41.9 ชตุกณฺณิตฺเถรอปทาน
“นคเร หํสวติยา,
เสฏฺฐิปุตฺโต อโหสหํ;
สมปฺปิโต กามคุเณ,
ปริจาเรมหํ ตทา.
ตโต ปาสาทมารุยฺห,
มหาโภเค วลญฺชโก;
ตตฺถ นจฺเจหิ คีเตหิ,
ปริจาเรมหํ ตทา.
ตูริยา อาหตา มยฺหํ,
สมฺมตาฬสมาหิตา;
นจฺจนฺตา อิตฺถิโย สพฺพา,
หรนฺติเยว เม มโน.
เจลาปิกา วามนิกา,
กุญฺชวาสี ติมชฺฌิกา;
ลงฺฆิกา โสกชฺฌายี จ,
ปริวาเรนฺติ มํ สทา.
เวตาฬิโน กุมฺภถูนี,
นฏา จ นจฺจกา พหู;
นฏกา นาฏกา เจว,
ปริวาเรนฺติ มํ สทา.
กปฺปกา นฺหาปกา สูทา,
มาลาการา สุปาสกา;
ชลฺลา มลฺลา จ เต สพฺเพ,
ปริวาเรนฺติ มํ สทา.
เอเตสุ กีฬมาเนสุ,
สิกฺขิเต กตุปาสเน;
รตฺตินฺทิวํ น ชานามิ,
อินฺโทว ติทสงฺคเณ._
อทฺธิกา ปถิกา สพฺเพ,
ยาจกา วรกา พหู;
อุปคจฺฉนฺติ เต นิจฺจํ,_
ภิกฺขยนฺตา มมํ ฆรํ.
สมณา พฺราหฺมณา เจว,
ปุญฺญกฺเขตฺตา อนุตฺตรา;
วฑฺฒยนฺตา มมํ ปุญฺญํ,
อาคจฺฉนฺติ มมํ ฆรํ.
ปฏคา ลฏุกา สพฺเพ,
นิคณฺฐา ปุปฺผสาฏกา;
เตทณฺฑิกา เอกสิขา,
อาคจฺฉนฺติ มมํ ฆรํ.
อาชีวกา วิลุตฺตาวี,
โคธมฺมา เทวธมฺมิกา;
รโชชลฺลธรา เอเต,
อาคจฺฉนฺติ มมํ ฆรํ.
ปริตฺตกา สนฺติปตฺตา,
โกธปุคฺคนิกา พหู;
ตปสฺสี วนจารี จ,
อาคจฺฉนฺติ มมํ ฆรํ.
โอฑฺฑกา ทมิฬา เจว,
สากุฬา มลวาฬกา;
สวรา โยนกา เจว,
อาคจฺฉนฺติ มมํ ฆรํ.
อนฺธกา มุณฺฑกา สพฺเพ,
โกฏลา หนุวินฺทกา;
อาราวจีนรฏฺฐา จ,
อาคจฺฉนฺติ มมํ ฆรํ.
อลสนฺทกา ปลฺลวกา,
ธมฺมรา นิคฺคมานุสา;
เคหิกา เจตปุตฺตา จ,
อาคจฺฉนฺติ มมํ ฆรํ.
มาธุรกา โกสลกา,
กลิงฺคา หตฺถิโปริกา;
อิสิณฺฑา มกฺกลา เจว,_
อาคจฺฉนฺติ มมํ ฆรํ.
เจลาวกา อารพฺภา จ,
โอฆุฬฺหา เมฆลา พหู;
ขุทฺทกา สุทฺทกา เจว,
อาคจฺฉนฺติ มมํ ฆรํ.
โรหณา สินฺธวา เจว,
จิตกา เอกกณฺณิกา;
สุรฏฺฐา อปรนฺตา จ,
อาคจฺฉนฺติ มมํ ฆรํ.
สุปฺปารกา กุมารา จ,
มลฺลโสวณฺณภูมิกา;
วชฺชีตงฺคา จ เต สพฺเพ,
อาคจฺฉนฺติ มมํ ฆรํ.
นฬการา เปสการา,
จมฺมการา จ ตจฺฉกา;
กมฺมารา กุมฺภการา จ,
อาคจฺฉนฺติ มมํ ฆรํ.
มณิการา โลหการา,
โสณฺณการา จ ทุสฺสิกา;
ติปุการา จ เต สพฺเพ,
อาคจฺฉนฺติ มมํ ฆรํ.
อุสุการา ภมการา,_
เปสการา จ คนฺธิกา;
รชกา ตุนฺนวายา จ,
อาคจฺฉนฺติ มมํ ฆรํ.
เตลิกา กฏฺฐหารา จ,
อุทหารา จ เปสฺสิกา;_
สูปิกา สูปรกฺขา จ,
อาคจฺฉนฺติ มมํ ฆรํ.
โทวาริกา อนีกฏฺฐา,
พนฺธิกา ปุปฺผฉฑฺฑกา;
หตฺถารุหา หตฺถิปาลา,
อาคจฺฉนฺติ มมํ ฆรํ.
อานนฺทสฺส มหารญฺโญ,
มมตฺถสฺส อทาสหํ;
สตฺตวณฺเณน รตเนน,
อูนตฺถํ ปูรยามหํ.
เย มยา กิตฺติตา สพฺเพ,
นานาวณฺณา พหู ชนา;
เตสาหํ จิตฺตมญฺญาย,
ตปฺปยิํ รตเนนหํ.
วคฺคูสุ ภาสมานาสุ,
วชฺชมานาสุ เภริสุ;
สงฺเขสุ ธมยนฺเตสุ,
สกเคเห รมามหํ.
ภควา ตมฺหิ สมเย,
ปทุมุตฺตรนายโก;
วสีสตสหเสฺสหิ,
ปริกฺขีณาสเวหิ โส.
ภิกฺขูหิ สหิโต วีถิํ,
ปฏิปชฺชิตฺถ จกฺขุมา;
โอภาเสนฺโต ทิสา สพฺพา,
ทีปรุกฺโขว โชตติ.
วชฺชนฺติ เภริโย สพฺพา,
คจฺฉนฺเต โลกนายเก;
ปภา นิทฺธาวเต ตสฺส,
สตรํสีว อุคฺคโต.
กวาฏนฺตริกายาปิ,
ปวิฏฺเฐน จ รสฺมินา;
อนฺโตฆเรสุ วิปุโล,
อาโลโก อาสิ ตาวเท.
ปภํ ทิสฺวาน พุทฺธสฺส,
ปาริสชฺเช อโวจหํ;
‘นิสฺสํสยํ พุทฺธเสฏฺโฐ,
อิมํ วีถิมุปาคโต’._
ขิปฺปํ โอรุยฺห ปาสาทา,
อคมิํ อนฺตราปณํ;
สมฺพุทฺธํ อภิวาเทตฺวา,
อิทํ วจนมพฺรวิํ._
‘อนุกมฺปตุ เม พุทฺโธ,
ชลชุตฺตมนายโก;
วสีสตสหเสฺสหิ,
อธิวาเสสิ โส มุนิ’.
นิมนฺเตตฺวาน สมฺพุทฺธํ,
อภิเนสิํ สกํ ฆรํ;
ตตฺถ อนฺเนน ปาเนน,
สนฺตปฺเปสิํ มหามุนิํ.
ภุตฺตาวิํ กาลมญฺญาย,
พุทฺธเสฏฺฐสฺส ตาทิโน;
สตงฺคิเกน ตูริเยน,
พุทฺธเสฏฺฐํ อุปฏฺฐหิํ.
ปทุมุตฺตโร โลกวิทู,
อาหุตีนํ ปฏิคฺคโห;
อนฺโตฆเร นิสีทิตฺวา,
อิมา คาถา อภาสถ._
‘โย มํ ตูริเยหุปฏฺฐาสิ,
อนฺนปานญฺจทาสิ เม;
ตมหํ กิตฺตยิสฺสามิ,
สุณาถ มม ภาสโต.
ปหูตภกฺโข หุตฺวาน,
สหิรญฺโญ สโภชโน;
จตุทีเป เอกรชฺชํ,
การยิสฺสติยํ นโร.
ปญฺจ สีเล สมาทาย,
ทสกมฺมปเถ ตโต;
สมาทาย ปวตฺเตนฺโต,
ปริสํ สิกฺขาปยิสฺสติ.
ตูริยสตสหสฺสานิ,
เภริโย สมลงฺกตา;
วชฺชยิสฺสนฺติมํ นิจฺจํ,
อุปฏฺฐานสฺสิทํ ผลํ._
ติํสกปฺปสหสฺสานิ,
เทวโลเก รมิสฺสติ;
จตุสฏฺฐิกฺขตฺตุํ เทวินฺโท,
เทวรชฺชํ กริสฺสติ.
จตุสฏฺฐิกฺขตฺตุํ ราชา,
จกฺกวตฺตี ภวิสฺสติ;
ปเทสรชฺชํ วิปุลํ,
คณนาโต อสงฺขิยํ.
กปฺปสตสหสฺสมฺหิ,
โอกฺกากกุลสมฺภโว;
โคตโม นาม โคตฺเตน,
สตฺถา โลเก ภวิสฺสติ.
อุปปชฺชติ ยํ โยนิํ,_
เทวตฺตํ อถ มานุสํ;
อนูนโภโค หุตฺวาน,
มนุสฺสตฺตํ คมิสฺสติ.
อชฺฌายโก ภวิตฺวาน,
ติณฺณํ เวทาน ปารคู;
อุตฺตมตฺถํ คเวสนฺโต,_
จริสฺสติ มหิํ อิมํ.
โส ปจฺฉา ปพฺพชิตฺวาน,
สุกฺกมูเลน โจทิโต;
โคตมสฺส ภควโต,
สาสเนภิรมิสฺสติ.
อาราธยิตฺวาน สมฺพุทฺธํ,
โคตมํ สกฺยปุงฺควํ;
กิเลเส ฌาปยิตฺวาน,
อรหายํ ภวิสฺสติ’.
วิปิเน พฺยคฺฆราชาว,
มิคราชาว เกสรี;
อภีโต วิหรามชฺช,
สกฺยปุตฺตสฺส สาสเน.
เทวโลเก มนุเสฺส วา,
ทลิทฺเท ทุคฺคติมฺหิ วา;
นิพฺพตฺติํ เม น ปสฺสามิ,
อุปฏฺฐานสฺสิทํ ผลํ._
วิเวกมนุยุตฺโตมฺหิ,
อุปสนฺโต นิรูปธิ;_
นาโคว พนฺธนํ เฉตฺวา,
วิหรามิ อนาสโว.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา ชตุกณฺณิตฺเถโร อิมา คาถาโย อภาสิตฺถาติ.
ชตุกณฺณิตฺเถรสฺสาปทานํ นวมํ.