42.10 มญฺจทายกตฺเถรอปทาน
“ปรินิพฺพุเต การุณิเก,
สิทฺธตฺเถ โลกนายเก;
วิตฺถาริเก ปาวจเน,
เทวมานุสสกฺกเต.
จณฺฑาโล อาสหํ ตตฺถ,
อาสนฺทิปีฐการโก;
เตน กมฺเมน ชีวามิ,
เตน โปเสมิ ทารเก.
อาสนฺทิํ สุกตํ กตฺวา,
ปสนฺโน เสหิ ปาณิภิ;
สยเมวุปคนฺตฺวาน,
ภิกฺขุสํฆสฺสทาสหํ.
เตน กมฺเมน สุกเตน,
เจตนาปณิธีหิ จ;
ชหิตฺวา มานุสํ เทหํ,
ตาวติํสมคจฺฉหํ.
เทวโลกคโต สนฺโต,
โมทามิ ติทเส คเณ;
สยนานิ มหคฺฆานิ,
นิพฺพตฺตนฺติ ยทิจฺฉกํ.
ปญฺญาสกฺขตฺตุํ เทวินฺโท,
เทวรชฺชมการยิํ;
อสีติกฺขตฺตุํ ราชา จ,
จกฺกวตฺตี อโหสหํ.
ปเทสรชฺชํ วิปุลํ,
คณนาโต อสงฺขิยํ;
สุขิโต ยสวา โหมิ,
มญฺจทานสฺสิทํ ผลํ.
เทวโลกา จวิตฺวาน,
เอมิ เจ มานุสํ ภวํ;
มหารหา สุสยนา,
สยเมว ภวนฺติ เม.
อยํ ปจฺฉิมโก มยฺหํ,
จริโม วตฺตเต ภโว;
อชฺชาปิ สยเน กาเล,
สยนํ อุปติฏฺฐติ.
จตุนฺนวุติโต กปฺเป,
ยํ ทานมททิํ ตทา;
ทุคฺคติํ นาภิชานามิ,
มญฺจทานสฺสิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”. (4460)
อิตฺถํ สุทํ อายสฺมา มญฺจทายโก เถโร อิมา คาถาโย อภาสิตฺถาติ.
มญฺจทายกตฺเถรสฺสาปทานํ ทสมํ.
ภทฺทาลิวคฺโค พาจตฺตาลีสโม.
ตสฺสุทฺทานํ
ภทฺทาลี เอกฉตฺโต จ,
ติณสูโล จ มํสโท;
นาคปลฺลวิโก ทีปี,
อุจฺฉงฺคิ ยาคุทายโก._
ปตฺโถทนี มญฺจทโท,
คาถาโย คณิตา จิห;
ทฺเวสตานิ จ คาถานํ,
คาถา เจกา ตทุตฺตริ.