41.6 นนฺทกตฺเถรอปทาน
“มิคลุทฺโท ปุเร อาสิํ,
อรญฺเญ กานเน อหํ;
ปสทํ มิคเมสนฺโต,
สยมฺภุํ อทฺทสํ อหํ.
อนุรุทฺโธ นาม สมฺพุทฺโธ,
สยมฺภู อปราชิโต;
วิเวกกาโม โส ธีโร,
วนมชฺโฌคหี ตทา.
จตุทณฺเฑ คเหตฺวาน,
จตุฏฺฐาเน ฐเปสหํ;
มณฺฑปํ สุกตํ กตฺวา,
ปทฺมปุปฺเผหิ ฉาทยิํ.
มณฺฑปํ ฉาทยิตฺวาน,
สยมฺภุํ อภิวาทยิํ;
ธนุํ ตตฺเถว นิกฺขิปฺป,
ปพฺพชิํ อนคาริยํ.
นจิรํ ปพฺพชิตสฺส,
พฺยาธิ เม อุทปชฺชถ;
ปุพฺพกมฺมํ สริตฺวาน,
ตตฺถ กาลงฺกโต อหํ.
ปุพฺพกมฺเมน สํยุตฺโต,
ตุสิตํ อคมาสหํ;
ตตฺถ โสณฺณมยํ พฺยมฺหํ,
นิพฺพตฺตติ ยทิจฺฉกํ.
สหสฺสยุตฺตํ หยวาหิํ,
ทิพฺพยานมธิฏฺฐิโต;
อารุหิตฺวาน ตํ ยานํ,
คจฺฉามหํ ยทิจฺฉกํ.
ตโต เม นิยฺยมานสฺส,
เทวภูตสฺส เม สโต;
สมนฺตา โยชนสตํ,
มณฺฑโป เม ธรียติ.
สยเนหํ ตุวฏฺฏามิ,
อจฺฉนฺเน ปุปฺผสนฺถเต;
อนฺตลิกฺขา จ ปทุมา,
วสฺสนฺเต นิจฺจกาลิกํ.
มรีจิเก ผนฺทมาเน,
ตปฺปมาเน จ อาตเป;
น มํ ตาเปติ อาตาโป,
มณฺฑปสฺส อิทํ ผลํ.
ทุคฺคติํ สมติกฺกนฺโต,
อปายา ปิหิตา มม;
มณฺฑเป รุกฺขมูเล วา,
สนฺตาโป เม น วิชฺชติ.
มหีสญฺญํ อธิฏฺฐาย,
โลณโตยํ ตรามหํ;
ตสฺส เม สุกตํ กมฺมํ,
พุทฺธปูชายิทํ ผลํ.
อปถมฺปิ ปถํ กตฺวา,
คจฺฉามิ อนิลญฺชเส;
อโห เม สุกตํ กมฺมํ,
พุทฺธปูชายิทํ ผลํ.
ปุพฺเพนิวาสํ ชานามิ,
ทิพฺพจกฺขุ วิโสธิตํ;
อาสวา เม ปริกฺขีณา,
พุทฺธปูชายิทํ ผลํ.
ชหิตา ปุริมา ชาติ,
พุทฺธสฺส โอรโส อหํ;
ทายาโทมฺหิ จ สทฺธมฺเม,
พุทฺธปูชายิทํ ผลํ.
อาราธิโตมฺหิ สุคตํ,
โคตมํ สกฺยปุงฺควํ;
ธมฺมธโช ธมฺมทายาโท,
พุทฺธปูชายิทํ ผลํ.
อุปฏฺฐิตฺวาน สมฺพุทฺธํ,_
โคตมํ สกฺยปุงฺควํ;
ปารงฺคมนิยํ มคฺคํ,
อปุจฺฉิํ โลกนายกํ.
อชฺฌิฏฺโฐ กถยี พุทฺโธ,
คมฺภีรํ นิปุณํ ปทํ;
ตสฺสาหํ ธมฺมํ สุตฺวาน,
ปตฺโตมฺหิ อาสวกฺขยํ.
อโห เม สุกตํ กมฺมํ,
ปริมุตฺโตมฺหิ ชาติยา;
สพฺพาสวปริกฺขีโณ,
นตฺถิ ทานิ ปุนพฺภโว.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา นนฺทโก เถโร อิมา คาถาโย อภาสิตฺถาติ.
นนฺทกตฺเถรสฺสาปทานํ ฉฏฺฐํ.