42.6 เอกทีปิยตฺเถรอปทาน
“ปรินิพฺพุเต สุคเต,
สิทฺธตฺเถ โลกนายเก;
สเทวมานุสา สพฺเพ,
ปูเชนฺติ ทฺวิปทุตฺตมํ.
อาโรปิเต จ จิตเก,
สิทฺธตฺเถ โลกนายเก;
ยถาสเกน ถาเมน,
จิตํ ปูเชนฺติ สตฺถุโน.
อวิทูเร จิตกสฺส,
ทีปํ อุชฺชาลยิํ อหํ;
ยาว อุเทติ สูริโย,
ทีปํ เม ตาว อุชฺชลิ.
เตน กมฺเมน สุกเตน,
เจตนาปณิธีหิ จ;
ชหิตฺวา มานุสํ เทหํ,
ตาวติํสมคจฺฉหํ.
ตตฺถ เม สุกตํ พฺยมฺหํ,
เอกทีปีติ ญายติ;
ทีปสตสหสฺสานิ,
พฺยเมฺห ปชฺชลเร มม.
อุทยนฺโตว สูริโย,_
เทโห เม โชตเต สทา;
สปฺปภาหิ สรีรสฺส,
อาโลโก โหติ เม สทา.
ติโรกุฏฺฏํ ติโรเสลํ,
สมติคฺคยฺห ปพฺพตํ;
สมนฺตา โยชนสตํ,
ปสฺสามิ จกฺขุนา อหํ.
สตฺตสตฺตติกฺขตฺตุญฺจ,
เทวโลเก รมิํ อหํ;
เอกติํสติกฺขตฺตุญฺจ,
เทวรชฺชมการยิํ.
อฏฺฐวีสติกฺขตฺตุญฺจ,
จกฺกวตฺตี อโหสหํ;
ปเทสรชฺชํ วิปุลํ,
คณนาโต อสงฺขิยํ.
เทวโลกา จวิตฺวาน,
นิพฺพตฺติํ มาตุกุจฺฉิยํ;
มาตุกุจฺฉิคตสฺสาปิ,
อกฺขิ เม น นิมีลติ.
ชาติยา จตุวโสฺสหํ,
ปพฺพชิํ อนคาริยํ;
อฑฺฒมาเส อสมฺปตฺเต,
อรหตฺตมปาปุณิํ.
ทิพฺพจกฺขุํ วิโสเธสิํ,
ภวา สพฺเพ สมูหตา;
สพฺเพ กิเลสา สญฺฉินฺนา,
เอกทีปสฺสิทํ ผลํ.
ติโรกุฏฺฏํ ติโรเสลํ,
ปพฺพตญฺจาปิ เกวลํ;
สมติกฺกมฺม ปสฺสามิ,
เอกทีปสฺสิทํ ผลํ.
วิสมา เม สมา โหนฺติ,
อนฺธกาโร น วิชฺชติ;
นาหํ ปสฺสามิ ติมิรํ,
เอกทีปสฺสิทํ ผลํ.
จตุนฺนวุติโต กปฺเป,
ยํ ทีปมททิํ ตทา;
ทุคฺคติํ นาภิชานามิ,
เอกทีปสฺสิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา เอกทีปิโย เถโร อิมา คาถาโย อภาสิตฺถาติ.
เอกทีปิยตฺเถรสฺสาปทานํ ฉฏฺฐํ.