42.8 ยาคุทายกตฺเถรอปทาน
“อติถิํ เม คเหตฺวาน,
อคจฺฉิํ คามกํ ตทา;
สมฺปุณฺณนทิกํ ทิสฺวา,
สํฆารามํ อุปาคมิํ.
อารญฺญกา ธุตธรา,
ฌายิโน ลูขจีวรา;
วิเวกาภิรตา ธีรา,
สํฆาราเม วสนฺติ เต.
คติ เตสํ อุปจฺฉินฺนา,
สุวิมุตฺตาน ตาทินํ;
ปิณฺฑาย เต น คจฺฉนฺติ,
โอรุทฺธนทิตาย หิ.
ปสนฺนจิตฺโต สุมโน,
เวทชาโต กตญฺชลี;
ตณฺฑุลํ เม คเหตฺวาน,
ยาคุทานํ อทาสหํ.
ปญฺจนฺนํ ยาคุํ ทตฺวาน,
ปสนฺโน เสหิ ปาณิภิ;
สกกมฺมาภิรทฺโธหํ,
ตาวติํสมคจฺฉหํ.
มณิมยญฺจ เม พฺยมฺหํ,
นิพฺพตฺติ ติทเส คเณ;
นารีคเณหิ สหิโต,
โมทามิ พฺยมฺหมุตฺตเม.
เตตฺติํสกฺขตฺตุํ เทวินฺโท,
เทวรชฺชมการยิํ;
ติํสกฺขตฺตุํ จกฺกวตฺตี,
มหารชฺชมการยิํ.
ปเทสรชฺชํ วิปุลํ,
คณนาโต อสงฺขิยํ;
เทวโลเก มนุเสฺส วา,
อนุโภตฺวา สยํ อหํ.
ปจฺฉิเม ภเว สมฺปตฺเต,
ปพฺพชิํ อนคาริยํ;
สห โอโรปิเต เกเส,
สพฺพํ สมฺปฏิวิชฺฌหํ.
ขยโต วยโต จาปิ,
สมฺมสนฺโต กเฬวรํ;
ปุเร สิกฺขาปทาทานา,
อรหตฺตมปาปุณิํ.
สุทินฺนํ เม ทานวรํ,
วาณิชฺชํ สมฺปโยชิตํ;
เตเนว ยาคุทาเนน,
ปตฺโตมฺหิ อจลํ ปทํ.
โสกํ ปริทฺทวํ พฺยาธิํ,
ทรถํ จิตฺตตาปนํ;
นาภิชานามิ อุปฺปนฺนํ,
ยาคุทานสฺสิทํ ผลํ.
ยาคุํ สํฆสฺส ทตฺวาน,
ปุญฺญกฺเขตฺเต อนุตฺตเร;
ปญฺจานิสํเส อนุโภมิ,
อโห ยาคุสุยิฏฺฐตา.
อพฺยาธิตา รูปวตา,
ขิปฺปํ ธมฺมนิสนฺติตา;
ลาภิตา อนฺนปานสฺส,
อายุ ปญฺจมกํ มม.
โย โกจิ เวทํ ชนยํ,
สํเฆ ยาคุํ ทเทยฺย โส;
อิมานิ ปญฺจ ฐานานิ,_
ปฏิคเณฺหยฺย ปณฺฑิโต.
กรณียํ กตํ สพฺพํ,
ภวา อุคฺฆาฏิตา มยา;
สพฺพาสวา ปริกฺขีณา,
นตฺถิ ทานิ ปุนพฺภโว.
โส อหํ วิจริสฺสามิ,
คามา คามํ ปุรา ปุรํ;
นมสฺสมาโน สมฺพุทฺธํ,
ธมฺมสฺส จ สุธมฺมตํ.
ติํสกปฺปสหสฺสมฺหิ,
ยํ ทานมททิํ ตทา;
ทุคฺคติํ นาภิชานามิ,
ยาคุทานสฺสิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา ยาคุทายโก เถโร อิมา คาถาโย อภาสิตฺถาติ.
ยาคุทายกตฺเถรสฺสาปทานํ อฏฺฐมํ.