42.4 มธุมํสทายกตฺเถรอปทาน
“นคเร พนฺธุมติยา,
สูกริโก อโหสหํ;
อุกฺโกฏกํ รนฺธยิตฺวา,_
มธุมํสมฺหิ โอกิริํ.
สนฺนิปาตํ อหํ คนฺตฺวา,
เอกํ ปตฺตํ คเหสหํ;
ปูรยิตฺวาน ตํ ปตฺตํ,
ภิกฺขุสํฆสฺสทาสหํ.
โยตฺถ เถรตโร ภิกฺขุ,
นิยฺยาเทสิ มมํ ตทา;
อิมินา ปตฺตปูเรน,_
ลภสฺสุ วิปุลํ สุขํ.
ทุเว สมฺปตฺติโย ภุตฺวา,
สุกฺกมูเลน โจทิโต;
ปจฺฉิเม วตฺตมานมฺหิ,
กิเลเส ฌาปยิสฺสติ.
ตตฺถ จิตฺตํ ปสาเทตฺวา,
ตาวติํสมคจฺฉหํ;
ตตฺถ ภุตฺวา ปิวิตฺวา จ,
ลภามิ วิปุลํ สุขํ.
มณฺฑเป รุกฺขมูเล วา,
ปุพฺพกมฺมํ อนุสฺสริํ;
อนฺนปานาภิวโสฺส เม,
อภิวสฺสติ ตาวเท.
อิทํ ปจฺฉิมกํ มยฺหํ,_
จริโม วตฺตเต ภโว;
อิธาปิ อนฺนปานํ เม,_
วสฺสเต สพฺพกาลิกํ.
เตเนว มธุทาเนน,
สนฺธาวิตฺวา ภเว อหํ;
สพฺพาสเว ปริญฺญาย,
วิหรามิ อนาสโว.
เอกนวุติโต กปฺเป,
ยํ ทานมททิํ ตทา;
ทุคฺคติํ นาภิชานามิ,
มธุทานสฺสิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา มธุมํสทายโก เถโร อิมา คาถาโย อภาสิตฺถาติ.
มธุมํสทายกตฺเถรสฺสาปทานํ จตุตฺถํ.