสเร.
สฏฺฐิโกฏี หิรญฺญสฺส,
จชิตฺวา ปพฺพชิํ อหํ;
กิํ กุสลํ คเวสนฺโต,
พาวริํ อุปสงฺกมิํ.
ตตฺถ มนฺเต อธียามิ,
ฉฬงฺคํ นาม ลกฺขณํ;
ตมนฺธการํ วิธมํ,
อุปฺปชฺชิ ตฺวํ มหามุนิ._
ตว ทสฺสนกาโมหํ,
อาคโตมฺหิ มหามุนิ;
ตว ธมฺมํ สุณิตฺวาน,
ปตฺโตมฺหิ อจลํ ปทํ.
ติํสกปฺปสหสฺสมฺหิ,
สปฺปิํ พุทฺธสฺสทาสหํ;
เอตฺถนฺตเร นาภิชาเน,
สปฺปิํ วิญฺญาปิตํ มยา.
มม สงฺกปฺปมญฺญาย,
อุปฺปชฺชติ ยทิจฺฉกํ;_
จิตฺตมญฺญาย นิพฺพตฺตํ,
สพฺเพ สนฺตปฺปยามหํ.
อโห พุทฺธา อโห ธมฺมา,
อโห โน สตฺถุ สมฺปทา;
โถกญฺหิ สปฺปิํ ทตฺวาน,
อปฺปเมยฺยํ ลภามหํ.
มหาสมุทฺเท อุทกํ,
ยาวตา เนรุปสฺสโต;
มม สปฺปิํ อุปาทาย,
กลภาคํ น เหสฺสติ.
ยาวตา จกฺกวาฬสฺส,
กริยนฺตสฺส ราสิโต;
มม นิพฺพตฺตวตฺถานํ,
โอกาโส โส น สมฺมติ.
ปพฺพตราชา หิมวา,
ปวโรปิ สิลุจฺจโย;
มมานุลิตฺตคนฺธสฺส,
อุปนิธิํ น เหสฺสติ._
วตฺถํ คนฺธญฺจ สปฺปิญฺจ,
อญฺญญฺจ ทิฏฺฐธมฺมิกํ;
อสงฺขตญฺจ นิพฺพานํ,
สปฺปิทานสฺสิทํ ผลํ.
สติปฏฺฐานสยโน,
สมาธิฌานโคจโร;
โพชฺฌงฺคโภชโน อชฺช,
สปฺปิทานสฺสิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา เมตฺตคู เถโร อิมา คาถาโย อภาสิตฺถาติ.
เมตฺตคุตฺเถรสฺสาปทานํ ตติยํ.